Ilanskii

Ilanskii
Иланский

Valdkund	Venäma
Eläjiden lugu (2021)	15,945 ristitud
Pind	52,28 km²
Telefonkod	+7−39 173-xx-xxx
Avtokod	24, 84, 88, 124
Aigvö	UTC+7 (MSK+4)

Ilanskii (ven.: Ила́нский) om Venäman lidn Krasnojarskan randan suvipalan päivnouzmas. Se om Ilanskijan rajonan administrativižeks keskuseks da palaks.

Istorii

Eländpunktan aluz om pandud vl 1646 kuti Ilanskai-külä (ven.: деревня Иланская), nimitihe jogen mödhe. Vspäi 1734 saudihe Sibirin traktad, läbiti Ilanskajad. Külä kändihe žiloks, sen nügüdläine nimi — Vanh Ilan' (ven.: Старая Илань). Vl 1894 sauvoškanzihe Transsiban ühtennimišt raudtestancijad vides kilometras küläspäi. Žilo raudtestancijanno sai lidnan statusad vl 1939.

Ilanskii om maižanduzrajonan keskuseks, šingotase raudten i sauvondmaterialiden edheotandoil (raudbetontegesed, pun ümbriradmine).

Geografijan andmused

Ilanskijan rajonan sijaduz randas vn 2017 kartal

Lidn sijadase rajonan päivnouzmas, Ilank-jogen hural randal tobjimalaz (ven.: Иланка, Kanan i Jenisein oigedpol'ne bassein), 280 m ü.m.t. keskmäižel korktusel.

Matkad Krasnojarskhasai om 200 km päivlaskmha orhal vai 258 km avtotedme. Lähembaine lidn om Kansk kaks'kümnes vides kilometras päivlaskmha «Sibir'»-avtotedme, federaline trass läbitab lidnan suvipalad.

Tobmuz

Pen' Algasi-külä kaikenaigaižeta ristitištota mülüi lidnankundha Ilanskijan ližaks.

Lidnankundan tobmuden pämez' oli sen Administracijan pämez'. Vladimir Maksakov radoi lidnan Administracijan jäl'gmäižen pämehen (sügüz'ku 2015 — sügüz'ku 2025). Lidnan Deputatoiden nevondkund om likvidacijan pordhal vn 2025 redukuspäi, Ol'ga Al'himenko radab sen likvidacižen laudkundan ezimehen siš-žo aigaspäi. Aleksandr Hodosevič oli nevondkundan jäl'gmäižen ezimehen (reduku 2015 — reduku 2025).

Eläjad

Vn 2010 Venäman rahvahanlugemižen mödhe lidnan eläjiden lugu oli 16 111 ristitud, rajonan koume videndest, vn 2021 — 15 945 ristitud. Kaik 15 013 eläjad oli lidnas vl 2017. Kaikiš suremb lidnan ristitišt oli 26 911 eläjad vl 1959.

Ortodoksižen hristanuskondan kaks' pühäpertid oma avaitud lidnas: ph. Aleksandr Nevalaižen jumalanpert' i ph. Jurgii-vägestusenkandajan časoun' senno.

Openduz

Lapsiden opendusen aluzkundad oma nell' nomeruidud päivkodid (nomer 2, 5, 7, 50), koume keskškolad (nomer 1, 2, 41), ližaopendusen keskuz, čomamahtoiden škol, sportškol.

Bogotolan transporttehnikuman filial om lidnan professionaližen opendusen aluzkundaks.

Galerei

• 
  Vezičuhunduz (2017)
• 
  Ph. Aleksandr Nevalaine-ruhtinasen jumalanpert', vn 2017 nägu (om saudud vll 1989−1991)
• 
  Kohenduzdepo raudtestancijal vl 2013
• 
  Ilanskijan keskškol nomer 1 Halipovan nimed (2018)
• 
  Ilanskai-päraudtestancii vl 2013, nägu jaugnikoiden sildaspäi

Irdkosketused

• Lidnan tobmuden aluzkundoiden oficialine sait (adm-ilansk.ru). (ven.)