Užur

Užur
Ужур

Lidnanznam	Flag
Valdkund	Venäma
Eläjiden lugu (2021)	14,134 ristitud
Pind	38,9 km²
Pämez'	Oleg Kirillov (kül'mku 2015—)
Telefonkod	+7−39 156-xx-xxx
Aigvö	UTC+7 (MSK+4)

Phh. Pedroin da Pauloin jumalanpert', vn 2018 nägu

Užur (ven.: Ужу́р) om Venäman lidn da lidnankund Krasnojarskan randan suvipäivlaskmaiženno röunanno. Se om Užuran rajonan administrativine keskuz da pala.

Istorii

Eländpunktan aluz om pandud vl 1760 kuti hakaslaižiden külä (ulus), nimituz znamoičeb «jogensu» (burät.: үзүүр). Užur-raudtestancii om kävutamas vn 1923 uhokuspäi. Užur sai radnikžilon statusad vn 1942 uhokus. Se om lidnan statusanke vspäi 1953.

Om äi sömtegimišton edheotandoid lidnas (maidtegim, leibtegim, kalanümbriradai tegim), ümbriratas sijališt torhut.

Geografijan andmused

Užuran rajonan sijaduz randas vn 2017 kartal

Lidn sijadase rajonan keskuzpalan päivlaskmas, Užurk-jogen hural randal tobjimalaz (ven.: Ужурка, Čulim-jogen hura randpol'), kesked maižanduzrajonad, 390 m ü.m.t. keskmäižel korktusel.

Užur seižub 206 kilometras suvipäivlaskmha Krasnojarskaspäi orhal, 303 km avtotedme, «Ačinsk — Abakan»-raudtejonol i avtotel. Matkad Čulim-jogehesai om kaks'kümne viž kilometrad suvhe orhal. Lähembaine lidn om Šaripovo 47 km lodeheze orhal vai 75 km avtotedme.

Tobmuz

Užur om lidnankundan üks'jäižeks eländpunktaks. Lidnankundan pind — 587,95 km².

Lidnankundan tobmuden pämez' om sen Administracijan pämez'. Valitas händast i nevondkundan 15 deputatad radnikusele videks vodeks. Edeline Administracijan pämez' om Konstantin Zareckii, radoi edel vn 2015 kül'mkud. Lidnan Deputatoiden nevondkundan ezimez' om Aleksandr Gluškov vspäi 2020 vai sen aigemba.

Eläjad

Vn 2010 Venäman rahvahanlugemižen mödhe lidnan eläjiden lugu oli 16 093 ristitud, rajonan ristitišton pol', vn 2021 — 14 134 ristitud. Kaik 15 568 eläjad oli lidnas vl 2017. Kaikiš suremb lidnan ristitišt oli 29 100 eläjad vl 1992, edel Užur-4-eländpunktan erištundad. Sauptud administrativiž-territorialižhe «Solnečnii»-ühtnik (ende Užur-4, raketlidnut, 10 tuh. eläjid, 3,84 km²) sijadase ani suvipäivlaskmha lidnaspäi.

Ortodoksižen hristanuskondan phh. Pedroin da Pauloin jumalanpert' om saudud vozil 1778−1824 kut missionerine forpost.

Openduz

Lapsiden opendusen aluzkundad oma koume päivkodid (nomer 1, 2, 3), koume keskškolad (nomer 1, 3, 6), Užuran ližaopendusen keskuz, čomamahtoiden škol, sportškol.

Užuran äiprofil'ne tehnikum om lidnan professionaližen opendusen aluzkundaks.

Irdkosketused

• Lidnankundan tobmuden aluzkundoiden oficialine sait (городужур.рф). (ven.)