Osinniki

Osinniki
Осинники

Lidnanznam	Flag
Valdkund	Venäma
Eläjiden lugu (2025)	38,740 ristitud
Pind	71,36 km²
Pämez'	Igor' Romanov (kezaku 2012—, Игорь Романов)
Telefonkod	+7−38 471-xx-xxx
Avtokod	42, 142
Aigvö	UTC+7 (MSK+4)

Lidnan tramvaiteiden kart (2014)

Osinniki (ven.: Осинники «habikod», šorijan kel': Тағдағаал) om Venäman lidn Kemerovon agjan suves. Se om Osinnikin lidnümbrikon (vspäi 2005) administrativine keskuz da päpala.

Istorii

Osinniki mainitasoiš ezmäižen kerdan Tomskan gubernijan elänzoittud tahoiden nimikirjuteses vl 1859 320 eläjanke, i ezmäižed kaivuded oliba tehtud 19. voz'sadal.

Nügüdläižen eländpunktan aluz om pandud vl 1926 kuti Osinovk-radnikžilo (ven.: Осиновка) šorijalaižiden Osinniki-ulusan sijas. Radnikžilo sai lidnan statusad vn 1938 4. päiväl tal'vkud nügüdläiženke nimenke. Oli Osinnikin rajonan administrativižeks keskuseks vll 1961−1963 i 1987−1989 (konz rajon-ki oli).

Osinniki šingotase kivihilen samižel («Osinnikovskai»-kaivuz), meblin tehmižel i pilindmaterialoiden edheotandal, kohenduzmehanižel tegimel i pälembaižen soban omblendfabrikal, sömtegimištol (leibtegim, vintegim, südäiveded), mugažo maižanduztorhuden ümbriradmižen ceh radab.

Geografijan andmused

Osinnikin lidnümbrikon sijaduz agjas vn 2022 kartal

Lidn sijadase Kondomanjogen oiktal randal (ven.: Ко́ндома, šorijan kel': Қондум 392 km pitte, Tomin hura ližajogi), 230 m ü.m.t. keskmäižel korktusel. Kandalep-jogeihut (ven.: Кандалеп kümnen kilometrad pitte) läbitab lidnad i lankteb Kondomha oiktalpäi. Lidn om ümbärtud Novokuzneckan rajonan territorijal läz kaikiš polišpäi, röunatab Kaltanan lidnümbrikonke suvipäivlaskmas.

Matkad Kemerovohosai om 210 km pohjoižhe-lodeheze orhal, 247 km avtol vai raudtedme. Osinniki mülüb Novokuzneckan lidnaglomeracijha (1,15 mln rist. vl 2010) i om ümbärtud Novokuzneckan rajonal. Lähembaižed lidnad oma Novokuzneck 10 km lodeheze röunhasai i Kaltan kümnes kilometras suvipäivlaskmha.

Tobmuz

Taižin-žilo (ven.: Тайжина, 4 812 rist. vl 2017) mülüb lidnümbrikho Osinnikin ližaks, edel 2011. vot toižed žilod mülüiba. Lidnümbrikon pind — 71,36 km².

Lidnümbrikon Nevondkundan ezimez' om Natal'ja Kovalenko vn 2018 sügüz'kuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 46 001 ristitud, lidnümbrikon — 60 918 ristitud, vn 2021 — 40 367 ristitud. Vl 2017 kaik 43 008 ristitud elihe lidnas i 47 820 ristitud kaikes lidnümbrikos. Kaikiš suremb lidnan ristitišt oli 71 tuhad eläjad vl 1962.

Ortodoksižen hristanuskondan kaks' jumalanpertid oma avaitud lidnas: Eläban Eziauguižen Stroican (letihe vll 2004−2008) i Illä-endustajan (om saudud vll 1971−1974 vajehtamha loičendpertid). Islamanuskojiden kund om registriruidud mugažo.

Openduz

Lapsiden opendusen aluzkundad oma päivkodid, seičeme keskopendusen školad (nomer 3, 16, 21, 31, 33, 35, 36), lapsiden sädamižen pert', muzikškol nomer 20, čomamahtoine škol nomer 18, kaks' čomamahtoiden školad (nomer 33 i 57), lapsiden da norišton boksan sportškol V.H. Tarašan nimed.

Osinnikin politehnine tehnikum i kaivuztehnine kolledž oma lidnan professionaližen opendusen aluzkundoikš.

Transport

Avtobusad, maršruttaksid i tramvaid oma kundaližeks transportaks lidnas.

Osinniki-raudtestancii (ende Kandalep jogen mödhe) i 405. km-platform oma saudud «Novokuzneck — Taštagol»-raudtekeskustal.

Galerei

• 
  LM99K-serijan tramvai jonol (2011)
• 
  Purde hobedan mülündanke (2014)
• 
  Tramvaidepo vl 2011
• 
  Kondomanjogi läz Osinnikid (2011)

Irdkosketused

• Lidnan tobmuden aluzkundoiden oficialine sait (osinniki.org). (ven.)
• Lidnan kodirandantedištandmuzejan sait (osinniki-muzei.kmr.muzkult.ru). (ven.)