Jurjevec

Jurjevec
Юрьевец

Lidnanznam	Flag
Valdkund	Venäma
Eläjiden lugu (2021)	7,899 ristitud
Pind	8 km²
Pämez'	Nina Il'jina (tal'vku 2020—)
Telefonkod	+7−49 337-xx-xxx
Avtokod	37
Aigvö	UTC+3 (MSK+0)

Jurjevec (ven.: Ю́рьевец) om Venäman lidn da lidnankund Ivanovon agjan pohjoižpäivnouzmas. Se om Jurjevecan rajonan administrativine keskuz.

Istorii

Eländpunktan alusenpanendan oficialine voz' om 1225, Vladimiran Jurii II-ruhtinaz pani lidnusen alust kaičemha röunad londoišpäi. Edeližed nimitused: Jurjev-Povol'skii (ven.: Юрьев-Повольский, Georgijevsk, Jurjev-Povolžskii. Žilo sai lidnan statusad vl 1778. Vll 1955−1957 Gor'kijan vezivaradim om täuttud, lidnan istorižen keskusen pala sijadase pol'tošt metrad alemba veden järgelišt pindad i kaičese dambal.

Jurjevec šingotase omblendcehal da turizmal, betontegesiden, tualetbumagan i meblin tehmižel. Ende pölvhanfabrik, leibtegim i punümbriradai kombinat radoiba mugažo.

Geografijan andmused

Lidn sijadase pidust' Volgan Gor'kijan vezivaradimen oiktad randad, 120 m ü.m.t. keskmäižel korktusel. Vezivaradimen tazopind om 84 m ü.m.t., 15 kilometrhasai levette lidnad vaste. Kavag'mec om lidnan taga.

Matkad Alalidnan agjhasai om koume..viž kilometrad päivnouzmha orhal (sar' vezivaradimes), Ivanovohosai om 134 km päivlaskmha-suvipäivlaskmha orhal vai 166 km avtotel. Lähembaižed lidnad oma Pučež 39 km suvhe orhal vai 50 km avtotedme, i Kinešm (raudtestancii) 60 km päivlaskmha orhal vai 63 km avtotedme.

Tobmuz

Jurjevec om lidnankundan üks'jäižeks eländpunktaks. Lidnankundan pind — 9,11 km².

Edeline lidnankundan pämez' (Nevondkundan ezimez') om Svetlana Baranova (reduku 2015 — kül'mku 2020). Lidnan Administracijan pämez' om Aleksei Filin vn 2016 uhokuspäi.

Eläjad

Vl 1939 lidnan ristitišt oli 15 508 eläjad. Vn 2010 Venäman rahvahanlugemižen mödhe lidnan eläjiden lugu oli 10 210 ristitud, rajonan viž kahesandest. Kaik 8 378 eläjad oli lidnas vl 2017. Kaikiš suremb lidnan ristitišt oli 19..21 tuhad eläjid vozil 1959−1974 (21 tuh. rist. vl 1967).

Rahvahad (2010): venälaižed — 98,5 %, toižed rahvahad — 1,5 %.

Ortodoksižen hristanuskondan kuz'toštkümne pühäpertid oma kaičenus i saudud lidnas: Sündun Tulendan Jerusalimha (1733, om ližasaudud vl 1806) i Jumalanmaman Emäganpäivän (1825−1833) päjumalanpertid, kümne jumalanpertid i nell' časounäd.

Jurjevecan agrotegimištoline kolledž om lidnan professionaližen opendusen aluzkundaks.

Galerei

• 
  Georgijevskai-torg Jurjevecan rajonan administracijanke (huralpäi) i ph. Jurgijan jumalanpertinke kellčuhunduses (2008)
• 
  Päjumalanpertiden kompleks, vn 2013 nägu
• 
  19. voz'sadan torguindrived vl 2020
• 
  Puišt randirdal (2020)
• 
  Istorijan i čomamahtoiden muzei (2011, ende lidnan Flägin-pämehen pert')

Irdkosketused

• Lidnankundan i Jurjevecan rajonan tobmuden юрьевец-официальный.рф-sait. (ven.)
• Lidnan da rajonan kodirandantedištandan sait (yurevets37.ru). (ven.)