Zavolžsk

Zavolžsk
Заволжск

Lidnanznam	Flag
Valdkund	Venäma
Eläjiden lugu (2021)	8,896 ristitud
Pind	8 km²
Pämez'	Andrei Ivanov (sügüz'ku 2019 — tal'vku 2021, keväz'ku 2023—, velgusetäutai)
Telefonkod	+7−49 333-xx-xxx
Avtokod	37
Aigvö	UTC+3 (MSK+0)

Zavolžsk (ven.: Заво́лжск) om Venäman lidn da lidnankund Ivanovon agjan pohjoižpäivnouzmas, Kinešman ezilidn. Se om Zavolžskan rajonan administrativine keskuz (vspäi 1968).

Istorii

Ezmaine eländpunkt oli tetab lidnan territorijal kuti Vladičnoje (Bogojavlenskoje)-žilo 17. voz'sadaspäi. Sätihe Zavolžje-radnikžilod 16 eländpunktan ühtištusel vn 1934 20. päiväl uhokud. Radnikžilo sai lidnan statusad nügüdläiženke nimitusenke vn 1954 20. päiväl redukud, lidnan päiv oigendase semendkun jäl'gmäižel sobatal. Vll 1955−1957 Gor'kijan vezivaradim om täuttud.

Zavolžsk šingotase himižel tegimel (mujutimed, ližadused, rikin puhtastandan katalizator), čulkfabrikal, fibrmatkliphiden, pölvhanümbriradmižen i betonan edheotandoil, sömtegimištol.

Geografijan andmused

Lidn sijadase rajonan keskuzpalan suves, pidust' Volgan Gor'kijan vezivaradimen hurad randad, 130 m ü.m.t. keskmäižel korktusel. Vezivaradimen tazopind om 84 m ü.m.t., ühthe..kahthe kilometrhasai levette lidnad vaste. Matkad Kostroman agjhasai om 12 km pohjoižhe orhal, Ivanovohosai om 89 km suvipäivlaskmha orhal, 114 km avtotel vai 300 km raudtel. Lähembaižed lidnad oma Kinešm Volgan vastrandal ühtes kilometras suvipäivlaskmha orhal vai kahtes kilometras avtotedme, i Navoloki 11 km päivlaskmha orhal, 15 km avtotedme vai ülezjogen.

Zavolžsk-raudtestancii radab 50-kilometrižen sarakon lopus «Kostrom — Galič»-keskustaspäi, se om vaiše jüguiden täht. Kinešman avtotesild ühtenzoitab Volgan randoid vspäi 2003.

Tobmuz

Zavolžsk om lidnankundan üks'jäižeks eländpunktaks. Lidnankundan pind — 9,85 km².

Lidnankundan tobmuden pämez' om sen Administracijan pämez', edel vn 2016 heinkud oli Nevondkundan ezimez'. Edeližed lidnankundan Administracijan pämehed oma Väčeslav Kasatkin (vn 2016 redukuhusai i tal'vku 2021 — keväz'ku 2023), Aleksei Predtečenskii (reduku 2016 — eloku 2019). Lidnan Nevondkundan ezimez' om Aleksandr Krüčenkov vn 2023 keväz'kuspäi. Edeline ezimez' om Marina Varegina, radoi vspäi 2010 vn 2023 keväz'kuhusai.

Eläjad

Vl 1939 eländpunktan ristitišt oli 12 117 eläjad. Vn 2010 Venäman rahvahanlugemižen mödhe lidnan eläjiden lugu oli 12 045 ristitud, rajonan kaks' koumandest. Kaik 10 384 eläjad oli lidnas vl 2017. Kaikiš suremb ristitišt oli 16..17 tuhad eläjid vozil 1970−1992 (17 226 rist. vl 1979).

Rahvahad (2010): venälaižed — 97,3 %, totarlaižed — 1,1 %, toižed rahvahad — 1,6 %.

Ortodoksižen hristanuskondan nell' pühäpertid oma kaičenus i saudud lidnas: Jumalannägundan jumalanpert' (vspäi 1779) i koume časounäd. Protestantizman jumalanpert' om avaitud (seičemenden päivän adventistoiden).

Professionaližen opendusen aluzkund om Kinešman politehnižen kolledžan filial.

Galerei

• 
  Lidnan ohjastusen pert' (2010)
• 
  Jumalannägundan jumalanpert', vn 2010 nägu
• 
  Zavolžskan himine tegim vl 2010
• 
  Läžundkodid (2010)
• 
  Kul'turkeskuz (oiktalpäi) i kodirandantedištandmuzei (huralpäi) vl 2010

Irdkosketused

• Lidnankundan oficialine sait (адм-заволжск.рф) i sen versii edel vn 2022 sulakud (zavgoradm37.ru). (ven.)