Polisajevo

Polisajevo
Полысаево

Lidnanznam	Flag
Valdkund	Venäma
Eläjiden lugu (2025)	25,177 ristitud
Pind	49,29 km²
Pämez'	Valerii Zikov (1994—)
Telefonkod	+7−38 456-xx-xxx
Avtokod	42, 142
Aigvö	UTC+7 (MSK+4)

Polisajevo (ven.: Полыса́ево) om Venäman lidn Kemerovon agjan keskuzpalan päivlaskmas. Se om Leninsk-Kuzneckijan ümbrikon palaks vspäi 2024, vll 1999−2024 oli erigoittud Polisajevon lidnümbrikon administrativžeks keskuseks da päpalaks.

Istorii

Eländpunkt mainitase ezmäižen kerdan vl 1940 kuti žilo udenno «Polisajevskai»-kaivudenno. Kätihe sidä Polisajevo-radnikžiloks vl 1952. Mülütihe Polisajevo- i Krasnogorskii-žiloid Leninsk Kuzneckijha vl 1987. Vn 1989 30. päiväl redukud erigoittihe Polisajevod i anttihe sile lidnan statusad.

Polisajevo šingotase kivihilen samižel (koume kaivut i kaks' küllästamižfabrikad), sauvondmaterialiden pästandal (raudbetontegim, plastikiknoiden fabrik, uksiden edheotand).

Geografijan andmused

Polisajevon lidnümbrikon sijaduz agjas vn 2022 kartal

Lidn sijadase Inänjogen (ven.: Иня́) oiktal randal, Kuzneckan katl'usen keskuses, 250 m ü.m.t. keskmäižel korktusel.

Matkad Kemerovohosai om kahesakümne viž kilometrad pohjoižhe orhal, 96 km avtol vai raudtedme. Lähembaižed lidnad oma Leninsk Kuzneckii ani lodeheze, kundaližen transportan maršrutad oma ühthižed kahtes lidnas, i Belovo 25 km suvhe. Lidn om ümbärtud Belovon ümbrikon (päivnouzmas, suves i suvipäivlaskmas) i Leninsk Kuzneckijan rajonan (päivlaskmas i pohjoižes) territorijoil toižiš polišpäi.

Tobmuz

Krasnogorskii-žilo (2 965 rist. vl 2010) i Kaivuden nomer viž žilo (82 rist. vl 2010) mülüiba lidnümbrikho Polisajevon ližaks. Lidnümbrikon pind oli 49,29 km².

Vspäi 2024 lidnümbrikon erigoittud tobmuz om likvidacijan pordhal. Polisajevon territorialine ohjanduz om sätud Leninsk-Kuzneckijan ümbrikos.

Eläjad

Vn 2010 Venäman rahvahanlugemižen mödhe lidnan eläjiden lugu oli 27 624 ristitud, lidnümbrikon — 30 671 ristitud. Vn 2021 rahvahanlugemižen mödhe lidnan ristitišt oli 25 631 eläjad. Vl 2017 kaik 26 510 ristitud elihe lidnas i 29 466 ristitud kaikes lidnümbrikos. Kaikiš suremb lidnan ristitišt oli 32 400 eläjid vl 2001.

Ortodoksižen hristanuskondan nell' jumalanpertid oma sätud lidnümbrikos 1990-nziš vozišpäi: ph. Serafim Sarovalaižen, ph. Mikulai-čudonsädajan i phh. Petran da Fevronijan Muromalaižiden — lidnas, sur' Pühän Jumalanmaman Katken jumalanpert' om Krasnogorskii-žilos (letihe vll 2020−2023). Protestantizman kaks' loičendpertid (baptizm i evangeližen uskondan hristanuskojad) oma saudud lidnas.

Lapsiden opendusen aluzkundad oma kümne päivkodid (nomer 1, 2, 3, 19, 26, 27, 35, 47, 50, 52), viž aluzškolad (nomerad 14, 17, 32, 35, 44), licei, keskškol-internat (nomer 23), čomamahtoiden škol (nomer 54), sportškol. Polisajevon industrialine tehnikum om lidnan professionaližen opendusen aluzkundaks.

Irdkosketused

• Lidnümbrikon tobmuden sait (leninsk.kemobl.ru). (ven.)
• Lidnan kodirandantedištandan sait (kraevedpol.ru). (ven.)