Leninsk Kuzneckii

Leninsk Kuzneckii
Ленинск-Кузнецкий

Lidnanznam	Flag
Valdkund	Venäma
Eläjiden lugu (2025)	88,171 ristitud
Pämez'	Konstantin Tihonov (heinku 2018—)
Telefonkod	+7−38 456-xx-xxx
Avtokod	42, 142
Aigvö	UTC+7 (MSK+4)

Leninsk Kuzneckii (ven.: Ле́нинск-Кузне́цкий) om Venäman lidn Kemerovon agjan keskuzpalan päivlaskmas. Se om agjan nellänz'-videnz' lidn eläjiden lugun mödhe kuti Meždurečensk-ki, Leninsk Kuzneckijan lidnümbrikon administrativine keskuz, mugažo om Leninsk Kuzneckijan rajonan administrativižeks keskuseks (ei mülü sihe).

Istorii

Eländpunkt mainitase ezmäižen kerdan vl 1759 kuti Kol'čugino-parččom (ven.: заимка Кольчугино) alusenpanijan radmižen mödhe (ven.: кольчуга «renghištpaid»). Vl 1883 avaitihe ezmäšt «Satuz»-kaivut (ven. Успех) Kol'čuginonno, i järgeline külä kändase kivihilen samižen keskuseks. Vl 1914 raudte tuli lidnha. Vll 1922−1925 nimitihe Lenino-žiloks. Vn 1925 6. päiväl kezakud žilo sai lidnan statusad Leninsk Kuzneckii nimenke erištamha Leninsk Omskii-lidnaspäi, vides vodes ühtištuihe jäl'gmäšt Omskanke.

Mülütihe Polisajevo- i Krasnogorskii-žiloid Leninsk Kuzneckijha vl 1987. Vl 1989 tühjitihe lidnan jagandad kahteks rajonaks i erigoittihe Polisajevod, anttihe sille lidnan statusad. Vodele 2008 saihe 1 mlrd tonnoid kivihil't.

Leninsk Kuzneckii šingotase kivihilen samižel (koume kaivut, enamba 10 mln tonnoid vodes), himižel sarakol (koksan tehmine, materialad), metalližiden tegesiden edheotandoil, sömtegimištol, omblendedheotandoil (sobad i kengäd), mugažo mecanümbriradmižen edheotand i sauvondmaterialiden tegim ratas.

Geografijan andmused

Leninsk Kuzneckijan lidnümbrikon sijaduz agjas vn 2022 kartal

Lidn sijadase Inänjogen (ven.: Иня́) oiktal randal, Kuzneckan katl'usen keskuses, 230 m ü.m.t. keskmäižel korktusel.

Matkad Kemerovohosai om seičemekümne seičeme kilometrad pohjoižhe orhal, 90 km avtol vai raudtedme. Lähembaine lidn om Polisajevo ani suvipäivnouzmha, kundaližen transportan maršrutad oma ühthižed kahtes lidnas.

Nikitinskii-žilo (2 257 rist. vl 2010) i Industrii-žilo raudtestancijanno (15 rist. vl 2010) mülüdas lidnümbrikho Leninsk Kuzneckijan ližaks. Lidnümbrikon pind — 112,72 km².

Eläjad

Vn 2010 Venäman rahvahanlugemižen mödhe lidnan eläjiden lugu oli 101 666 ristitud, lidnümbrikon — 103 938 ristitud, vn 2021 lidnan — 92 244 ristitud. Vl 2017 kaik 96 921 ristitud elihe lidnas i 99 037 ristitud kaikes lidnümbrikos. Kaikiš suremb lidnan ristitišt oli 135 tuh. eläjid vl 1986 i 169 tuh. eläjid vl 1987 (Polisajevo-lidnanke).

Ortodoksižen hristanuskondan nell'toštkümne pühäpertid oma saudud lidnas vspäi 1987: üks'toštkümne jumalanpertid (kaks' oma jumalankodiš: Jumalanmaman Iveran jumalaižen mez'jumalankodi, ph. Serafiman da Jumalanmaman Katken naižjumalankodi) i koume časounäd. Baptizman loičendpert' om avaitud. Riman katoline tulend, vižkümnenden päivän, islaman i buddizman uskojiden kundad oma sätud.

Openduz

Lapsiden opendusen aluzkundad oma koumekümne päivkodid, aluzškolad, keskškolad, kaks' gimnazijad (nomer 12 i 18), licei nomer 4, koume ehtškolad (nomer 1, 3, 7), korrekcine škol nomer 6, kaks' armotomiden lapsiden kodid, lapsiden i openujan norišton sädamižen pert'kulu, ližaopendusen keskuz, muzikškol nomer 12, čomamahtoine škol nomer 4, čomamahtoiden škol nomer 18, sportivine škol-internat, olimpižen varan sportškol gimnastikas I.I. Mametjevan nimed, lapsiden da norišton sportškol nomer 4.

Professionaližen opendusen aluzkundad: Leninsk Kuzneckijan kaivuztehnine tehnikum, politehnine tehnikum, Kemerovon agjan medicinižen kolledžan filial, Kemerovon professionaliž-tehnižen kolledžan filial, Tomskan valdkundaližen arhitekturan da sauvondan universitetan filial.

Galerei

• 
  Agjan klinine keskuz kaivajiden tervhuden kaičendas (2016)
• 
  Monument Kol'čuginon kaivuden milliardandele hilen tonnale (2013)
• 
  Fontan i ortodoksižen hristanuskondan pühäpert' Rubanan kaivuden rajonas, vn 2015 nägu
• 
  Lapsiden čomamahtoine škol nomer 4 (2017, ende «Leninskugol'»-trestan sauvuz, om letud vl 1913)
• 
  Leninsk Kuzneckijan kaivuztehnine tehnikum (2013, ende kolledž)
• 
  Kul'turkeskuz E. Jaroslavskijan nimed (2013)
• 
  «Pobeda»-bobuštuzkeskuz (2012, Vägestuz)
• 
  Sportgimnastikan pert'kulu (2013)
• 
  Avtobusstancii vl 2013
• 
  Leninsk Kuzneckii I-päraudtestancijan sauvuz vl 2017

Irdkosketused

• Leninsk-Kuzneckijan municipaližen ümbrikon tobmuden sait (leninsk.kemobl.ru). (ven.)