Temrük

Temrük
Темрюк

Lidnanznam	Flag
Valdkund	Venäma
Eläjiden lugu (2025)	40,415 ristitud
Pind	20,1 km²
Pämez'	Vladimir Sidorov (sulaku 2023—)
Telefonkod	+7−86 148-xx-xxx
Avtokod	23, 93, 123
Aigvö	UTC+3 (MSK+0)

Temrük (ven.: Темрю́к) om Venäman lidn da lidnankund Krasnodaran randan päivlaskmas. Se om ühtennimižen rajonan administrativine keskuz, kaikiš suremb eländpunkt da üks'jäine lidn, vinmarjan maižanduzrajonan keskuz.

Istorii

Nügüdläižen eländpunktan aluz om pandud 16. voz'sadan lopus kuti Uz' Temrük-lidnuz (ven.: крепость Новый Темрюк), sidä kesken Venäman sodavägil, nimitihe sauvondan ohjandajan kabardalaižen Temrük-ruhtinasen mödhe. Vll 1570−1774 lidnuz mülüi Ottomanan imperijha. Temrükskai-stanic (ven.: станица Темрюкская) sai lidnan statusad vl 1860.

Temrük šingotase kaičendministrusen kodvmehanižel tegimel, laivankohendusen tegimel, torguindmeriportaks Azovmerel i lebutahoks reduvulkanoil, sömtegimištol (vintegim, kalan kazvatuz da ümbriradmine). Pästtas sauvondmaterialid (putegesed, iknad).

Geografijan andmused

Temrükan rajonan sijaduz randas vn 2012 kartal

Lidn sijadase rajonan keskuzpalan päivnouzmas, Tamanin pol'sarel, Kuban'-jogen suhišton i Kurčanskii-limanan randoil, jogenvagon oiktal randal tobjimalaz, seičeme metrad valdmeren pindan päl korktusel.

Matkad Krasnodarhasai om 130 km päivnouzmha avtotedme. Lähembaine lidn om Anap nell'kümnes kilometras suvhe avtotedme vai raudtedme.

Tobmuz

Kaik kaks' žilod (Oktäbr'skii (608 rist. vl 2010) i Suvipaute (ven.: Южный Склон, 182 rist. vl 2010)) da Orehov Kut-futor (kaikenaigaižeta ristitištota sil-žo vodel) mülüdas lidnankundha Temrükan ližaks.

Lidnankundan tobmuden pämez' om sen Administracijan pämez'. Edeline lidnan Administracijan pämez' om Maksim Jermolajev (uhoku 2018 — sulaku 2023). Lidnan Nevondkundan ezimez' om Ol'ga Guseva vn 2014 redukuspäi.

Eläjad

Vn 2010 rahvahanlugemižen mödhe lidnan eläjiden lugu oli 38 046 ristitud, lidnankundan — 38 836 ristitud. Vl 2017 kaik 40 108 ristitud elihe lidnas i 40 915 ristitud kaikes lidnankundas, rajonan koumandez. Lidnan kaikiš suremb ristitišt oli 41 608 eläjad vl 2021.

Rahvahad (lidnan eläjad, enamba 1 % vl 2010): venälaižed — 93,8 %, ukrainalaižed — 1,9 %, toižed rahvahad — 3,3 %, rahvahuden ozutandata — 1,0 %.

Ortodoksižen hristanuskondan kaks' jumalanpertid oma avaitud lidnas: Mikoi-arhangelan (letihe vl 1998) i ph. Aleksandr Nevalaižen (om saudud vll 2005−2007).

Openduz

Lapsiden opendusen aluzkundad oma nell'toštkümne nimitadud i nomeruidud päivkodid (nomer 1..13, 15), kaks' aluzškolad (nomer 14 i 15), nell' keskškolad (nomer 1, 2, 3, 13), ehtal'ne škol, škol-internat 8. toižendan, rajonan lapsiden sädamižen keskuz, lidnan čomamahtoiden škol, rajonan sportškol.

Kubanin kozakišton sömindustrijan da biznesan valdkundaline institut (Moskvan valdkundaližen ohjanduztehnologijoiden universitetan filial) om lidnan professionaližen opendusen aluzkundaks.

Transport

Avtobusad da maršruttaksid oma kundaližeks transportaks lidnas.

Temrük-merijüguport om saudud Azovmeren randal. Temrük-raudtestancii radab vaiše jüguiden täht, ühtenzoitab Anapanke. Lähembaine Vitäzevo-lendimport sijadase koumekümnes kilometras suvhe, läz Anap-lidnad.

Galerei

• 
  Suren sodan memorial (2009)
• 
  Mikoi-arhangelan jumalanpert', vn 2008 nägu
• 
  Keskuzline universaline lauk (2019. voz' vai sen aigemba)
• 
  Kul'turkeskuz pätorgul (2019. voz' vai sen aigemba)
• 
  Nevondkundaline lidnanznam (oli vspäi 1976)

Irdkosketused

• Lidnankundan tobmuden sait (admtemruk.ru). (ven.)