Minusinsk

Minusinsk
Минусинск
Lidnanznam;	Flag;
Valdkund	Venäma
Eläjiden lugu (2024)	68,603 ristitud
Pind	17,7 km²
Pämez'	Andrei Pervuhin; (sulaku 2019—)
Telefonkod	+7−39 132-xx-xxx
Avtokod	24, 84, 88, 124
Aigvö	UTC+7 (MSK+4)

Minusinsk (ven.: Минуси́нск) om Venäman lidn da lidnümbrik Krasnojarskan randan suvipäivlaskmas. Se om Minusinskan rajonan administrativižeks keskuseks mugažo, ei mülü rajonha.

Istorii

Eländpunktan aluz om pandud vl 1739 kuti Minjusinskoje-žilo (ven.: село Миньюсинское), nimitihe Minus-jogen mödhe (ven.: Минуса). Žilo sai ümbrikon keskusen i lidnan statusad vl 1822 udes Jenisein gubernijas.

Minusinsk šingotase sömtegimišton (oludentegim, sömkombinat, konditerine fabrik^[1], lihategim, maidtegim) i mecanümbriradmižen edheotandoil, mugažo geologižen ecmižen mašiništon tegim i mecjändusiden pirolizan tegim ratas lidnas.

Geografijan andmused

Lidn sijadase ümbärdajan rajonan keskuzpalan päivlaskmas, Minusinskan katl'usen keskuses, mecstepin zonas, Jenisein oiktan laivhijaman muugotil randoil, 250 m ü.m.t. keskmäižel korktusel.

Matkad Krasnojarskhasai om 267 km pohjoižhe orhal vai 434 km «Jenisei»-avtotedme (R-257). Lähembaine lidn om Abakan kümnes kilometras päivlaskmha orhal vai 15 km avtotedme.

Tobmuz

Lidnanvuitte Vihand Kangaz-žilo (ven.: Зелёный Бор, 2 925 rist. vl 2017) mülüb lidnümbrikho Minusinskan ližaks, Minusinsk-raudtestancii sijadase neciš žilos, 12 km suvipäivlaskmha. Lidnümbrikon pind — 60,5 km².

Lidnümbrikon pämez' om sen Administracijan pämez'. Edeline lidnan Administracijan pämez' om Dmitrii Merkulov (sügüz'ku 2015 — reduku 2018). Lidnan Deputatoiden nevondkundan ezimez' om Larisa Čumačenko vn 2019 sulakuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 71 170 ristitud, lidnümbrikon — 73 948 ristitud, vn 2021 lidnan — 70 089 ristitud. Vl 2017 kaik 68 410 ristitud elihe lidnas i 71 335 ristitud kaikes lidnümbrikos. Kaikiš suremb lidnan ristitišt oli 74 400 eläjad vl 1992.

Ortodoksižen hristanuskondan kahesa pühäpertid^[2] oma avaitud lidnas: Spasan Toižetamižen päjumalanpert' (om saudud kaiken 19. voz'sadan aigan), nell' jumalanpertid, koume časounäd. Islaman istorine pühäpert' radab.

Openduz

Lapsiden opendusen aluzkundad oma kaks'kümne nimitadud i nomeruidud päivkodid (nomer 1..5, 7, 14..21, 23, 25, 26, 28..30), aluzškol nomer 1, ühesa keskškolad (nomer 2..6, 9, 12, 16, 47), gimnazii nomer 1, licei nomer 7, škol-internat nomer 8, rajonan lapsiden sädamižen keskuz, muzikškol, čomamahtoine škol, kaks' sportškolad (muite i olimpižen varan kebnas atletikas).

Minusinskan medicinine tehnikum^[3], maižandusen kolledž^[4], pedagogine kolledž^[5], kul'turan da čomamahton kolledž^[6], mugažo Krasnojarskan i Moskvan üläopendusen aluzkundoiden koume filialad oma lidnan professionaližen opendusen aluzkundoikš.

Galerei

Lidnan administracijan sauvuz (2012)
Spasan Toižetamižen päjumalanpert', vn 2014 nägu
Minusinskan medicinine tehnikum (2005, ende Belova-torgovannaižen pert')
Muzikškol lapsiden täht (2015)
Minusinskan kodirandantedištandmuzei N.M. Martjanovan nimed (2023, kaks' sauvust)

Homaičendad

Irdkosketused

Lidnan tobmuden aluzkundoiden oficialine sait (minusinsk.gosuslugi.ru). (ven.)

Minusinsk Vikiaitas

	Krasnojarskan randan lidnad
	Ačinsk \| Artömovsk \| Bogotol \| Borodino \| Divnogorsk \| Dudink \| Igark \| Ilanskii \| Jeniseisk \| Kansk \| Kodinsk \| Krasnojarsk \| Lesosibirsk \| Minusinsk \| Nazarovo \| Noril'sk \| Sosnovoborsk \| Šaripovo \| Zaozörnii \| Zelenogorsk \| Železnogorsk \| Ujar \| Užur

[1] Minusinskan konditerižen fabrikan sait (сладкая-артель.рф). (ven.)

[2] Minusinskan pühäpertid sobory.ru-saital. (ven.)

[3] Minusinskan medicinižen tehnikuman sait (minmt.ru). (ven.)

[4] Minusinskan maižandusen kolledžan sait (mcxk.ru). (ven.)

[5] Minusinskan pedagogižen kolledžan sait (minuspk.ru). (ven.)

[6] Minusinskan kul'turan da čomamahton kolledžan sait (mkki.ru). (ven.)

[1]

[2]

[3]

[4]

[5]

[6]