Jogidenkeskeine rajon (Vologdan agj)

Jogidenkeskeine rajon
Междуреченский район

Znam	Flag
Valdkund	Venäma
Administrativine keskuz	Šuiskoje
Eläjiden lugu (2015)	5,716 ristitud
Pind	3,624 km²

Jogidenkeskeine rajon (ven.: Междуреченский район) om rajon Vologdan agjas.

Administrativine keskuz da kaikiš suremb eländpunkt om Šuiskoje-žilo.

Istorii

Rajonan aluz om pandud vl 1929 heinkun 15. päiväl Pohjoižen randan Vologdan ümbrikho kuti Šuiskojen rajon, vspäi 1931 rajon om nügüdläižen nimenke. Vl 1930 heinkun 30. päiväl heitihe ümbrikod, i vhesai 1936 rajon mülüi Pohjoižhe randha kuti administrativine ühtnik, sid' vozil 1936−1937 — Pohjoižhe agjaha. Vs 1937 sügüz'kun 23. päiväspäi mülüb Vologdan agjaha. Rajon om olmas nügüdläižiš röunoiš vspäi 2004.

Geografijan andmused

Jogidenkeskeine rajon om Vologdan agjan suvine taho. Pind — 3 624 km². Mec otab territorijan seičeme kümnendest (2553 nellikkilometrad), sidä kesken äi sodunuzid mecoid, lehtezmec (koivikod, habikod) om enambuses. Sod — 14% (509 km²). Saum vezid — 1,1% (34,5 km²).

Om röunoid videnke Venäman rajonanke:

• päivnouzmas Kostroman agjan Soligaličun rajonanke;
• suves Vologdan agjan Gräzovecan rajonanke;
• päivlaskmas Vologdan agjan Vologdan rajonanke;
• lodehes da pohjoižes Vologdan agjan Sokolan rajonanke;
• pohjoižpäivnouzmas Vologdan agjan Tot'man rajonanke.

Znamasine jogi oma Suhon sen oiktoiden Šuj- da Ihalic (Mizüg)-ližajogidenke. Läz kaik joged mülüdas Suhonan (Jävaldmeren) basseinha. Rajonan suves Monz ližajogidenke da erased toižed pened joged mülüdas Volgan (Kaspijan meren) basseinha.

Reljef om tazo päpaloin, sokaz sijidme. Suhonanveren alangišt om pohjoižes. Avnegan ülüz sijadase rajonan keskuses.

Londuseližed varad oma kivivoi, turbaz, sauvondmaterialad (letked, saved, gravii), gaž, mec, reskvezi.

Vs 2010 kezakun 4. päiväspäi rajonan territorii jagase videks municipaližeks ühtnikaks (küläkundaks).

Tobmuz

Vl 2014 sügüz'kun 14. päiväl Aleksandr Šadrin oli valitud rajonan da sen administracijan pämehen, vl 2015 tal'vkun 18. päiväl läksi erindha. Hänen sijas oma Dmitrii Lukičev — rajonan pämehen velgusentäutai, i Sergei Kiselöv — rajonan administracijan pämehen velgusentäutai. Koume administracijan varapämest oma hänele abhu. Koume ohjandust da üks' palakund alištudas rajonan administracijale.

Käskusenandai tobmuz om rajonan parlament — Ezitajiden suim (ven.: Представительное собрание) 15 ühtnijanke. Kaik rahvaz valičeb heid videks vodeks. Järgvaličendad sihe oliba vn 2012 keväz'kun 4. päiväl. Jurii Boines radab sen ezimehen vl 2015.

Eläjad

Vn 2010 Venäman rahvahanlugemižen mödhe eläjiden lugu oli 6 112 ristitud.

Kaik om 157 eländpunktad rajonas, sidä kesken kuz' žilod da 151 küläd. Toine sur' eländpunkt om Turovec-žilo (1,0 tuh. rist. vl 2002), matkad avtotedme Šuiskoje-keskushesai om 250 km.

Ižanduz

Rajonan ižandusen päsarakod oma mecan varhapanend da ümbriradmine (pilindmaterialad, komplektad pertid sauvomha, strubad), tor'vikveimtransport, maižanduz.

Irdkosketused

• Jogidenkeskeižen rajonan Ezitajiden suiman oficialine sait (psmr35.ru). (ven.)
• Jogidenkeskeižen rajonan administracijan oficialine sait (mr35.ru). (ven.)
• Jogidenkeskeižen rajon agjan oficialižel vologda-oblast.ru-portalal. (ven.) (angl.)