Lesosibirsk

Lesosibirsk
Лесосибирск

Lidnanznam
Valdkund	Venäma
Eläjiden lugu (2017)	59 642 ristitud
Pämez'	Andrei Hohräkov (semendku 2010—)
Telefonkod	+7−39 145-xx-xxx
Avtokod	24, 84, 88, 124
Aigvö	UTC+7 (MSK+4)

Lesosibirsk (ven.: Лесосибирск) om Venäman lidn da lidnümbrik Krasnojarskan randan päivlaskmas.

Istorii

Ezmäine eländpunkt mainitase vl 1640 kuti Maklakov Lug-külä (ven.: деревня Маклаков Луг). 20. voz'sadan augotišel norvegine Jonas Lid-edheotai sauvoi mecan ümbriradajad kombinatad läz Maklakovod. Nevondkundaližen aigan saudihe kaks' mecanümbriradajad kombinatad da mecan varhapanendan järedad bazad samha materialoid angarižes pedajaspäi. Ühtenzoitihe Maklakovo- i Novomaklakovo-žiloid da anttihe lidnan statusad vl 1975 nügüdläiženke nimenke. Vl 1989 mülütihe Novojeniseisk-žilod lidnha.

Mectegimišton täuz' cikl om lidnas: mecan varhapanend i sauvondmaterialiden pästand (pilindmaterialad, fibroplitad), mechimijan kombinat, meblin tehmine. Vspäi 2011 uz' mecanpilindkompleks om sauvomas moderniziruimha tehmištod.

Geografijan andmused

Lidn sijadase pidust' Jenisein hurad randad 12-kilometrižel keskustal, 30 kilometras sen ühthejoksmusespäi Angaranjogenke mödvedhe, 80 m ü.m.t. valdmeren pindan päl. Matkad Krasnojarskhasai om 245 km suvhe vai 295 km avtotedme. Lähembaine lidn om Jeniseisk 30 km lodeheze orhal, 40 km avtotedme vai Jenisei-jogedme. Lesosibirsk-I-, I-kormaduzstancii i II-raudtestancijad oma Ačinskan sarakon lopuikš 260 km pitte.

Lidnanvuitte Strelk-žilo (4 792 rist. vl 2017) da pen' Ust'-Angarsk-žilo (52 rist. vl 2016) mülüdas lidnümbrikho Lesosibirskan ližaks. Lidnümbrikon pind — 270,83 km².

Eläjad

Vn 2010 Venäman rahvahanlugemižen mödhe lidnan eläjiden lugu oli 61 139 ristitud, lidnümbrikon — 66 240 ristitud. Kaikiš suremb lidnan ristitišt oli vozil 1989−2001, 68..69 tuhad eläjid (vl 1992 — 69 900 rist.). Vl 2017 kaik 64 477 ristitud elihe lidnümbrikos.

Ortodoksižen hristanuskondan Ristan Zdviženjan päjumalanpert' (1995−2002), vižkümnenden päivän uskojiden loičendpert' i islaman pühäpert' (1997) oma olmas lidnas.

Professionaližen opendusen aluzkundad: tehnologine i medicinine tehnikumad, mecanümbriradajan tegimišton kolledž, üläopendusen aluzkundoiden koume filialad.

Irdkosketused

• Lidnümbrikon tobmuden aluzkundoiden sait (lesosibirsk.krskstate.ru) Krasnojarskan randan oficialižel portalal. (ven.)