Privolžsk
Lidnanznam
|
Flag
|
| Valdkund | Venäma |
| Eläjiden lugu (2021) | 14,332 ristitud |
| Pind | 16 km² |
.jpg)
| |
| Pämez' | Irina Astafjeva (semendku 2017 — reduku 2020, tal'vku 2021—) |
| Telefonkod | +7−49 339-xx-xxx |
| Avtokod | 37 |
| Aigvö | UTC+3 (MSK+0) |
Privolžsk (ven.: Приво́лжск) om Venäman lidn da lidnankund Ivanovon agjan pohjoižes. Se om Privolžskan rajonan administrativine keskuz (vspäi 1983) i kaikiš suremb lidn.
Istorii
[vajehta | vajehtada lähtetekst]Eländpunkt mainitase ezmäižen kerdan Semön Peškov-Saburov-bajarin kirjeižes vl 1485 kuti Jakovlevskoje-žilo (ven.: село Яковлевское). Vl 1924 kätihe Sur' Jakovlevskoje-žilod Jakovlevskii-radnikžiloks. Se sai lidnan statusad nügüdläiženke nimitusenke vn 1938 26. päiväl redukud.
Privolžsk šingotase pölvhankombinatal (kanghad, pühkmed), kahtel juvelirtegimel[1][2] i penil juveliredheotandoil.
Geografijan andmused
[vajehta | vajehtada lähtetekst]Lidn sijadase Šač-jogen (ven.: Шача 58 km pitte, Volgan oiged ližajogi) i Ingar-jogen randoil (ven.: Ингар 14 km pitte), 110 m ü.m.t. keskmäižel korktusel.
Matkad Kostroman agjhasai om kaks' kilometrad pohjoižhe orhal, Ivanovon keskushesai om 46 km suvhe-suvipäivlaskmha orhal, 51 km avtotel vai raudtel. Lähembaižed lidnad oma Volgorečensk (Kostroman agj) kudes kilometras lodeheze orhal vai kümnes kilometras avtotedme, Plös 16 km pohjoižpäivnouzmha orhal vai 18 km avtotedme, i Furmanov 18 km suvipäivlaskmha orhal, 20 km avtotedme vai raudtedme. Raudtesarak radoi vaiše jüguiden täht vn 2023 sügüz'kuhusai, konz' saudihe passažirplatformid da udessündutihe passažirühtenzoitust Ivanovonke i Furmanovanke.
Tobmuz
[vajehta | vajehtada lähtetekst]Privolžsk om lidnankundan üks'jäižeks eländpunktaks. Lidnankundan pind — 16 km².
Lidnankundan pämez' om sen Nevondkundan ezimez'. Lidnan erigoittud Administracii om likvidiruidud vn 2016 kezakus, Aleksandr Marejev radoi sen jäl'gmäižen pämehen.
Eläjad
[vajehta | vajehtada lähtetekst]Vl 1939 lidnan ristitišt oli 14 669 eläjad. Vn 2010 Venäman rahvahanlugemižen mödhe lidnan eläjiden lugu oli 16 747 ristitud, rajonan koume videndest. Kaik 15 824 eläjad oli lidnas vl 2017. Kaikiš suremb ristitišt oli 19..21 tuhad eläjid vozil 1967−1998 (21 tuh. rist. vl 1967).
Rahvahad (2010): venälaižed — 96,5 %, toižed rahvahad — 3,5 %.
Ortodoksižen hristanuskondan viž pühäpertid[3] oma saudud lidnas: Nikol'skii-naižjumalankodi ph. Mikulai-čudonsädajan jumalanpertinke (1779), koume časounäd oma avaitud, vanhuskolaižiden Jumalanmaman Kazanin jumalaižen časoun' (1882) om kaičenus.
Lapsiden opendusen aluzkundad oma seičeme päivkodid, aluzškol (nomer 12), kaks' keskškolad (nomer 1, 6), muzikškol, lapsiden i norišton sportškol. Furmanovan tehnižen kolledžan Privolžskan palakund om lidnan professionaližen opendusen aluzkundaks.
Galerei
[vajehta | vajehtada lähtetekst]-
Znam lidnan röunal (2006) -
Ph. Mikulai-čudonsädajan jumalanpert' kellčuhundusenke, vn 2011 nägu -
Vanhuskolaižiden Jumalanmaman Kazanin jumalaižen časoun', vn 2018 nägu -
Kul'turkeskuz (2019) -
Tulend lidnha Plösan polespäi vl 2011
Homaičendad
[vajehta | vajehtada lähtetekst]- ↑ Privolžsk «Krasnaja Presnä»-juvelirtegimen sait (kr-presnya.ru). (ven.)
- ↑ «Privolžskan juvelir»-fabrikan sait (pjew.ru). (ven.)
- ↑ Privolžskan pühäpertid sobory.ru-saital. (ven.)
Irdkosketused
[vajehta | vajehtada lähtetekst] |
Privolžsk Vikiaitas |
| Ivanovon agjan lidnad | ||
| Furmanov | Gavrilov Posad | Ivanovo | Jurjevec | Juž | Kinešm | Kohm | Komsomol'sk | Navoloki | Plös | Privolžsk | Pučež | Rodniki | Šui | Zavolžsk | Teikovo | Vičug | ||