Kstovo

Kstovo
Кстово

Lidnanznam	Flag
Valdkund	Venäma
Eläjiden lugu (2025)	61,118 ristitud
Pind	59,0 km²
Pämez'	Mihail Gogolev (reduku 2016—)
Telefonkod	+7−83 145-xx-xxx
Avtokod	52, 152
Aigvö	UTC+3 (MSK+0)

Kstovo (ven.: Ксто́во) om Venäman lidn Alalidnan agjan keskuzpalas. Se om agjan kudenz' lidn eläjiden lugun mödhe, Alauz'lidnan suvipäivnouzmaine ezilidn, Kstovon ümbrikon (edel vn 2021 tal'vkud — rajonan) administrativine keskuz da pala.

Istorii

Ende mordvinalaižed i totarlaižed eliba enambuses lidnan tahondas. Eländpunkt mainitaškanzihe 14. voz'sadaspäi kuti Kstovskai-külä (ven.: деревня Кстовская). Ksta-sana znamoičeb «manzik» mordvinan kelil. Kivivoin ümbriradmižen Novogor'kovskii-tegim om saudud 1950-nzil vozil. Kätihe küläd radnikžiloks vl 1954. Se sai lidnan statusad vn 1957 12. päiväl sügüz'kud.

Kstovo šingotase suren kivivoinhimijan tegimištzonal lidnan suvipäivlaskmas («Lukoil»-kompanijan kivivoinümbriradmižen tegim, mugažo etilenan, propilenan, bituman i polivinilhloridan tehmine). Toižed sarakod oma sömtegimišt (leibtegim, maidtegim, kolbasceh, jähine), mašinansauvomine (ventiläcijan tegim), sauvondmaterialiden pästand (raudbetonantegim), mugažo mebel'fabrik i Novogor'kovskai-LEK ratas lidnas.

Geografijan andmused

Kstovon ümbrikon sijaduz agjas vn 2008 kartal

Lidn sijadase ümbrikon lodehliženno röunanno, Volgan oiktal randal, 125 m ü.m.t. keskmäižel korktusel.

Matkad Alauz'lidnan röunhasai om kümne kilometrad lodeheze orhal vai 15 km avtotedme, keskuzpalhasai — 23 km orhal vai 28 km avtotedme. Toine lähembaine lidn om Bor 15 km pohjoižhe orhal, 50 km avtotedme vai raudtedme.

Tegimištzon om saudud Kud'm-jogen taga (ven.: Кудьма, Volgan oiged ližajogi 144 km pitte, lankteb sihe 20 km päivnouzmha lidnaspäi), sen oiktal randpolel. «Volga»-avtotrass (M7) läbitab kaiked lidnad. Raudtesarak tuleb lidnha Alauz'lidnaspäi, se om läz 15 km pitte i radab vemha ajaden jüguid vaiše.

Kstovo oli lidnankundan üks'jäižeks eländpunktaks edel sen likvidacijad vn 2021 tal'vkuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 66 657 ristitud, rajonan viž ühesandest, vn 2021 — 63 646 ristitud. Kaik 67 723 eläjad oli lidnas vl 2017. Kaikiš suremb lidnan ristitišt oli enamba 69 tuhad eläjid vll 1998−2001 (69 400 rist. vl 2000).

Rahvahad (2010): venälaižed — 96,3 %, toižed rahvahad — 3,7 %.

Ortodoksižen hristanuskondan seičeme pühäpertid oma saudud lidnas: nell' jumalanpertid i koume časounäd.

Lapsiden opendusen aluzkundad oma päivkodid, keskškolad, lapsiden i norišton sädamižen pert'kulu. «Mail'man sambon akademii»-sportkompleks radab lidnas. Kstovon kivivointehnikum om lidnan professionaližen opendusen aluzkundaks.

Galerei

• 
  Kstovon rajonan tobmuden sauvuz (2015)
• 
  Jumalanmaman Vladimiran jumalaižen jumalanpert', vn 2018 nägu
• 
  «Lukoil-Nižegorodnefteorgsintez» (Kstovon kivivoinümbriradai tegim) vl 2021, kuva om sätud Man kaimdajaspäi
• 
  «Atoll»-torguindkeskuz akvaparkanke (2015)
• 
  Lapsiden i norišton sädamižen pert'kulu (2013)

Irdkosketused

• Lidnan Duman i rajonan tobmuden aluzkundoiden sait (kstovo-adm.ru) i sen uz' versii. (ven.)
• Lidnan informacine sait (kstovo.ru). (ven.)