Divnogorsk

Divnogorsk
Дивногорск
Lidnanznam;	Flag;
Valdkund	Venäma
Eläjiden lugu (2021)	27,477 ristitud
Pind	56,6 km²
Pämez'	Sergei Jegorov; (keväz'ku 2020—)
Telefonkod	+7−39 144-xx-xxx
Avtokod	24, 84, 88, 124
Aigvö	UTC+7 (MSK+4)

Divnogorsk (ven.: Дивного́рск) om Venäman lidn Krasnojarskan randan suves. Se om Krasnojarskan päivlaskmaine ezilidn, Divnogorskan lidnümbrikon administrativine keskuz da päpala. Om ümbärtud Berözovkan rajonan territorijal.

Istorii

Vozil 1888−1920 Znamenskii skit-mez'jumalankodi šingotihe nügüdläižen lidnan territorijal. Jogivaldmad Jenisein randal, savičun, tervanajandan i tohusiden tegimed oliba jumalankodinno. Jumalankodin sauptandan jäl'ghe armotomiden lapsiden kodi oli, vspäi 1930 — Krasnojarskan mectehnikuman abutarh.

Nügüd'aigaižen eländpunktan aluz om pandud vl 1956 kuti Skit-žilo sauvomha Krasnojarskan GES:ad. Udesnimitihe sidä Divnogorskaks vl 1957 Jenisein vastrandan mägiden nimen mödhe (ven.: Дивные горы «čudokahad mäged»). Radnikžilo sai lidnan statusad vl 1963. Vozil 1967−1971 pästtihe töhö GES:an kaikid 12 agregatoid. Vspäi 1970 päraudtestancii radab, se om raudtejonon Krasnojarskaspäi lopstancijaks.

Divnogorsk šingotase Krasnojarskan GES:al, raudbetontegesiden tegimel, Tehpolimer-edheotandal. Lidn om professionaližen keskopendusen keskuseks i om kurortaks, sidä kesken mägisuksiden.

Geografijan andmused

Lidn sijadase Jenisei-jogen oiktal randal, mödvedhe Krasnojarskan vezivaradimen padoseinälpäi, 260 m ü.m.t. keskmäižel korktusel.

Matkad Krasnojarskan röunhasai om kaks'kümne kilometrad päivnouzmha orhal vai «Jenisei»-avtotedme, raudtedme vai jogen mödvedhe.

Tobmuz

Ovsänk-žilo (vspäi 1671, 2228 rist. vl 2010, ven.: село Овсянка) i kuz' pen't žilod mülüdas lidnümbrikho Divnogorskan ližaks.

Edeline lidnan pämez' om Jegor Ol' (2010 — keväz'ku 2020).

Eläjad

Vn 2010 Venäman rahvahanlugemižen mödhe lidnan eläjiden lugu oli 28 292 ristitud, lidnümbrikon — 32 193 ristitud. Vl 2017 kaik 29 117 ristitud elihe lidnas i 33 292 ristitud kaikes lidnümbrikos. Kaikiš suremb lidnan ristitišt oli 34 300 eläjad vl 1996.

Ortodoksižen hristanuskondan viž jumalanpertid^[1] oma saudud lidnümbrikos, niiden kesken puine Jumalanmaman «Znam»-jumalaižen Divnogorskas (uz', om letud vodele 1995), kaks' Manskii-žilon skitas, üksin Ovsänkas i Ust'-Manas.

Openduz

Lapsiden opendusen aluzkundad oma kümne nimitadud i nomeruidud päivkodid (nomer 7, 9, 10, 12..15, 17, 18 i Ovsänk-žilon nomer 4), viž keskškolad (nomer 2, 4, 5, 9 i Ovsänk-žilon nomer 7), gimnazii nomer 10 A. Je. Bočkinan nimed, lapsiden sädamižen pert', čomamahtoiden škol, sportškol, lapsiden ekologiž-biologine stancii.

Professionaližen opendusen aluzkundad: medicinine^[2], gidroenergetine^[3] i mectehnologijoiden^[4] tehnikumad, olimpižen varan kolledž-internat^[5], kul'turan i mecsarakon radnikoiden kvalifikacijan ližadusen institutad.

Galerei

Škol nomer kümne (gimnazii, 2013)
Lava jaugnikoiden täht Jenisein randannoks, nägu vagzalaspäi vl 2008
Krasnojarskan GES:an padosein vl 2016
Jogivaldmad vl 2008
Divnogorsk-päraudtestancijan sauvuz vl 2010

Homaičendad

Irdkosketused

Lidnümbrikon tobmuden aluzkundoiden oficialine portal (divnogorsk.gosuslugi.ru). (ven.)

Divnogorsk Vikiaitas

	Krasnojarskan randan lidnad
	Ačinsk \| Artömovsk \| Bogotol \| Borodino \| Divnogorsk \| Dudink \| Igark \| Ilanskii \| Jeniseisk \| Kansk \| Kodinsk \| Krasnojarsk \| Lesosibirsk \| Minusinsk \| Nazarovo \| Noril'sk \| Sosnovoborsk \| Šaripovo \| Zaozörnii \| Zelenogorsk \| Železnogorsk \| Ujar \| Užur

[1] Divnogorskan lidnümbrikon pühäpertid sobory.ru-saital. (ven.)

[2] Divnogorskan medtehnikuman sait (divmt.ru). (ven.)

[3] Divnogorskan gidroenergetižen tehnikuman sait (divget.ru). (ven.)

[4] Divnogorskan mectehnologijoiden tehnikuman sait (divlt.ru). (ven.)

[5] Divnogorskan olimpižen varan kolledžan-internatan sait (duor.sibhost.ru). (ven.)

[1]

[2]

[3]

[4]

[5]