Berözovskii (Kemerovon agj)

Berözovskii
Берёзовский

Lidnanznam	Flag
Valdkund	Venäma
Eläjiden lugu (2025)	43,254 ristitud
Pind	74,6 km²
Pämez'	Jevgenii Kurapov (kezaku 2024—)
Telefonkod	+7−38 445-xx-xxx
Avtokod	42, 142
Aigvö	UTC+7 (MSK+4)

Sil sanal voib olda toižid znamoičendoid; miše nähta niid, tulgat tänna.

Berözovskii (ven.: Берёзовский) om Venäman lidn Kemerovon agjan pohjoižes. Se om Kemerovon pohjoine ezilidn, Berözovskijan lidnümbrikon administrativine keskuz.

Istorii

Eländpunktan aluz om pandud vn 1965 11. päiväl vilukud Kurganovk-, Berözovskii- i Oktäbr'skii-žiloiden ühtištusel, mugažo mülütihe severt-se lähižid külid. Lidnümbrik om olmas vspäi 2005.

Lidn om agjan kivihilen samižen znamasižeks keskuseks. Om kuldan, raudtekivendon, mramoran löudmižsijid lidnanno, no ned seištas radmata. Berözovskii ühtenzoitase Kemerovonke avtotel i avtobusoil, lidnalaižed ajeltas sihesai, miše rata.

Geografijan andmused

Berözovskijan lidnümbrikon sijaduz agjas vn 2015 kartal

Lidn sijadase Barzas- i Šurap-jogiden randal (Tomin oigedpol'ne bassein), 230 m ü.m.t. keskmäižel korktusel. Taigmec ümbärdab lidnad. Lidn alištadud žiloidenke om ümbärtud Kemerovon ümbrikon territorijal kaikiš polišpäi.

Matkad Kemerovon röunhasai om kaks' kilometrad suvhe orhal, avtotedme vai raudtedme, keskuzpalhasai — 27 km.

Tobmuz

Barzas-žilo (2 111 rist. vl 2010) i Stancionnii-žilo (120 rist. vl 2010) mülüdas lidnümbrikho Berözovskijan ližaks. Lidnümbrikon pind — 82,01 km².

Lidnümbrikon tobmuden pämez' om sen Administracijan pämez'. Edeližed lidnümbrikon pämehed oma Svetlana Ščegerbaeva (uhoku 2019 — semendku 2024), Dmitrii Titov (keväz'ku 2013 — viluku 2019). Lidnümbrikon Rahvahandeputatoiden nevondkundan ezimez' om Sergei Čurin vn 2023 redukuspäi. Edeline nevondkundan ezimez' om Aleksandr Koptelov (uhoku 2016 — reduku 2023).

Eläjad

Vn 2010 Venäman rahvahanlugemižen mödhe lidnan eläjiden lugu oli 47 279 ristitud, lidnümbrikon — 49 510 ristitud. Vn 2021 rahvahanlugemižen mödhe lidnan ristitišt oli 44 073 eläjad. Vl 2017 kaik 46 859 ristitud elihe lidnas i 48 944 ristitud kaikes lidnümbrikos. Kaikiš suremb lidnan ristitišt oli enamba 51 tuhad eläjid vll 1987−1998 (52 tuh. rist. vl 1992).

Ortodoksižen hristanuskondan ph. Ioann Kronštadtalaižen jumalanpert' om saudud vll 2000−2009.

Lapsiden opendusen aluzkundad oma koumetoštkümne nimitadud i nomeruidud päivkodid (nomer 1, 3, 9, 10, 12, 14..16, 18, 20, 21, 23, 36), kaks' aluzškolad (nomer 4 i 8), koume keskškolad (nomer 1, 2, 16), kaks' liceid (nomer 15 i 17), lapsiden da norišton sädamižen šingotesen keskuz, čomamahtoiden škol (nomer 14, ende muzikškol nomer 91), lapsiden da norišton kompleksine sportškol A. Bessmertnih nimed. Berözovskijan politehnine tehnikum (ende politehnine škol, profškol nomer 18) om lidnan professionaližen opendusen aluzkundaks.

Irdkosketused

• Lidnümbrikon Rahvahan ezitajiden nevondkundan oficialine sait (bergorsovet.ru). (ven.)
• Lidnümbrikon Administracijan oficialine sait (berez.org). (ven.)