Oktäbr'skii

Oktäbr'skii
Октябрьский (ven. i bašk.)

Lidnanznam	Flag
Valdkund	Venäma
Eläjiden lugu (2021)	115,557 ristitud
Pind	105,83 km²
Pämez'	Aleksei Pal'činskii (sügüz'ku 2023—)
Telefonkod	+7−34 767-xx-xxx
Avtokod	02, 102
Aigvö	UTC+5 (MSK+2)

Oktäbr'skii (ven. i bašk.: Октя́брьский, tot.: Октябрьски) om Venäman lidn da lidnümbrik Baškortostanan Tazovaldkundas, sen videnz' surtte lidn. Sijadase tazovaldkundan päivlaskmaiženno röunanno.

Istorii

Lidnan territorii da sen ümbrišt oma elänzoittud amussai, tetas Mullino II-seižutest kodikoittud hebon jändusidenke (7.−6. voz'tuhad e.m.e.).

Nügüdläižen eländpunktan aluz om pandud Soclidn-žiloks (ven.: Соцгород) vl 1937 šingotamha kivivoin löudmižsijad. Kävutihe türmatud da ottud plenha mehiden töid. Oktäbr'skii-radnikžilo sai lidnan statusad tazovaldkundan alištusenke vn 1946 5. päiväl sulakud.

Kivivoin samine, mašiništon tehmine samha kivivoid, metalližkonstrukcijoiden da sauvondmaterialiden pästand (raudbetontegesed, keramine apakut) i kebn tegimišt oma olmas Oktäbr'skii-lidnas, mugažo avtoladimiden tegim, porcellanastjoiden tegim i plastiktegesiden edheotand.

Geografijan andmused

Lidn sijadase Ik-jogen oiktal randal, Bugul'man i Belebein ülüden kukhil, 140 m ü.m.t. keskmäižel korktusel.

Tatarstan om jogen vastrandal. Matkad Ufahasai om 160 km päivnouzmha orhal vai 180 km avtotedme. Lähembaižed lidnad oma Tuimazi 10 km pohjoižpäivnouzmha i Bavli (Tatarstan) kümnes kilometras suvipäivlaskmha.

Tobmuz

Oktäbr'skii om lidnümbrikon üks'jäižeks eländpunktaks. Jagase nomeruidud mikrorajonikš (7, 21, 23..26, 28, 29, 32, 34..38, 40) i läz koumetoštkümneks nimitadud lidnanlaptaks.

Lidnümbrikon tobmuden pämez' om sen Administracijan pämez'. Edeližed lidnan Administracijan pämehed oma Aleksei Šmelöv (tal'vku 2013 — sügüz'ku 2023), Sergei Molčanov (2003 — kül'mku 2013), Jurii Korol'kov (1992−2003). Lidnümbrikon nevondkundan ezimez' om Andrei Kupavih vn 2024 sügüz'kuspäi. Edeline nevondkundan ezimez' om Aidar Imangulov (2005 — sügüz'ku 2024).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 109 474 ristitud, vn 2021 — 115 557 ristitud. Kaik 113 929 eläjad oli lidnas vl 2017. Kaikiš suremb lidnan ristitišt oli 114 194 eläjad vl 2019.

Rahvahad (enamba 1 % vl 2010, ozutadud rahvahudenke): venälaižed — 40,9 %, totarlaižed — 38,1 %, baškiralaižed — 13,3 %, čuvašalaižed — 1,8 %, ukrainalaižed — 1,3 %, marilaižed — 1,2 %, toižed rahvahad — 3,4 %.

Islaman koume pühäpertid (sidä kesken Zajitovon päpühäpert', 2007) da «Nurul' islam»-medrese oma avaitud lidnas. Ortodoksižen hristanuskondan kaks' pühäpertid oma saudud: Sretenjan kafedraline päjumalanpert' (om letud vll 1995−2008) i ph. Sergii Radonežalaižen jumalanpert'.

Professionaližen opendusen aluzkundad oma viž kolledžad (kivivoin S.I. Kuvikinan nimed, äiprofil'ne prifessionaline, gumanitarine, muzikkolledž, kommunaližsauvondkolledž), Oktäbr'skijan ekonomine tehnikum, «Nurul' Islam»-medrese, Tuimazin medkolledžan filial, kahten üläopendusen aluzkundan filialad (Uf).

Transport

Avtobusad da taksid oma kundaližeks transportaks lidnas. «Ural»-avtote (M5) ümbärdab lidnad suvespäi. Nariševo-raudtestancii om sarakon čup i kävutase jüguiden täht vaiše, passažirstancii sijadase Tuimazi-lidnas.

Sportlendimpöud levigandeb ühesa kilometrad suvipäivlaskmha lidnaspäi.

Galerei

• 
  Lidnan tobmuden sauvuz (2013)
• 
  Leninan nimed torg (2014)
• 
  Zajitovon pämečet', vn 2007 nägu
• 
  Sretenjan kafedraline päjumalanpert', vn 2007 nägu
• 
  Ufan valdkundaline kivivoin tehnine universitet, Oktäbr'skii-lidnan filial (2014)
• 
  Tehnikan pert'kulu (2011)
• 
  Sportkeskuz 1960-nzil vozil
• 
  Avtostancii vl 2005
• 
  Fontanad skveras Vägestusen puištonno vl 2006

Irdkosketused

• Oktäbr'skii-lidnümbrikon tobmuden sait (oktadm.ru). (ven.)