Novošahtinsk

Novošahtinsk
Новошахтинск

Lidnanznam	Flag
Valdkund	Venäma
Eläjiden lugu (2025)	100,738 ristitud
Pind	136 km²
Pämez'	Jurii Ušanev (sügüz'ku 2018—)
Telefonkod	+7−86 369-xx-xxx
Avtokod	61, 161
Aigvö	UTC+3 (MSK+0)

Novošahtinsk (ven.: Новоша́хтинск) om Venäman lidn da lidnümbrik Rostovan agjan päivlaskmas. Se om agjan seičemenz' lidn eläjiden lugun mödhe.

Istorii

Ezmäižed mainitesed kivihiles sijaližen man pindal datiruišoiš vl 1696. Sil-žo aigal zavottihe hilen samišt — Donbassan otandad kävutamižhe. Eländpunktad nügüdläižen lidnan territorijal oliba vspäi 1840. Nesvetai-kaivuz oli tetab 20. voz'sadan augotišes, nimitihe jogen mödhe. Panihe viden järedan kaivuden alust vl 1913 da saudihe raudtesarakod. Vn 1939 31. päiväl vilukud ühtištuihe Molotovskii- i Kominternovskii-žiloid da anttihe lidnan statusad nügüdläiženke nimitusenke. Lidn oli okkupiruidud nacistižen Germanijan sodavägil (23.07.1942 — 13.02.1943) Toižen mail'man sodan aigan. Vspäi 2003 kaik kivihilen samižen kaivused oma sauptud.

Novošahtinsk šingotase sauvondmaterialiden pästandal (vahtbeton, metalližed tegesed), metallan i pun ümbriradmižel, omblendfabrikal («Gloria Jeans»), kivivoinümbriradmižen tegimel (vspäi 2009), sömtegimištol, mugažo openduzmeblin tehmižel.

Geografijan andmused

Lidnan sijaduz agjas vn 2010 kartal

Lidn sijadase 130 m ü.m.t. keskmäižel korktusel. Pen' Nesvetai-jogi augotase lidnan pohjoižes (ven.: Малый Несветай 48 km pitte, Donan oigedpol'ne bassein) 200 m ü.m.t. korktusel, se läbitab lidnan pohjošt i suved.

Lidnümbrik röunatab Oktäbrin rajonanke suves i Rusttan Sulinan rajonanke pohjoižes. Matkad Ukrainan Luganskan agjan röunhasai om kümne kilometrad lodeheze orhal, Rostovhasai Donal om 62 km suvhe orhal vai 75 km avtotel. Lähembaižed lidnad oma Šahti 15 km päivnouzmha orhal vai 20 km avtotedme, Rusked Sulin vides kilometras pohjoižpäivnouzmha orhal vai 10 km avtotedme, Gukovo 25 km pohjoižhe orhal vai 30 km avtotedme, i Zverevo 25 km pohjoižhe-pohjoižpäivnouzmha orhal vai 45 km avtotedme.

Röunpäličmänendtaho om saudud Ukrainan röunal. Nesvetai-raudtestancii radoi paloin muretud koumekümnekilometrižel sarakol «Roston Donal — Moskv»-keskustaspäi. E50-avtomaršrut läbitab lidnad suvipäivnouzmaspäi lodeheze, se ühtenzoitab «Don»-avtotrassad (M4, kümnes kilometras suvipäivnouzmha) Ukrainan röunanke.

Tobmuz

Novošahtinsk om lidnümbrikon üks'jäižeks eländpunktaks, olnuded lähižed žilod mülütadas lidnha vspäi 2004.

Eläjad

Vl 1939 lidnan ristitišt oli 48 000 eläjid. Vn 2010 Venäman rahvahanlugemižen mödhe lidnan eläjiden lugu oli 111 075 ristitud, vn 2021 — 103 480 ristitud. Kaik 108 782 eläjad oli lidnas vl 2017. Kaikiš suremb lidnan ristitišt oli 116 200 eläjad vl 2005.

Rahvahad (ozutadud rahvahudenke vl 2010): venälaižed — 94,7 %, ukrainalaižed — 1,6 %, toižed rahvahad — 3,7 %.

Ortodoksižen hristanuskondan nell' pühäpertid oma avaitud lidnas.

Openduz

Lapsiden opendusen aluzkundad oma päivkodid, keskškolad.

Professionaližen opendusen aluzkund om Novošahtinskan avtotransportine tehnikum, mugažo profopenduz andase neniden aluzkundoiden koumes filialas: Šahtin poltusen da energetikan regionaline kolledž, Suvine federaline universitet (Rostov Donal), Suvivenäman valdkundaline tehnine universitet (Rostov Donal).

Galerei

• 
  Lidnan Duman i Administracijan sauvuz (2010)
• 
  Donan Jumalanmaman jumalaižen ortodoksine jumalanpert', vn 2010 nägu
• 
  Novošahtinskan avtobusstancii vl 2010

Irdkosketused

• Lidnan tobmuden aluzkundoiden sait (novoshakhtinsk.org) (ven.)