Kiselövsk

Kiselövsk
Киселёвск

Lidnanznam	Flag
Valdkund	Venäma
Eläjiden lugu (2025)	80,115 ristitud
Pind	160 km²
Pämez'	Kirill Balaganskii (uhoku 2022—, velgusentäutai)
Telefonkod	+7−38 464-xx-xxx
Avtokod	42, 142
Aigvö	UTC+7 (MSK+4)

Kiselövsk (ven.: Киселёвск) om Venäman lidn Kemerovon agjan suvipäivlaskmas. Se om agjan kudenz' lidn eläjiden lugun mödhe, Kiselövskan lidnümbrikon administrativine keskuz (vspäi 2005).

Istorii

Ende türkad-teleutad elihe lidnan sijas. Läz 1770. vot sirdnikad Keskuzvenämaspäi paniba Afonino-, Čerkasovo- i Kiselövk-küliden alusid. Vn 1917 redukus zavottihe sada kivihil't Kiselövkan kaivudespäi. Vl 1932 žilo kaivudenno sai radnikžilon statusad Kiselövskii nimenke, sil-žo vodel ühtištadihe lähižidenke külidenke. Kätihe radnikžilod lidnaks agjan alištusenke vn 1936 20. päiväl vilukud.

Kiselövsk šingotase kivihilen samižel (nell' kar'jerad) i kahtel küllästamižfabrikal, kaivuzmašiništon tegimel, sömtegimištol (konditerine edheotand, maidtegim, kolbasan pästand), mugažo poukahtuzsubstancijoiden tegim, mebel'fabrik i Afoninon savičuntegim ratas.

Geografijan andmused

Kiselövskan lidnümbrikon sijaduz agjas vn 2015 kartal

Lidn sijadase Abanjogen (ven.: Аба́, 71 km pitte) üläjoksmusen randal (Tomin hura ližajogi, lankteb Novokuzneckas), 320 m ü.m.t. keskmäižel korktusel, Salairan kräžan ezimägištol. Ottas vet Üläčumišan vezivaradimespäi vižtoštkümnes kilometras suvipäivlaskmha lidnaspäi.

Matkad Kemerovohosai om 154 km pohjoižhe orhal, 176 km avtol vai raudtedme. Lähembaine lidn om Prokopjevsk ani suvhe, kundaližen transportan maršrutad oma ühthižed kahtes lidnas. Molembad lidnad mülüdas Novokuzneckan lidnaglomeracijha (1,15 mln rist. vl 2010).

Tobmuz

Kaik koume žilod i kaks' küläd mülüdas lidnümbrikho Kiselövskan ližaks. Lidnümbrikon pind — 292,85 km². Lidnümbrik röunatab Prokopjevskan lidnümbrikonke suves, Prokopjevskan rajonanke päivnouzmas i päivlaskmas, Belovon rajonanke pohjoižes.

Edeližed lidnümbrikon pämehed: Sergei Lavrentjev (keväz'ku 2003 — kül'mku 2018), Maksim Škarabeinikov (viluku 2019 — kül'mku 2021).

Eläjad

Vn 2010 Venäman rahvahanlugemižen mödhe lidnan eläjiden lugu oli 98 365 ristitud, lidnümbrikon — 103 019 ristitud, vn 2021 lidnan — 83 431 ristitud. Vl 2017 kaik 90 980 ristitud elihe lidnas i 96 237 ristitud kaikes lidnümbrikos. Kaikiš suremb lidnan ristitišt oli 142 tuh. eläjid vl 1962.

Ortodoksižen hristanuskondan viž pühäpertid oma kaičenus i saudud lidnas: nell' jumalanpertid i časoun'. Katoline tulend om olmas. Severz'-se protestantizman pühäpertid om sätud (baptizman loičendpert', vižkümnenden päivän jumalanpert'). Islaman pühäpert' om avaitud vspäi 2004. Buddizman uskojiden kund om registriruidud.

Openduz

Lapsiden opendusen aluzkundad oma 36 päivkodid, seičeme aluzškolad (nomer 3, 15, 16, 23, 24, 33, 35), kahesa keskškolad (nomer 5, 11, 14, 25, 27, 28, 30, 31), licei nomer 1, lapsiden sädamižen pert', lapsiden sädamižen keskuz, lapsiden da norišton sädamižen šingotesen keskuz, kaks' muzikškolad (nomer 16 i 17), čomamahtoiden škol nomer 66, lapsiden da norišton sportškol (kahesa openduzkeskust).

Professionaližen opendusen aluzkundad: Kiselövskan kaivuztehnikum, transportiž-tehnologine tehnikum (Kiselövskan politehnine tehnikum ende, udesnimitihe vn 2025 sulakus), pedagogine kolledž.

Galerei

• 
  Lidnümbrikon administracijan sauvuz (2014)
• 
  Lidnan valdkundaline äifunkcionaline keskuz (2014)
• 
  Jumalanmaman «Pigaikundlii»-jumalaižen pühäpert', vn 2004 nägu
• 
  Hilen samižen kaivuz vl 2010
• 
  Torgusen sauvuz vl 2014
• 
  Üks' lidnan školoišpäi, 1. sügüz'ku 2015
• 
  Lapsiden sädamižen keskuz (2014)
• 
  «Šahtör»-sportkompleks lidnan keskuzpalas (2006, Kaivai)
• 
  Avtobusstancii vl 2014
• 
  Kiselövsk-päraudtestancijan sauvuz vl 2015

Irdkosketused

• Kiselövskan lidnümbrikon Rahvahandeputatoiden nevondkundan sait (42ks.ru). (ven.)
• Kiselövskan lidnümbrikon Administracijan oficialine sait (shahter.ru). (ven.)