Ujar

Ujar
Уяр

Lidnanznam	Flag
Valdkund	Venäma
Eläjiden lugu (2021)	12,036 ristitud
Pind	27,7 km²
Pämez'	Aleksei Šeläkov (kezaku 2023—)
Telefonkod	+7−39 146-xx-xxx
Avtokod	24, 84, 88, 124
Aigvö	UTC+7 (MSK+4)

Ujar (ven.: Уяр) om Venäman lidn da lidnankund Krasnojarskan randan suvipäivnouzmas. Se om Ujaran rajonan administrativine keskuz da pala.

Enzne

Eländpunktan aluz om pandud vl 1760 kuti Ujar-külä. Vl 1934 ühtištadihe sidä lähiženke Klükvennai-raudtestancijanke da külänke (ven.: станция Клюквенная), nimitihe Ujar-radnikžiloks. Vl 1944 se sai lidnan statusad. Raudtestancii om udesnimitadud Ujar:aks vl 1973. Vn 2022 semendkus luja lämoipalo pani mantazole 201 pertid lidnas.

Ujar šingotase sömtegimišton edheotandoil (lihakombinat, leibtegim) i sauvondmaterialiden tegimil (raudbeton, asfal'tbeton, savič, keramiktegesed), mugažo kivivoinvalamižterminal radab lidnas. Kivivoinümbriradai tegim projektiruiše benzinan pästandan täht. Ende loštkiven fabrik i maidtegim radoiba mugažo.

Geografijan andmused

Ujaran rajonan sijaduz randas vn 2017 kartal

Lidn sijadase rajonan keskuzpalan suvipäivnouzmas, Ujark-jogen randal (ven.: Уярка, Jenisein oigedpol'ne bassein), Transsib-raudtel, 340 m ü.m.t. keskmäižel korktusel.

Matkad Krasnojarskhasai om ühesakümne viž kilometrad päivlaskmha orhal vai 115 km «Sibir'»-avtotedme. Ujar seižub nelläs kilometras suvhe avtotrassaspäi, ühtenzotase senke kahtel sarakol. Lähembaine lidn om Zaozörnii 40 km pohjoižpäivnouzmha raudtedme vai avtol.

Tobmuz

Ujar om lidnankundan üks'jäižeks eländpunktaks. Kaiken lidnankundan pind — 50,22 km².

Lidnankundan tobmuden pämez' om sen Administracijan pämez'. Edeližed lidnan pämehed oma Valerii Priščepko (semendku 2018 — kezaku 2023), Jurii Nikolajev (radoi edel vn 2018 keväz'kud). Lidnan Nevondkundan ezimez' om Viktor Stateinov vn 2023 kezakuspäi. Edeližed Nevondkundan ezimehed oma Aleksei Šeläkov (semendku 2018 — kezaku 2023), Valerii Priščepko (vn 2018 semendkuhusai).

Eläjad

Vn 2010 Venäman rahvahanlugemižen mödhe lidnan eläjiden lugu oli 12 665 ristitud, rajonan koume videndest, vn 2021 — 12 036 ristitud. Kaik 12 074 eläjad oli lidnas vl 2017. Kaikiš suremb lidnan ristitišt oli 21 646 eläjad vl 1959.

Ortodoksižen hristanuskondan Spasan Toižetamižen jumalanpert' om saudud lidnas vspäi 1874.

Openduz

Lapsiden opendusen aluzkundad oma kuz' nimitadud päivkodid, nell' keskškolad (nomer 2, 3, 4, 40), ližaopendusen «Pioner»-keskuz, «Junost'»-sportškol (Nor'aig).

Ujaran maižanduztehnikum om lidnan professionaližen opendusen aluzkundaks.

Galerei

• 
  Ujaran rajonan administracii (2010)
• 
  Spasan Toižetamižen jumalanpert', vn 2019 nägu
• 
  Ujar-päraudtestancijan sauvuz vl 2019

Irdkosketused

• Lidnankundan tobmuden aluzkundoiden oficialine sait (admuyar.gosuslugi.ru). (ven.)