Lüblin

Lüblin
Lublin

Lidnanznam	Flag
Valdkund	Pol'šanma
Eläjiden lugu (2022)	336,339 ristitud
Pind	147,5 km²
Pämez'	Kšištof Žuk (tal'vku 2010—, Krzysztof Żuk)
Telefonkod	+48−81
Aigvö	tal'vel UTC+1, kezal UTC+2

Lidnan kart (2008)

Lüblin (pol'š.: Lublin [ˈlublʲin]) om lidn Pol'šanman suvipäivnouzmas. Se om valdkundan ühesanz' lidn eläjiden lugun mödhe, Lüblinan sodaveikundan pälidn.

Istorii

Eländpunktan aluz om pandud 6. voz'sadal, mainitase ezmäižen kerdan kirjutadud purtkiš vl 1198 lidnuseks. Se sai lidnan oiktusid vl 1317.

Lüblin šingotase Honker-jüguavtoiden i Sipma-maižanduztehnikan pästandal, järedal LEK:al elektrusen tehmiženke, farmaceftižel i himižel sarakoil, sömtegimištol (hel'pked murgn'aks, magedused, olud).

Geografijan andmused

Lidn sijadase sodaveikundan keskuzpalan lodehes, Bistšic-jogen (pol'š.: Bystrzyca, Vislan bassein) da Zembžican vezivaradimen (pol'š. Zalew Zemborzycki) randoil, seižub 163..238 m ü.m.t. korktusil. Matkad Varšavhasai om 153 km lodeheze orhal vai 169 km avtotedme.

Klimat om ven kontinentaline. Voden keskmäine lämuz om +8,2 C°, kezakun-elokun +16,9..+18,9 C°, tal'vkun-uhokun −1,0..−2,5 C°. Ekstremumad oma −33,7 C° (viluku) i +35,3 C° (heinku, eloku). Paneb sadegid 601 mm vodes, enamba semendkus-heinkus (67..82 mm kus), vähemba kül'mkus-keväz'kus (32..38 mm kus).

Tobmuz

Lüblinan rajonad (2008)

Lüblin jagase 27 nimitadud lidnanrajonaks (pol'š.: dzielnica miasta) vspäi 2006.

Edeline lidnan pämez' (pol'š.: prezydent Lublina) om Adam Vasilevski (Adam Wasilewski, tal'vku 2006 — tal'vku 2010).

Eläjad

Vl 2009 lidnan eläjiden lugu oli 350 392 ristitud. Kaikiš suremb lidnan ristitišt oli 359 154 eläjad vl 1999. Kaik 664 tuhad eläjid om ezilidnoidenke (2022).

Professionaližen üläopendusen aluzkundad: Marija Sklodovskaja-Kürin universitet, Lüblinan Katoline universitet, medicinan, biotedoiden i politehnine universitetad, Lüblinan privatine biznesškol.

Transport

Avtobusad, trolleibusad i velosipedad oma kundaližeks transportaks lidnas. Ezilidnelektrojonused i avtobusad ühtenzoittas Varšavanke, Krakovanke da toižidenke lidnoidenke. Ümbärte (pol'rengaz) om saudud avtoiden täht.

Rahvahidenkeskeine civiline Lüblin-lendimport (LUZ, 455 tuh. passažiroid vl 2018) sijadase kümnes kilometras päivnouzmha lidnan keskusespäi, Švidnik-ezilidnan ani pohjoižpäivnouzmaižen röunan taga sen punolendimiden «PZL-Świdnik»-kompanijanke. Lendimport ühtenzoitase lidnelektrojonusel Lüblinan keskusenke. Tehtas reisid Evropan erasihe lidnoihe (London, Dublin, Antverpen, Eindhoven, Sandefjord), Tel' Avivha, mugažo Varšavha.

Irdkosketused

• Inrormacii Lüblin-lidnas study.lublin.eu-openduzsaital. (pol'š.) (angl.) (ven.) (ukr.)