Cimlänsk

Cimlänsk
Цимлянск
Lidnanznam;	Flag;
Valdkund	Venäma
Eläjiden lugu (2021)	14,731 ristitud
Pind	45 km²
Pämez'	Jevgenii Belänko; (reduku 2021—)
Telefonkod	+7−86 391-xx-xxx
Avtokod	61, 161
Aigvö	UTC+3 (MSK+0)

Cimlänsk (ven.: Цимля́нск) om Venäman lidn da lidnankund Rostovan agjan päivnouzmas, Volgodonskan pohjoine ezilidn. Se om agjan kaikiš penemb lidn eläjiden lugun mödhe, Cimlänskan rajonan administrativine keskuz.

Istorii

Ezmäine kozakišton Ust'-Ciml-lidnut (ven.: городок Усть-Цимла) mainitase vspäi 1672, möhemba Cimlänskai-stanic. Nimitihe sijadusen mödhe Ciml-jogen lanktendanno Donha (ven.: Цимла, nüg. 186 km pitte, ende 207 km). Šingotihe vinmarjan kazvatandal i jogavoččil jarmankoil. Vll 1950−1952 sirtihe stanicad udhe nügüdläižhe sijha Kumšackai-stanicale Donan oiktal randal; toine stanic mugomanke nimitusenke om olmas kaks'tištkümnes kilometras lodeheze lidnaspäi. Cimlänskan GES om saudud vll 1949−1954 türmatud mehiden vägil. Endevanh stanic i Cimlan jogensu oma upotadud. Vl 1950 kätihe stanicad Cimlänskii-radnikžiloks. Vspäi 1961 se om lidnan statusanke, Cimlänsk-nimitusenke.

Cimlänsk šingotase laivanmehanižel (gruntpompad i laivad niile^[1]) i mašinansauvomižen tegimil, sömtegimištol (vintegim, kalakombinat), elektrusen tehmižel (Cimlänskan GES) i kalankazvatusel. Volgodonskan eläjiden lebunsija, mineraližen veden purtked.

Geografijan andmused

Lidn sijadase rajonan suviröunanno, Kumšak-jogensunno (ven.: Кумша́к 121 km pitte) i Cimlänskan vezivaradimen päivlaskmaižel randal (Don-jogen oiged randpol'), 70 m ü.m.t. keskmäižel korktusel. Vezivaradimen pind om 35 m ü.m.t. kortte.

Matkad Rostovhasai Donal om 186 km päivlaskmha-lodeheze orhal, 237 km avtotel vai raudtel. Lähembaine lidn om Volgodonsk Donan vastrandal, viž kilometrad suvhe orhal, avtotedme vai raudtedme. Cimlänskai-raudtestancii radab vspäi 1951.

Tobmuz

Cimlänsk om lidnankundan üks'jäižeks eländpunktaks.

Lidnankundan tobmuden pämez' om sen Deputatoiden suiman ezimez', edel vn 2016 kül'mkud Administracijan pämez' oli lidnan pämehen. Edeline Deputatoiden suiman ezimez' om Tat'jana Krahmalec (kül'mku 2016 — reduku 2021). Lidnan Administracijan pämez' om Pavel Razumovskii vn 2021 redukuspäi. Edeližed lidnan Administracijan pämehed oma Nikolai Jeršov (reduku 2018 — reduku 2021), Vitalii Poläkov (radoi vn 2018 sügüz'kuhusai).

Eläjad

Vl 1939 stanican ristitišt oli 4 400 eläjad. Vn 2010 Venäman rahvahanlugemižen mödhe lidnan eläjiden lugu oli 15 028 ristitud, rajonan nell' ühesandest, vn 2021 — 14 731 ristitud. Kaik 14 558 eläjad oli lidnas vl 2017. Kaikiš suremb lidnan ristitišt oli 16 300 eläjad vl 1996.

Rahvahad (2010): venälaižed — 93,2 %, ukrainalaižed — 1,9 %, toižed rahvahad — 4,9 %.

Ortodoksižen hristanuskondan koume pühäpertid^[2] om saudud lidnas: ph. Mikulai-čudonsädajan jumalanpert', ph. Panteleimon-spravitajan jumalanpert', üks' časoun'.

Lähembaižed professionaližen opendusen aluzkundad ratas Volgodonskas.

Galerei

Lidnan kul'turkeskuz (2009, ende Komsomolec-kinoteatr)
Sanatorii istorižes keskuses, vn 2009 nägu
Laivanmehanine tegim vl 2011
Fizkul'turine tervehtamižkompleks (2009)
Cimlänskan GES:an padosein (2009)

Homaičendad

Irdkosketused

Lidnan tobmuden aluzkundoiden sait (tsimlyansk-gorod.ru) (ven.)

Cimlänsk Vikiaitas

	Rostovan agjan lidnad
	Aksai \| Azov \| Bataisk \| Cimlänsk \| Doneck \| Gukovo \| Kamensk Šahtil \| Konstantinovsk \| Millerovo \| Morozovsk \| Novočerkassk \| Novošahtinsk \| Proletarsk \| Rostov Donal \| Rusked Sulin \| Sal'sk \| Semikarakorsk \| Šahti \| Zernograd \| Zverevo \| Taganrog \| Vauged Kalitv \| Volgodonsk

[1] Cimlänskan laivanmehanižen tegimen sait (csmz.ru). (ven.)

[2] Cimlänskan pühäpertid sobory.ru-saital. (ven.)

[1]

[2]