Ust'-Labinsk

Ust'-Labinsk
Усть-Лабинск

Lidnanznam	Flag
Valdkund	Venäma
Eläjiden lugu (2025)	38,572 ristitud
Pind	37,15 km²
Pämez'	Stanislav Gainüčenko (sulaku 2020—)
Telefonkod	+7−86 135-xx-xxx
Avtokod	23, 93, 123
Aigvö	UTC+3 (MSK+0)

Ust'-Labinsk (ven.: Усть-Лаби́нск, suline mugažo Усть-Лаба i Услаба́, adig.: Лэбап) om Venäman lidn, lidnankund da avtotesol'm Krasnodaran randan keskuzpalas. Se om Ust'-Labinskan rajonan administrativine keskuz da pala.

Istorii

Eländpunktan aluz om pandud vl 1794 kuti Ust'-Labinskai-stanic (ven.: станица Усть-Лабинская) sirdanuzil Donan randaspäi kozakoil. Vl 1900 saudihe raudtestancijan «Jekaterinodar — Kavkazskai»-keskustal. Stanic sai lidnan statusad nügüdläiženke nimenke vl 1958. Stanican lidnusen varmitesed oma kaičenus hüvin.

Ust'-Labinsk šingotase sömtegimištol (efirvoiden ekstrakcijan kombinat, saharan tegim, lihakombinat), sauvondmaterialiden pästandan edheotandoil (gazbetontegesed, raudbetontegesed), kohenduzmehanižel tegimel (mašiništ sahar-, voi- i sauvondtegimištoiden täht, metallan ümbriradmine), propilenhavadoiden tegimel. Lidn om maižanduzrajonan keskuseks, kazvatadas villänkul'turoid, änikoid, semnid, i lindvodindan ferm radab. «Kuban'»-agroholdingan päfater om saudud lidnas.

Geografijan andmused

Ust'-Labinskan rajonan sijaduz randas vn 2012 kartal

Lidn sijadase rajonan suvipäivlaskmaiženno röunanno, 75 m korktusel valdmeren pindan päl, Kuban'-jogen oiktal korktal randal, sen ühthejoksmust vaste Labanjogenke.

Ust'-Labinsk seižub Adigejan Tazovaldkundan röunanno. Matkad Krasnodarhasai om kuz'kümne kaks' kilometrad päivlaskmha. Lähembaine lidn om Korenovsk koumekümne kilometrad lodeheze avtotedme.

Tobmuz

Ust'-Labinsk om lidnankundan üks'jäižeks eländpunktaks.

Lidnankundan tobmuden pämez' om sen Administracijan pämez'. Edeline Administracijan pämez' om Sergei Viskubov (reduku 2017 — semendku 2019). Lidnan Nevondkundan ezimez' om Svetlana Agibalova vn 2019 kül'mkuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 43 270 ristitud, vn 2021 — 40 158 ristitud. Kaik 41 348 eläjad oli lidnas vl 2017. Kaikiš suremb lidnan ristitišt oli läz 44 tuhad eläjid vozil 1996−2003.

Rahvahad (enamba 1 % vl 2010): venälaižed — 91,9 %, armenijalaižed — 3,2 %, ukrainalaižed — 1,3 %, toižed rahvahad — 3,1 %, rahvahuden ozutandata — 0,5 %.

Hristanuskondan kuz' pühäpertid oma saudud: koume — ortodoksine, kaks' — baptizman, üks' — seičemenden päivän adventistoiden.

Openduz

Lapsiden opendusen aluzkundad oma nell'toštkümne nomeruidud päivkodid (nomer 1..6, 8, 9, 11, 14, 16, 24, 41, 44), kuz' keskškolad (nomer 1..4, 6, 36), gimnazii nomer 5, kaks' speciališt (korrekcišt) školad (nomer 29 8. toižendan i nomer 35). Saudud Oleg Deripaska-edheotajan fondal licei lahjoitud lapsiden täht om avaitud vl 2022. Ližaopendusen aluzkundad oma sädamižen Sozvezdije-keskuz («Tähthišt»), muzikškol, lapsiden da norišton Viktorija-sportškol.

Ust'-Labinskan socialiž-pedagogine kolledž om lidnan professionaližen opendusen aluzkundaks.

Galerei

• 
  Amptud nacistoil Suren sodan aigan sijaližiden eläjiden velleskaum (2020)
• 
  Ph. Sergii Radonežalaižen jumalanpert' (ortodoksine hristanuskond), vn 2010 nägu
• 
  Rajonan kodirandantedištandmuzei vl 2018
• 
  Vanh sauvuz Leninan i Demjan Bednijan irdoiden saumal (2013)
• 
  Vanh sild Kubaniš päliči i nägu lidnusespäi Hatukai-aulha (Adigei) vl 2012
• 
  Ust'-Labinskai-päraudtestancii vl 2023

Irdkosketused

• Lidnankundan tobmuden oficialine sait (gorod-ust-labinsk.ru). (ven.)