Pol'šanma

Rzeczpospolita Polska
Pol'šan Tazovaldkund

Pol'šanman znam Pol'šanman flag

Pol'šanma (pol'šan kelel: Polska, oficialine nimi - Pol'šanman Tazovaldkund (pol'šan kelel: Rzeczpospolita Polska)) om valdkund Keskevropas. Sen sijaduz om Baltijanmeren randal. Pol'šanmal oma mavaldkundröunad Germanijanke pohjoižel, Čehijanke suvipäivlaskmal, Slovakijanke suvel, Ukrainanke suvipäivnouzmal, Vaugedvenämanke päivnouzmal, Litvanmanke da Venämanke (Kaliningradan agjanke) pohjoižpäivnouzmal. Valdkundal oma mugažo merivaldkundröunad Danijanke da Ročinmanke.

Pol'šanman pind om 312 679 km² (ühesanz' sija Evropas). Eläjiden lugu om 38,1 millionad ristitud (koumanz’kümnenz’ koumnanz’ sija Mal). Pol'šanman Tazovaldkund jagase 16 sodaveikundoihe (vojevodstvoihe), kudambad jagase povätihe (ujezdoihe) da gminoihe (volostihe).

Pälidn da kaikiš järedamb lidn om Varšav.

Istorii

Ezmäižen Pol'šan valdkundan augonpanendan dat om 966 voz', konz pol'šalaine knäz' Meško I sai hristanuskondad. Vodelpäi 1025 Pol'š om kunigahuz, a vodel 1569 se ühtni Surenke Litvanman knäz'kundanke. Vodel 1795 Pol'š jagadihe paloihe, kudambad tegihe Prussijan, Avstrijan da Venäman territoirijoikš. Vodel 1807 Napoleon udessünduti Pol'šan valdkundan - Varšavan gercogkund. Vodel 1815 Venan kongrassan pätindoiden mödhe sen suremb pala tegihe möst Venälaižen Imperijan palaks. Pol'š sai ripmatomuz vodel 1918 Ezmäižen Mail'man soden jäl'ghe, no vodel 1939 Nevondkundaline Ühtištuz da Nacistine Germanii okkupiruiba ühtmudel Pol'šan. Toižen Mail'man soden jäl'ghe Pol'š ičeze uziš röunoiš udessündeuihe kut «socialistine» valdkund (Pol'šan Rahvahaline Tazovaldkund). Vodel 1989 vajehtused politižes da ekonomižes sistemiš tegihe Pol'šan demoktatižeks valdkundaks. 2004 voden semendkun 1 päiväspäi Pol'š om Evropan Ühtištusen ühtnii. 2010 voden sulakun 10 päiväl ozaižihe prezidentižen Tu-154:n lendimen katastrof Smolenskas. Siloi koliba Pol'šan prezident Leh Kačin'skij, toižed tetabad politikanmehed.

Galerei

• 

  Varšav

• 

  Varšav

• 

  Lüblin

• 

  Lüblin

• 

  Lüblin

• 

  Gdan'sk

Irdkosketused

• Pol'šan portal