Zernograd
Lidnanznam
|
Flag
|
| Valdkund | Venäma |
| Eläjiden lugu (2021) | 24,076 ristitud |
| Pind | 12,36 km² |
| |
| Pämez' | Larisa Šapovalova (kezaku 2023—) |
| Telefonkod | +7−86 359-xx-xxx |
| Avtokod | 61, 161 |
| Aigvö | UTC+3 (MSK+0) |
Zernograd (ven.: Зерногра́д) om Venäman lidn da lidnankund Rostovan agjan suvipäivlaskmas. Se om Zernogradan rajonan administrativine keskuz.
Istorii
[vajehta | vajehtada lähtetekst]Eländpunktan aluz om pandud vl 1929 kuti žilo Verblüd-raudtesarakonno tedoidamha vill'sovhozan ižandusen formad. Vn 1933 10. päiväl uhokud registriruihe žilod Zernovoi-nimitusenke. Toižen mail'man sodan aigan se oli okkupiruidud nacistoil (30.07.1942 — 30.01.1943), i tedoinstitut oli evakuiruidud Kustanai-lidnha (Kazahstan). Tedolidnut sai lidnan statusad vl 1951. Udesnimitihe nügüdläižikš vl 1960.
Zernograd šingotase opendusen i tedon aluzkundoil, mašinansauvomižel (maižanduzmašinad[1], materialad i tehnik sadun täht), sauvondmaterialiden pästandal (torved, stökolpaketad), sömtegimištol (surmän edheotand, kalankazvatand). Maižandusen koume tedoinstitutad ratas lidnas.
Geografijan andmused
[vajehta | vajehtada lähtetekst]Lidn sijadase rajonan keskuzpalas, Kagal'nik-jogen basseinas (ven.: Кагальник 162 km pitte, lankteb Azovmerhe), 85 m ü.m.t. keskmäižel korktusel.
Matkad Rostovhasai Donal om 61 km lodeheze orhal, 77 km avtotel vai raudtel. Toižed lähembaižed lidnad oma Bataisk 54 km lodeheze orhal, 64 km avtotedme vai raudtedme, i Sal'sk 103 km suvipäivnouzmha-päivnouzmha orhal, 121 km avtotedme vai raudtedme. Zernograd-raudtestancii (edel 1973. vot Verblüd) radab «Bataisk — Sal'sk»-keskustal. «Zernograd»-sodalendimport i sodajaguz oma kudes kilometras päivnouzmha lidnaspäi.
Tobmuz
[vajehta | vajehtada lähtetekst]Kaik kahesa žilod i kaks' futorad mülüdas lidnankundha Zernogradan ližaks.
Lidnankundan tobmuden pämez' om sen Deputatoiden suiman ezimez'. Edeližed suiman ezimehed oma Vladimir Adamenko (reduku 2021 — kezaku 2023), Aleksandr Smolenskii (kül'mku 2016 — reduku 2021). Lidnankundan Administracijan pämez' om Irina Poliščuk vn 2023 heinkuspäi, mugažo hän oli sen radnikusel vn 2022 vilukus-kezakus. Edeline Administracijan pämez' om Anatolii Račkov (reduku 2018 — kül'mku 2021).
Eläjad
[vajehta | vajehtada lähtetekst]Vl 1939 žilon ristitišt oli 8 800 eläjad. Vn 2010 Venäman rahvahanlugemižen mödhe lidnan eläjiden lugu oli 26 842 ristitud, lidnankundan — 30 849 ristitud, rajonan pol'. Vn 2021 rahvahanlugemižen mödhe lidnan ristitišt oli 24 076 eläjad. Kaik 24 886 ristitud elihe lidnas i 28 588 ristitud kaikes lidnankundas vl 2017. Kaikiš suremb lidnan ristitišt oli 28..29 tuhad eläjad vll 1996−2006 (29 700 rist. vl 1998).
Rahvahad (2010): venälaižed — 94,6 %, ukrainalaižed — 1,8 %, armenijalaižed — 1,3 %, toižed rahvahad — 2,3 %.
Ortodoksižen hristanuskondan Pühän Jumalanmaman Tulendan Pühäpertihe jumalanpert'[2] om saudud lidnas vll 2005−2014.
Lapsiden opendusen aluzkundad oma seičeme päivkodid, koume keskškolad (nomer 2, 14, 16), gimnazii (nomer 1), licei (nomer 3), 5. toižendan škol-internat, lapsiden sädamižen «Jermak»-pert', muzikškol, olimpižen varan üläkategorijan sportškol. Professionaližen opendusen aluzkundad oma Zernogradan pedagogine kolledž[3], Zernogradan agrotehnologijoiden tehnikum[4], Azovan-Mustmeren inženerine institut — Donan valdkundaližen agrarižen universitetan filial[5].
Galerei
[vajehta | vajehtada lähtetekst]-
Lidnan i rajonan tobmuden aluzkundoiden pert' (2018) -
«Gloria Jeans»-kompanijan omblendfabrik vl 2018 -
Zernogradan pedagogine kolledž vl 2018 -
Lidnan kul'turkeskuz (2018) -
Zernograd-päraudtestancii vl 2009
Homaičendad
[vajehta | vajehtada lähtetekst]- ↑ Maižanduzmašinoiden kompanijan sait (uvagro.ru). (ven.)
- ↑ Zernogradan pühäpertid sobory.ru-saital. (ven.)
- ↑ Zernogradan pedagogižen kolledžan sait (zernpc.ru). (ven.)
- ↑ Zernogradan agrotehnologijoiden tehnikuman sait (nporopl92.ru). (ven.)
- ↑ Azovan-Mustmeren inženerižen institutan sait (ачгаа.рф). (ven.)
Irdkosketused
[vajehta | vajehtada lähtetekst] |
Zernograd Vikiaitas |
| Rostovan agjan lidnad | ||
| Aksai | Azov | Bataisk | Cimlänsk | Doneck | Gukovo | Kamensk Šahtil | Konstantinovsk | Millerovo | Morozovsk | Novočerkassk | Novošahtinsk | Proletarsk | Rostov Donal | Rusked Sulin | Sal'sk | Semikarakorsk | Šahti | Zernograd | Zverevo | Taganrog | Vauged Kalitv | Volgodonsk | ||