Železnogorsk (Krasnojarskan rand)

Železnogorsk
Железногорск
Lidnanznam;	Flag;
Valdkund	Venäma
Eläjiden lugu (2025)	80,081 ristitud
Pämez'	Dmitrii Černätin; (keväz'ku 2023—)
Telefonkod	+7−3919-xxx-xxx
Avtokod	24, 84, 88, 124
Aigvö	UTC+7 (MSK+4)

Sil sanal voib olda toižid znamoičendoid; miše nähta niid, tulgat tänna.

Železnogorsk (ven.: Железного́рск) om Venäman lidn Krasnojarskan randan suvipalan keskuses. Se om Železnogorskan lidnümbrikon (alištub randale) da SATÜ:n (alištub federacijan tobmudele) administrativine keskuz. Om ümbärtud Berözovkan rajonan territorijal.

Istorii

Eländpunktan aluz om pandud vl 1950 kuti Počtkonor' nomer 9 (ven.: Почтовый ящик №9) tegemha plutonijad azegišton täht. Sodamehed da türmatud ristitud sauvoihe sidä. Eländpunkt sai lidnan statusad vl 1954, udesnimitihe kahtenvuiččikš: Krasnojarsk:aks-26 oigendamha kirjeižid i nügüdläižikš tobmuden organoiden täht. Železnogorsk om oficialine nimituz vspäi 1994.

Železnogorskan ižandusen päsarakod oma uden südäitukuižen poltusen tehmine da vanhan ümbriradmine, Man kaimdajiden pästand^[1] (Venäman civiližiden kaimdajiden 70 %), sauvond, mugažo himine specialine tegim om saudud.

Geografijan andmused

Lidn sijadase ümbärdajan rajonan pohjoižpäivnouzmas, Jenisei-jogen oiktal randpolel, Sajaniden Ataman-sel'gan ezimägištol, 150 m ü.m.t. keskmäižel korktusel. Fartalad seištas peniden Gorodskoje- i More-järviden randoil.

Matkad Krasnojarskhasai om koumekümne viž kilometrad suvipäivlaskmha. Lähembaine lidn om Sosnovoborsk 15 km suvipäivlaskmha raudtel vai avtotel.

Tobmuz

Lidnanvuitte Podgornii-žilo (6541 rist. vl 2017), koume muite žilod (Dodonovo, Tartat, Uz' Te) da Šiver-külä (ven.: Шивера, 275 rist. vl 2010) mülüdas lidnümbrikho Železnogorskan ližaks. Lidnümbrikon pind — 456,67 km².

Lidnümbrikon tobmuden pämez' om sen Administracijan pämez'. Edeline SATÜ:n pämez' om Igor' Kuksin (tal'vku 2017 — keväz'ku 2023). SATÜ:n Deputatoiden nevondkundan ezimez' om Sergei Proskurnin vn 2020 redukuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 84 795 ristitud, lidnümbrikon — 93 841 ristitud, vn 2021 lidnan — 82 723 ristitud. Kaik 84 114 eläjad oli lidnas vl 2017. Kaikiš suremb lidnan ristitišt oli 97 500 eläjad vl 1992, lidnümbrikon — 102 620 eläjad vl 2002.

Ortodoksižen hristanuskondan kaks' pühäpertid^[2] oma avaitud lidnas: ph. Mikoi-arhangelan päjumalanpert' (om saudud vll 1990−2000) i Jumalanmaman Tihvinan jumalaižen časoun' (letihe vl 2017).

Openduz

Lapsiden opendusen aluzkundad oma koumekümne nell' päivkodid, ühesa keskškolad (nomer 90, 93, 95, 97, 98, 100, 101, 104, 106), kaks' gimnazijad (nomer 91 i 96), kaks' liceid (nomer 102 i 103), randan «Kosmonavtikan škol»-škol-internat rados lahjoitud lapsidenke, škol-internat, Železnogorskan kadetkorpus, lapsiden da norišton sädamižen pert'kulu, čomamahtoiden škol M. P. Musorgskijan nimed, čomamahtoine škol, koume sportškolad, lapsiden da norišton «Patriot»-keskuz, noriden tehnikanradajiden stancii, lapsiden ekologiž-biologine keskuz.

Innovacižiden tegimišttehnologijoiden da servisan tehnikum^[3], MIFI:n filial i Sibirin lämoipalopäzutandakademii^[4] (filialanke Krasnojarskas, Venäman ekstraordinarižiden situacijoiden ministruz) oma lidnan professionaližen opendusen aluzkundoikš.

Galerei

«Informacižed kaimdaisistemad M.F. Rešetnöv-akademikan nimed»-kompanijan päsauvuz vl 2006
Ph. Mikoi-arhangelan päjumalanpert', vn 2011 nägu
Kaivuzhimižen kombinatan päfater lidnas vl 2018
Kul'turkeskuz Leninan torgul (2011)
Železnogorskan avtobusstancii vl 2012

Homaičendad

Irdkosketused

Železnogorsk (Krasnojarskan rand) Vikiaitas

	Krasnojarskan randan lidnad
	Ačinsk \| Artömovsk \| Bogotol \| Borodino \| Divnogorsk \| Dudink \| Igark \| Ilanskii \| Jeniseisk \| Kansk \| Kodinsk \| Krasnojarsk \| Lesosibirsk \| Minusinsk \| Nazarovo \| Noril'sk \| Sosnovoborsk \| Šaripovo \| Zaozörnii \| Zelenogorsk \| Železnogorsk \| Ujar \| Užur

[1] «Informacižed kaimdaisistemad Mihail Rešetnöv-akademikan nimed»-kompanijan sait (iss-reshetnev.ru). (ven.)

[2] Železnogorskan pühäpertid sobory.ru-saital. (ven.)

[3] Innovacižiden tegimišttehnologijoiden da servisan tehnikuman sait (tiptis.ru). (ven.)

[4] Sibirin lämoipalopäzutandakademijan sait (sibpsa.ru). (ven.)

[1]

[2]

[3]

[4]