Belovo

Belovo
Белово

Lidnanznam	Flag
Valdkund	Venäma
Eläjiden lugu (2021)	70,611 ristitud
Pämez'	Aleksei Kurnosov (uhoku 2014—)
Telefonkod	+7−38 452-xx-xxx
Avtokod	42, 142
Aigvö	UTC+7 (MSK+4)

Belovo (ven.: Бело́во) om Venäman lidn Kemerovon agjan keskuzpalan päivlaskmas. Se om agjan kahesanz' lidn eläjiden lugun mödhe, Belovon lidnümbrikon administrativine keskuz.

Istorii

Eländpunktan aluz om pandud pagenuden Fedor Belov-manmehen parččomaks vl 1726, nimitihe hänen kanzannimen mödhe. Löuzihe kivihil't, zavottihe sen samišt vl 1851 läz küläd, se oli ezmäine Kuzbassan kaivuz. Vl 1921 saudihe raudted külänno, i se šingotaškanzi. Vn 1938 4. päiväl tal'vkud Belovo-radnikžilo sai lidnan statusad.

Belovo om agjan hilen samižen nellänz' surtte keskuz (koume kaivut i kaks' kar'jerad), mugažo sadas šebinäd. Raudbetonan tegim radab.

Geografijan andmused

Lidn sijadase Kuzneckan katl'uses, Bačat-jogen hural randal tobjimalaz (Ob'-jogen oigedpol'ne bassein), 220 m ü.m.t. keskmäižel korktusel. Matkad Kemerovohosai om 105 kilometrad pohjoižhe orhal, 122 km avtotedme vai raudtedme. Lähembaižed lidnad oma Gur'jevsk 30 km suvipäivlaskmha, Leninsk Kuzneckii 35 km pohjoižhe i Polisajevo 25 km pohjoižhe.

Kuz' eländpunktad mülüdas lidnümbrikho, sidä kesken nell' järedad lidnanvuittušt žilod. Lidnümbrikon pind om 219,34 km².

Eläjad

Vn 2010 Venäman rahvahanlugemižen mödhe lidnan eläjiden lugu oli 76 764 ristitud, lidnümbrikon koume videndest. Kaikiš suremb lidnan ristitišt oli 118 tuhad eläjid vozil 1962 i 1987.

Ortodoksižen hristanuskondan seičeme jumalanpertid i časoun' oma olmas lidnas.

Professionaližen opendusen aluzkundad: Belovon pedagogine i politehnine kolledžad, Kemerovon agjan medicinižen kolledžan filial, Kuzbassan äiprofil'ne tehnikum (ende Belovon raudtetransportan tehnikum), üläopendusen aluzkundoiden nell' filialad (Kemerovo, Novosibirsk, Tomsk).

Galerei

• 

  Lidnümbrikon Administracijan sauvuz (2011)

• 

  Jumalanmaman Katken časoun', vn 2011 nägu

• 

  Sportan pert' (2012)

• 

  Lidnan kul'turkeskuz (2011)

• 

  Belovo-raudtestancii vl 2007

Irdkosketused

• Lidnümbrikon Duman oficialine sait (bgsnd.ru). (ven.)
• Lidnümbrikon Administracijan oficialine sait (belovo42.ru). (ven.)