Nikol'skan ümbrik

Nikol'skan rajon
Никольский район

Znam	Flag
Valdkund	Venäma
Administrativine keskuz	Nikol'sk
Eläjiden lugu (2015)	20,571 ristitud
Pind	7,476,71 km²

Nikol'skan rajon (ven.: Никольский район) om rajon Vologdan agjas.

Administrativine keskuz om Nikol'sk-lidn.

Istorii

Rajonan aluz om pandud vn 1924 elokus Pohjoižen Dvinan gubernijha. Sil aigal rajonan pind oli 8863 nellikkilometrad, ristitišt — 59317 eläjad. Vs 1929 heinkun 15. päiväspäi rajon mülüi Pohjoižen randan Pohjoižen Dvinan ümbrikho. Vl 1930 heinkun 30. päiväl heitihe ümbrikod, i vodhe 1936 tal'vkun 5. päivhäsai rajon mülüi Pohjoižhe randha kuti administrativine ühtnik. Vozil 1936-1937 oli Pohjoižen agjan palaks. Vs 1937 sügüz'kun 23. päiväspäi rajon mülüb Vologdan agjaha. Rajon om olmas nügüdläižiš röunoiš vspäi 2004.

Geografijan andmused

Nikol'skan rajon sijadase agjan suvipäivnouzmas. Pind — 7 476 nellikkilometrad. Mecad ottas territorijan 86% (6448 km²). Koivikod habikoidenke oma enambuses, kavag'mec otab koumandest (kuz', pedai).

Om röunoid 7 Venäman rajonanke:

• päivnouzmas Kostroman agjan Vohman rajonanke;
• suvipäivnouzmas Kostroman agjan Pavinon rajonanke;
• suves Kostroman agjan Piščugan da Mežan rajonidenke;
• suvipäivlaskmas Kostroman agjan Kologrivan rajonanke;
• päivlaskmas Vologdan agjan Babuškinan rajonanke;
• pohjoižes da pohjoižpäivnouzmas Vologdan agjan Kičmengan rajonanke.

Reljef om kukhikaz tobjimalaz, pened sod oma sijidme. Pohjoižed Uvalad-ülüden päivlaskmaine pala otab rajonan territorijad läz täuzin. Znamasine jogi om Jug sen huran Šaržen'g-ližajogenke, mülüdas Pohjoižen Dvinan (Jävaldmeren) basseinha. Rajonan päivlaskmas Unž-jogi ližajodidenke mülüb Volgan (Kaspijan meren) basseinha. Penid da surid jogid om läz seičemed sadad. Om vähä penid järvid (1 km² penemba pindal). Sod oma 1% territorijad.

Londuseližed varad oma turbaz, sauvondmaterialad (letked, saved, gravii), dolomit, mec, reskvezi.

Vs 2015 kezakun 25. päiväspäi rajonan territorii alajagase 8 municipaližhe ühtnikha: 1 lidnkundha da 7 küläkundha.

Tobmuz

Vs 2008 keväz'kuspäi Väčeslav Panov om valitud i radab rajonan da sen administracijan pämehen kahtenden strokun. Rajonan pämehen järgvaličendad oliba vl 2012 keväz'kun 4. päiväl, hänen valdatusiden strok om viž vot. Nell' administracijan varapämest oma hänele abhu. Kaks' ohjandust, 8 palakundad da 1 komitet alištudas rajonan administracijale.

Käskusenandai tombuz om Ezitajiden Suim (ven. Представительное собрание) 19 ühtnijanke. Kaik rahvaz valičeb heid nelläks vodeks. Järgvaličendad sihe oliba vl 2012 keväz'kun 4. päiväl. Väčeslav Podnebesnikov radab sen ezimehen vl 2015.

Eläjad

Vn 2010 Venäman rahvahanlugemižen mödhe eläjiden lugu oli 24 488 ristitud.

Kaik om 223 eländpunktad rajonas, sidä kesken 1 lidn, 13 žilod da 209 küläd, niišpäi 40 seištas kaikenaigažeta ristitištota. Toižid surid eländpunktoid ei ole.

Ižanduz

Rajonan ižandusen päsarakod oma mecan varhapanend da ümbriradmine (pilindmaterialad, strubad brusaspäi), sömtegimišt da maižanduz, omblendtegimišt da turizm.

Irdkosketused

• Nikol'skan rajonan oficialine sait. (ven.)
• Nikol'skan rajon Vologdan agjan ohjastusen oficialižel portalal. (ven.) (angl.)