Žešuv

Žešuv
Rzeszów

Lidnanznam	Flag
Valdkund	Pol'šanma
Eläjiden lugu (2024)	197,268 ristitud
Pind	129,01 km²
Pämez'	Konrad Fijolek (kezaku 2021—, Konrad Fijołek)
Telefonkod	+48−17
Aigvö	tal'vel UTC+1, kezal UTC+2

Lidnan kart (2019)

Žešuv (pol'š.: Rzeszów [ˈʐɛʂuf], ukr.: Ряшiв, saks.: Reichshof, latin.: Resovia; jidiš: ריישע, vepsän kirjamil Raiše) om lidn da raudtesol'm Pol'šanman suvipäivnouzmas. Se om Alakarpatan sodaveikundan administrativižeks keskuseks da palaks.

Istorii

Eländpunktan aluz om pandud 11. voz'sadal. Ende se oli Peremišlin ruhtinazkundan palaks (Amuine Venä), Pol'šanma anasti lidnust 14. voz'sadal. Eländpunkt sai lidnan oiktusid vl 1354.

Žešuv šingotase avto- i avialikutimiden tegimil, Zelmer-koditehnikan pästandal, sömtegimištol (plodkonservtegim, lihakombinat), mugažo tehnižen porcellanan edheotandal.

Geografijan andmused

Lidnan sijaduz sodaveikundas i valdkundas vn 2006 kartal

Lidn sijadase Vislok-jogen randoil (pol'š.: Wisłok 205 km pitte, Vislan bassein), 197..384 m ü.m.t. korktusil. Karpatad seištas suvhe lidnaspäi. Matkad Varšavhasai om 310 km pohjoižhe avtotedme.

Klimat om ven kontinentaline valdmeren valatoitusenke. Keza om päivoikaz, tal'vaig om pil'vekaz lujas. Voden keskmäine lämuz om +8,9 C°, kezakun-elokun +17,6..+19,4 C°, tal'vkun-uhokun −0,5..−1,9 C°. Ekstremumad oma −35,8 C° (uhoku) i +36,5 C° (eloku). Kezaaigan minimum om −0,9 C° (kezaku), tal'vaigan maksimum om +17,2 C° (uhoku). Ei voi panda halad heinkus-elokus (elokun minimum om +0,9 C°). Paneb sadegid 652 mm vodes, enamba semendkus-heinkus (80..91 mm), vähemba kül'mkus-keväz'kus (32..39 mm kus). Paneb lunt 59 päiväd tal'ves, lumikatken keskmäine korktuz oleleb ühesha santimetrhasai. Kun keskmäine relätivine nepsuz vajehtase 71..76 % röunoiš keväz'kus-elokus, 82..86 % redukus-uhokus.

Tobmuz

Lidnan territorialine jagand (vn 2010 kart)

Žešuv jagase koumekümneks rajonaks (pol'š.: osiedle).

Lidnan tobmuden pämez' om prezident (pol'š.: prezydent Rzeszowa). Edeline lidnan pämez' om Tadeuš Ferenc (Tadeusz Ferenc, kül'mku 2002 — uhoku 2021).

Eläjad

Vl 2014 lidnan eläjiden lugu oli 184 493 ristitud, ezilidnoidenke — läz 350 tuh. ristituid. Kaik 193 631 eläjad oli lidnas vn 2019 augotišes. Kaikiš suremb lidnan ristitišt om nügüd'.

Transport

Avtobusad oma kundaližeks transportaks lidnas. Kaik kuz' raudtestancijad om saudud Žešuvas.

Rahvahidenkeskeine civiline Žešuv-Jasönk-lendimport (pol'š.: Port lotniczy Rzeszów-Jasionka im. Rodziny Ulmów, RZE / EPRZ, 771 tuh. passažiroid vl 2018) sijadase kümnes kilometras pohjoižhe lidnan keskuzpalaspäi Jasönk-žilonno. Tehtas reisid Suren Britanijan lidnoihe, Njuarkha i Tel' Avivha, mugažo Varšavha. Om sezonreisid Grekanman, Bolgarijan i Turkanman kurortoidennoks.

Galerei

• 
  Lidnan tobmuden sauvuz (2021)
• 
  Pühän Ristan jumalanpert' i lidnan muzei, vn 2018 nägu
• 
  Alima-Gerber S.A.-edheotandan päfater vl 2008 (söndtavaroiden Nestlé-kompanijan pala)
• 
  Üläkorged Olszynki Park-kompleks vl 2024
• 
  Rzeszów-adivpert' i CH Galeria Rzeszów-moll vl 2014
• 
  Žešuvan universitetan kirjišt (2021)
• 
  Rahvahidenkeskeine Žešuv-Jasönk-lendimport vl 2011
• 
  Žešuv-Päine-päraudtestancii vl 2015

Sebrizlidnad

• AÜV Buffalo, Nju Jork (štat), AÜV (vspäi 1975)
• Slovakii Košice, Slovakii (1991)
• Ukrain L'vov, Ukrain (1992)
• Ukrain Luck, Ukrain (2001)

Irdkosketused

• Lidnan oficialine sait (rzeszow.pl). (pol'š.) (+ äikel'ne känduz)