Borisoglebsk

Borisoglebsk
Борисоглебск

Lidnanznam	Flag
Valdkund	Venäma
Eläjiden lugu (2021)	60,687 ristitud
Pind	55,26 km²
Pämez'	Jelena Agajeva (reduku 2016—)
Telefonkod	+7−47 354-xx-xxx
Avtokod	36, 136
Aigvö	UTC+3 (MSK+0)

Sil sanal voib olda toižid znamoičendoid; miše nähta niid, tulgat tänna.

Borisoglebsk (ven.: Борисогле́бск) om Venäman lidn da transporttesol'm Voronežan agjan pohjoižpäivnouzmaižes čogas. Se om agjan koumanz' lidn eläjiden lugun mödhe, Borisoglebskan lidnümbrikon administrativine keskuz.

Istorii

Eländpunktan aluz om pandud vl 1698 (vai vl 1646 erasiden purtkiden mödhe) kuti Novopavlovsk (Pavlovsk) kaičemha tahondad kalaidajiden heimoiden londoišpäi. Vspäi 1704 om nügüdläiženke nimenke, šingotihe pumaterialan depoks Venäman laivišton sauvomižen täht Petr I carindan aigan, sid' nižun kazvatandal i jogivaldmoil. Sai makundan lidnan statusad vl 1779. Rahvahanikoiden sodan aigan Borisoglebsk oli toran objektaks. Vl 2008 ühtenzoittihe lidnad rajonanke, kätihe lidnümbrikoks.

Borisoglebsk šingotase mašinansauvomižen tegimil (himižen tegimišton täht, katil-mehanine, kivivoin da gazan samižen täht), ladimiden edheotandoil, sauvondmaterialiden pästandal (savič, gazuidud beton), sömtegimištol (amuine oludentegim, leibänproduktoiden kombinat, lihakonservkombinat), mugažo valamižtegim i pul'kiden edheotand ratas lidnas.

Geografijan andmused

Lidn sijadase lidnümbrikon päivlaskmaiženno röunanno, Hopr-jogen oiktal randpolel (ven.: Хопёр 979 km pitte, Don-jogen hura ližajogi) sen oiktan Voron-ližajogen (ven.: Ворона 454 km pitte) lanktendanno, Voronan hural randal, 100 m ü.m.t. keskmäižel korktusel. Matkad Voronežhasai om 200 km päivlaskmha orhal, 224 km avtotel vai 350 km raudtel. Lähembaine lidn om Povorino 22 km suvhe orhal, 39 km avtotedme vai 26 km raudtedme.

Borisoglebsk-raudtestancii radab lidnan suvipalas «Lipeck — Volgograd»-keskustal. Kaks' avtotekeskust ristikoitas kudes kilometras lodeheze lidnaspäi: «Voronež — Saratov» (läbitab lidnan pohjošt) i «Tambov — Volgograd». Borisoglebsk-sodalendimport sijadase nelläs kilometras päivnouzmha lidnaspäi.

Kaik 23 žilod i üks' külä mülüdas lidnümbrikho Borisoglebskan ližaks. Lidnümbrikon pind — 1371 km².

Eläjad

Vl 1939 lidnan ristitišt oli 52 900 eläjad. Vn 2010 Venäman rahvahanlugemižen mödhe lidnan eläjiden lugu oli 62 865 ristitud, lidnümbrikon — 78 721 ristitud. Kaik 62 669 ristitud elihe lidnas i 74 154 ristitud kaikes lidnümbrikos vl 2017. Kaikiš suremb lidnan ristitišt oli 67..72 tuhad eläjid vll 1973−1998 i 2002−2005 (72 338 rist. vl 1989).

Rahvahad (2010): venälaižed — 97,2 %, toižed rahvahad — 2,8 %.

Ortodoksižen hristanuskondan kahesa pühäpertid oma kaičenus i saudud lidnas: Jumalanmaman «Znam»-jumalaižen päjumalanpert' (1869) i seičeme jumalanpertid. Niiden ližaks Spasan Toižetamižen päjumalanpert', kaks' jumalanpertid i kaks' časounäd ei ole kaičenus.

Professionaližen opendusen aluzkundad oma Borisoglebskan kaks' kolledžad (medicinine, muzikaline) i nell' tehnikumad (teiden sauvondan, tehmišton i informacijan tehnologijoiden, maižandusen, tehnologiž-ekonomine), mugažo Voronežan, Krasnodaran i Moskvan üläopendusen aluzkundoiden nell' filialad.

Galerei

• 
  Lidnümbrikon ohjastusen pert' (2000)
• 
  Voronežan sauvonduniversitetan filial (2016, torgovanoiden sebran istorine pert')
• 
  Kuvagalerei, vn 2009 nägu

Irdkosketused

• Lidnankundan tobmuden aluzkundoiden sait (adminborisoglebsk.e-gov36.ru). (ven.)