Lukojanov

Lukojanov
Лукоянов
	Lidnanznam;
Valdkund	Venäma
Eläjiden lugu (2021)	12,652 ristitud
Pind	20 km²
Telefonkod	+7−83 196-xx-xxx
Avtokod	52, 152
Aigvö	UTC+3 (MSK+0)

Lukojanov (ven.: Лукоя́нов, erz.: Лугаян ош) om Venäman lidn Alalidnan agjan suves. Se om Lukojanovan ümbrikon (edel vn 2022 semendkud — rajonan) administrativižeks keskuseks da palaks.

Istorii

Eländpunktan aluz om pandud 16. voz'sadal kuti külä ümbri erasen Ivaška Lukojanovan vezimellicas. Ekonomine žilo 17. voz'sadan keskespäi. Sai makundan lidnan statusad vl 1779 nügüdläiženke nimitusenke. Aleksandr Puškin-runokirjutajan usadib sijazihe makundas, ka hän oleli lidnas. Lähine suvine Kudejarovo-žilo ei ole lidnan palaks, siš ičeze administracii radab (2019).

Lukojanov šingotase pörutügiden i leibän tegimil, avtopaloiden edheotandal. Ende maidtegim i stöklan edheotand radoiba mugažo.

Geografijan andmused

Lidn sijadase ümbrikon keskuzpalas, pidust' Töš-jogen üläjoksmusen randoid (ven.: Тёша 311 km pitte, Okan oiged ližajogi), 170 m ü.m.t. keskmäižel korktusel, «Alauz'lidn — Saransk»-avto- i raudtekeskustal.

Matkad Alauz'lidnhasai om 145 km pohjoižhe orhal, 170 km avtotedme vai raudtedme. Lähembaižed lidnad oma Pervomaisk 48 km päivlaskmha-suvipäivlaskmha orhal, 58 km avtotedme vai 85 km raudtedme, i Arzamas 58 km lodeheze orhal, 63 km avtotedme vai raudtedme.

Klimat om ven kontinentaline. Voden keskmäine lämuz om +4,5 C°, kezakun-elokun +17..+19 C°, tal'vkun-uhokun −8..−9 C°. Paneb sadegid 577 mm vodes, enamba kezakus-elokus (64..71 mm kus), vähemba uhokus-sulakus (30..32 mm kus).

Tobmuz

Ul'janovo-žilo (948 rist. vl 2017) mülüi lidnankundha Lukojanovan ližaks. Lidnankundan pind oli 57,34 km².

Vspäi 1995 sijaližen ičeohjandusen pämez' oli lidnan Duman ezimez'. Lidnan Dum om pästtud radmaspäi vn 2023 vilukus, Nikolai Mitrohin oli sen likvidacižen laudkundan ezimehen vn 2022 redukuspäi. Duman ezimehed oliba Aleksei Simonov (reduku 2020 — reduku 2022), Sergei Kotikov (reduku 2015 — reduku 2020). Lidnankundan Administracii om likvidiruidud vn 2023 vilukus. Valerii Klimov radoi lidnankundan Administracijan jäl'gmäižen pämehen vn 2020 kül'mkuspäi. Edeline lidnan Administracijan pämez' oli Nikolai Maruškin (sulaku 2016 — reduku 2020).

Eläjad

Vn 2010 Venäman rahvahanlugemižen mödhe lidnan eläjiden lugu oli 14 951 ristitud (kaikiš suremb ristitišt), lidnankundan — 15 904 ristitud, rajonan pol', vn 2021 lidnan — 12 652 ristitud. Kaik 14 136 ristitud elihe lidnas i 15 084 ristitud kaikes lidnankundas vl 2017.

Rahvahad (2010): venälaižed — 94,1 %, mordvinalaižed — 4,0 %, toižed rahvahad — 1,9 %.

Ortodoksižen hristanuskondan Jumalanmaman Katken uz' kafedraline päjumalanpert'^[1] om avaitud vspäi 2010, sen ližaks uz' puine jumalanpert' om avaitud lidnas i Eläban Eziauguižen Stroican jumalanpert' sijadase Ul'janovo-žilos. Mordvinalaižiden pühäsarikod kazdas lidnan ümbrištos: «Lukaš», «Javlei», «Kšekuravai».

Openduz

Lapsiden opendusen aluzkundad oma kuz' nimitadud i nomeruidud päivkodid (nomer 1, 3..6, 8), kaks' keskškolad (nomer 1 i 2), lapsiden sädamižen pert', čomamahtoiden škol, lapsiden da norišton sportškol.

Lukojanovan gubernine kolledž^[2] (ende maižanduztehnikum), Lukojanovan pedagogine kolledž^[3] i Arzamasan medkolledžan filial oma lidnan professionaližen opendusen aluzkundoikš.

Galerei

Lukojanovan pedagogine kolledž (2012)
Jumalanmaman Katken kafedraline päjumalanpert', vn 2012 nägu
Lidnan torguindan keskuz vl 2012
Fizkul'turine «Kolos»-tervehtamižkompleks (2013)
Lukojanov-päraudtestancii vl 2019

Homaičendad

↑ Lukojanovan pühäpertid sobory.ru-saital. (ven.)
↑ Lukojanovan gubernižen kolledžan sait (lsxt.my1.ru). (ven.)
↑ Lukojanovan pedagogižen kolledžan sait (lukped.narod.ru). (ven.) (+ kolledžan istorii anglijan i saksan kelil)

Irdkosketused

Lukojanov Vikiaitas

	Alalidnan agjan lidnad
	Alauz'lidn \| Arzamas \| Balahn \| Bogorodsk \| Bor \| Čkalovsk \| Dzeržinsk \| Gorbatov \| Gorodec \| Knäginino \| Kstovo \| Kulebaki \| Liskovo \| Lukojanov \| Navašino \| Pavlovo \| Perevoz \| Pervomaisk \| Sarov \| Semönov \| Sergač \| Šahunj \| Zavolžje \| Uren' \| Vetlug \| Viks \| Volodarsk \| Vorsm

[1] Lukojanovan pühäpertid sobory.ru-saital. (ven.)

[2] Lukojanovan gubernižen kolledžan sait (lsxt.my1.ru). (ven.)

[3] Lukojanovan pedagogižen kolledžan sait (lukped.narod.ru). (ven.) (+ kolledžan istorii anglijan i saksan kelil)

[1]

[2]

[3]