Kohm

Kohm
Кохма

Lidnanznam	Flag
Valdkund	Venäma
Eläjiden lugu (2021)	30,940 ristitud
Pind	12,6 km²
Pämez'	Maksim Komissarov (tal'vku 2019—)
Telefonkod	+7−4932-xxx-xxx
Avtokod	37
Aigvö	UTC+3 (MSK+0)

Kohm (ven.: Ко́хма) om Venäman lidn da lidnümbrik Ivanovon agjan keskuzpalan päivlaskmas. Se om agjan seičemenz' lidn eläjiden lugun mödhe, Ivanovon suvipäivnouzmaine ezilidn, om ümbärtud Ivanovon rajonan territorijal.

Istorii

Eländpunkt mainitaškanzihe kuti Roždestveno-Kohm-žilo (ven.: Рождествено-Кохма) vspäi 1619, möhemha Kohm-žilo. Nimitihe tahondan amuižen nimitusen mödhe. Šingotihe kanghiden tehmižel 18.-19. voz'sadas. Žilo sai lidnan statusad vl 1925. Vll 1935−1948 oli Kohman rajonan keskuseks, sid' mülüi Ivanovon rajonha. Vspäi 2005 om erižeks lidnümbrikoks.

Kohm šingotase bumagkanghiden kombinatal, pölvazkahghiden fabrikal i čuhunduzlibutimiden tegimel (enččes «Strommašina»-edheotand).

Geografijan andmused

Lidnan sijaduz agjas vn 2010 kartal

Lidn sijadase Uvod'-jogen molembil randoil (ven.: У́водь 185 km pitte, Kläz'man hura ližajogi), 120 m ü.m.t. keskmäižel korktusel.

Matkad Ivanovon röunhasai om üks' kilometr lodeheze orhal vai avtotel, kümne kilometrad raudtel, keskuzpalhasai — 10 km lodeheze orhal vai avtotel. Toižed lähembaižed lidnad oma Šui 15 km päivnouzmha-suvipäivnouzmha orhal, 17 km avtotedme vai raudtedme, i Teikovo 35 km päivlaskmha-suvipäivlaskmha orhal, 45 km avtotedme vai raudtedme. Kaks'kilometrine raudtesarak tuleb lidnan pohjoižhe «Ivanovo — Vladimir»-keskustaspäi, se radab jüguiden täht vaiše.

Tobmuz

Kohm om lidnümbrikon üks'jäižeks eländpunktaks.

Lidnümbrikon tobmuden pämez' om sen Administracijan pämez'. Edeline lidnan Administracijan pämez' om Roman Vlasov (kezaku 2017 — tal'vku 2019). Lidnümbrikon Duman ezimez' om Gennadii Gluharev vn 2020 redukuspäi, edeline ezimez' om Jelena Kuvšinova (reduku 2015 — reduku 2020).

Eläjad

Vl 1939 lidnan ristitišt oli 18 983 eläjad. Vn 2010 Venäman rahvahanlugemižen mödhe lidnan eläjiden lugu oli 29 411 ristitud, vn 2021 — 30 940 ristitud. Kaik 30 316 eläjad oli lidnas vl 2017. Kaikiš suremb lidnan ristitišt om 29..30 tuhad eläjid vspäi 2010 (30 500 rist. vl 2018).

Rahvahad (2010): venälaižed — 94,3 %, ukrainalaižed — 1,2 %, toižed rahvahad — 4,5 %.

Ortodoksižen hristanuskondan nell' pühäpertid oma kaičenus i saudud lidnas: Jumalanmaman Blagoveššenjan jumalanpert' (om saudud vll 1998−2007) i koume časounäd. Niiden ližaks nell' jumalanpertid oma kadonuded.

Lapsiden opendusen aluzkundad oma päivkodid, keskškolad, čomamahtoiden škol. Kohman industrialine kolledž om lidnan professionaližen opendusen aluzkundaks.

Galerei

• 
  Lapsiden kirjišt i lidnan muzei (2017)
• 
  Vezivaradimen üläuit lidnas, vn 2017 nägu
• 
  Kohman bumagkanghiden kombinat vl 2017
• 
  «Visšaja Liga»-torguindkeskuz (2018, Üläühtnend, ende fabrikan kudondkorpus)
• 
  Lapsiden čomamahtoiden škol (2013, ende Jasüninskii-torgovanoiden usadiban päine pert')

Irdkosketused

• Lidnümbrikon tobmuden aluzkundoiden sait (kohma37.gosuslugi.ru). i sen vanh versii (kohma37.ru), om täuttud edel vn 2025 heinkud. (ven.)