Anžero-Sudžensk

Anžero-Sudžensk
Анжеро-Судженск

Lidnanznam	Flag
Valdkund	Venäma
Eläjiden lugu (2025)	63,942 ristitud
Pind	119,2 km²
Pämez'	Dmitrii Ažičakov (kül'mku 2016 — reduku 2019, heinku 2023—)
Telefonkod	+7−38 453-xx-xxx
Avtokod	42, 142
Aigvö	UTC+7 (MSK+4)

Anžero-Sudžensk (ven.: Анже́ро-Су́дженск) om Venäman lidn da lidnümbrik Kemerovon agjan pohjoižes. Se om agjan ühesanz' lidn eläjiden lugun mödhe.

Istorii

Eländpunktan aluz om pandud radinžiloks vl 1928 Anžerk- (ven.: Анжерка) da Surženk- (ven.: Сурженка) kaivuzžiloišpäi. Anžerk-žilo oli nimitadud Anžer-jogen mödhe (ven. Анжера), i Surženk-žilon nimi oli anttud tulijoil Kurskan gubernijaspäi, kus Sudž-jogi da Sudž-lidn oma olmas. Anžero-Sudžensk sai lidnan statusad vl 1931.

Lidn om Kuzbassan hilen samižen ühteks keskusišpäi tähäsai. Om raudten edheotandoid.

Geografijan andmused

Anžero-Sudženskan lidnümbrikon sijaduz agjas vn 2015 kartal

Lidn sijadase Kuzneckan katl'uses, 230 m ü.m.t. keskmäižel korktusel. Lidnümbrik röunatab Jajan rajonanke pohjoižes, päivnouzmas i suves, Jaškinon rajonanke suvipäivlaskmas, Taigan lidnümbrikonke lodehes.

Matkad Kemerovospäi om 115 kilometrad pohjoižpolehe. Transsib-raudte läbitab lidnad. Lähembaine lidn om Taig 25 km päivlaskmha orhal vai raudtel, 65 km avtotedme.

Tobmuz

Lidnanvuitte Rudničnii-žilo (3752 rist. vl 2017) da seičeme muite žilod mülüdas lidnümbrikho Anžero-Sudženskan ližaks. Lidnümbrikon pind — 340 km².

Lidnümbrikon tobmuden pämez' om sen Administracijan pämez'. Edeline lidnümbrikon pämez' om Aleksandr Ribalko (Александр Рыбалко, reduku 2019 — heinku 2023). Lidnümbrikon Rahvahandeputatoiden nevondkundan ezimez' om Vadim Rogalis vn 2021 redukuspäi. Edeline nevondkundan ezimez' om Gennadii Gorbačev, radoi vn 2021 redukuhusai.

Eläjad

Eläjiden lugu

Voz'	1959	1970	1979	1989	2002	2010	2017	2021
Ristitišt, tuh. eläjid	115,6	106,0	105,1	107,9	86,5	76,6	71,8	66,6

Vn 2021 Venäman rahvahanlugemižen mödhe lidnan eläjiden lugu oli 66 583 ristitud. Kaikiš suremb lidnan ristitišt oli 120 tuhad eläjid vl 1962. Lidnümbrikon ristitišt oli 82 497 eläjad vl 2010 i 77 666 eläjad vl 2017.

Ortodoksižen hristanuskondan nell' jumalanpertid oma saudud lidnas. Islaman «Nur»-pühäpert' om avaitud.

Lapsiden opendusen aluzkundad oma päivkodid, keskškolad. Professionaližen opendusen aluzkundad oma politehnine kolledž (mülütihe sihe lidnan kaivuztehnikumad vl 2021), pedagogine kolledž, Kuzbassan medicinižen kolledžan filial.

Galerei

• 
  Lidnan administracijan sauvuz (2013)
• 
  Vägestusen puišt i muštnik pölištunuzile sodamehile Suren sodan aigan (2018)
• 
  Gimnazii nomer 11 (2018, škol om saudud N.K. Krupskajan iniciativan mödhe)

Irdkosketused

• Anžero-Sudženskan lidnümbrikon tobmuden sait (anzhero.ru). (ven.)
• Anžero-Sudžensk mojgorod.ru-saital. (ven.)
• Anžero-Sudženskan uzištused — lidnan informacine sait (riopress.ru). (ven.)