Labinsk

Labinsk
Лабинск

Lidnanznam	Flag
Valdkund	Venäma
Eläjiden lugu (2025)	55,434 ristitud
Pind	46,41 km²
Pämez'	Sergei Šeremet (kezaku 2020—)
Telefonkod	+7−86 169-xx-xxx
Avtokod	23, 93, 123
Aigvö	UTC+3 (MSK+0)

Lidnan kart (2016)

Labinsk (ven.: Лаби́нск) om Venäman lidn da lidnankund Krasnodaran randan suvipäivnouzmas. Se om Labinskan rajonan administrativine keskuz da pala.

Istorii

Ende nogailaižiden Nauruz-aul oli olmas lidnan sijas, sid' adiglaižiden Četiun-aul (adig.: Чэтыун) oli pandud mantazole Kavkazan sodan aigan. Nügüdläižen eländpunktan aluz om pandud Donan kozakoil vl 1841 kuti Labinskai-stanic, nimitihe jogen mödhe. Se sai lidnan oficiališt statusad vn 1947 23. päiväl redukud Labinsk-nimenke.

Labinsk šingotase sömtegimištol (leibtegim, pühävoin tegim, saguden edheotand, maidtegim, konservtegim, mineraližen veden butiliruind i oluden pästand, villänpurnud), sauvondmujuiden da lakoiden järedal tegimel, puižen pakuitesen pästandal, bal'neologižeks kurortaks («Laba»-sanatorii reduidenke i termaližidenke vezidenke, severz'-se lebubazoid läz lidnad). Tehtas šapkoid i pövuid karvaspäi.

Geografijan andmused

Labinskan rajonan sijaduz randas vn 2012 kartal

Lidn sijadase rajonan lodehes, Lab-jogen keskjoksmusen oiktal randal (ven.: Лаба́, Kuban'-jogen hurapol'ne bassein), 270 m ü.m.t. keskmäižel korktusel, Kavkazan ezimägištonno.

Adigei sijadase jogen vastrandal, matkad Krasnodarhasai om 180 km päivlaskmha. Lähembaine lidn om Kurganinsk kaks'kümne seičeme kilometrad pohjoižhe orhal vai kaikil teil. Labinskai-raudtestancii (ven.: Лабинская) om saudud jonol Kurganinskaspäi.

Tobmuz

Prohladnii-žilo (1416 rist. vl 2010) da Mirun Zorä-futor (ven.: Заря Мира, 114 rist. vl 2010) mülüdas lidnankundha Labinskan ližaks.

Lidnankundan tobmuden pämez' om sen Administracijan pämez'. Edeližed lidnan Administracijan pämehed oma Aleksandr Kurganov (heinku 2018 — kezaku 2020), Aleksei Matičenko (Алексей Матыченко, radoi vn 2018 heinkuhusai). Lidnan Nevondkundan ezimez' om Maksim Artemenko vn 2015 redukuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 62 864 ristitud, lidnankundan — 64 394 ristitud. Vl 2018 kaik 60 164 ristitud elihe lidnas i 61 649 ristitud kaikes lidnankundas. Kaikiš suremb lidnan ristitišt oli 64 300 eläjad vl 1996.

Rahvahad (enamba 1 % vl 2010): venälaižed — 91,8 %, armenijalaižed — 3,3 %, ukrainalaižed — 1,2 %, toižed rahvahad — 3,0 %, rahvahuden ozutandata — 0,7 %.

Ortodoksižen hristanuskondan Jumalanmaman Emäganpäivän päjumalanpert' om saudud lidnas vll 1887−1891, se om udessündutadud vspäi 1991. Armenižen jumalankodikundan Surb Karapet-jumalankodi (2006) i ühtennimine časoun' (2002) oma avaitud, Surb Sarkis-jumalanpert' om sauvomižes.

Openduz

Lapsiden opendusen aluzkundad oma vižtoštkümne nimitadud i nomeruidud päivkodid (nomer 1, 3..7, 11, 15, 17..22, 26), ühesa keskškolad (nomer 1..7, 9, 11), sädamižen keskuz D. Šervašidzen nimed, čomamahtoiden škol M.A. Vasinan nimed (nell' palakundad), «Lider»-sportškol.

Labinskan medicinine kolledž, agrarine tehnikum i socialiž-tehnine tehnikum oma lidnan professionaližen opendusen aluzkundoikš.

Galerei

• 
  Ph. Aleksandr Nevalaižen jumalanpert' (om saudud vspäi 2006), vn 2022 nägu
• 
  IS-3-tank Vägestusen torgul (2016)
• 
  Agrarižen tehnikuman tulend (2014)
• 
  Nevondkundaline lidnanznam

Irdkosketused

• Lidnankundan tobmuden sait (labinsk-city.ru). (ven.)