Topki

Topki
Топки

Lidnanznam
Valdkund	Venäma
Eläjiden lugu (2025)	26,648 ristitud
Pind	51,72 km²
Pämez'	Dmitrii Pak (tal'vku 2016—)
Telefonkod	+7−38 454-xx-xxx
Avtokod	42, 142
Aigvö	UTC+7 (MSK+4)

Topki (ven.: Топки́) om Venäman lidn, lidnankund da transporttesol'm Kemerovon agjan lodehes. Se om Topkin ümbrikon (edel vn 2019 heinkud — rajonan) administrativine keskuz. Mülütihe rajonha vl 2005.

Istorii

Eländpunktan aluz om pandud vl 1914 raudtestancijaks «Transsib — Ščeglovo»-jonol. Vspäi 1917 puruvedimiden depo radoi, NSTÜ:n parahim 1930-nzil vozil. Kätihe radnikžiloks vl 1929. Se sai lidnan statusad vn 1933 10. päiväl sulakud. Järed cementtegim om saudud vll 1953−1966, radab sijaližel torhudel.

Topki šingotase cementantegimel, raudten edheotandoil i sömtegimištol (kiruhsöndan «Podorožnik»-verkon tehmine). Om raudtesol'meks Transsiban, Kemerovon i Novokuzneckan čuradusihe.

Geografijan andmused

Topkin ümbrikon sijaduz agjas vn 2015 kartal

Lidn sijadase ümbrikon päivnouzmas, 230..310 m ü.m.t. korktusil. Tahond om sokaz päivlaskmha lidnaspäi.

Matkad Kemerovohosai om kaks'kümne kilometrad päivlaskmha orhal, avtol vai raudtedme, se om lähembaine lidn. Ratas mouckiven löudmižsijad seičemes kilometras lodeheze. «Sibir'»-avtote (R-255) ümbärdab lidnad pohjoižpäivnouzmaižes poles.

Topki om lidnankundan üks'jäižeks eländpunktaks.

Eläjad

Vn 2010 Venäman rahvahanlugemižen mödhe lidnan eläjiden lugu oli 28 641 ristitud, rajonan kaks' koumandest, vn 2021 — 27 158 ristitud. Kaik 27 963 eläjad oli lidnas vl 2017. Kaikiš suremb lidnan ristitišt oli 34 100 eläjad vl 1992.

Ortodoksižen hristanuskondan kaks' jumalanpertid oma sätud lidnas: ph. Sergii Radonežalaižen pühäpert' (om saudud vll 1994−2006) i ph. Mikulai-čudonsädajan jumalanpert' (om saudud vl 1972, eile rados).

Lapsiden opendusen aluzkundad oma päivkodid, viž keskškolad (nomer 1, 2, 4, 6, 8), lapsiden da norišton sädamižen pert'kulu, čomamahtoiden škol nomer 5, čomamahtoine škol nomer 17, lidnan lapsiden da norišton sportškol. Topkin tehnine tehnikum om lidnan professionaližen opendusen aluzkundaks.

Galerei

• 
  Administrativine sauvuz läz päraudtestancijad (2012)
• 
  Muštpacaz pölištunuzile Suren sodan aigan, 2000-nziden voziden nägu
• 
  Topkin cementantegim vl 2014
• 
  Puruvedim muštnikaks vagzalan torgul (2011)
• 
  Topki-päraudtestancijan sauvused vl 2014

Irdkosketused

• Topkin municipaližen ümbrikon oficialine sait (admtmo.ru). (ven.)
• Lidnankundan tobmuden aluzkundoiden vanh sait (e-topki.ru voziden 2006−2019 arhivanke). (ven.)