Rusked Sulin

Rusked Sulin
Красный Сулин
Lidnanznam;	Flag;
Valdkund	Venäma
Eläjiden lugu (2021)	35,697 ristitud
Pind	93,6 km²
Pämez'	Roman Sverdlov; (reduku 2023—)
Telefonkod	+7−86 367-xx-xxx
Avtokod	61, 161
Aigvö	UTC+3 (MSK+0)

Rusked Sulin (ven.: Кра́сный Сули́н) om Venäman lidn da lidnankund Rostovan agjan päivlaskmas. Se om Rusttan Sulinan rajonan administrativine keskuz da pala.

Istorii

Ezmäižen eländpunktan aluz om pandud vl 1797 kuti Sulin-futor. Möhemba panihe toižiden futoriden alusid, sidä kesken Skelevatskii-futor. Sulinan metallurgine tegim (teraz, raudtegesed) oli lidnan päedheotandaks vll 1874−2009, tegimen tobj pala om likvidiruidud. Vl 1926 ühtištadihe Sulinad lähižidenke eländpunktoidenke da anttihe lidnan statusad nügüdläiženke nimitusenke. Lidn oli okkupiruidud nacistižen Germanijan sodavägil (21.07.1942 — 14.02.1943) Toižen mail'man sodan aigan.

Rusked Sulin šingotase terazpalliškoiden tehmižel («Južstal'»), sauvondmaterialiden pästandal (stökollehtesed, šebin', mineraline izoläcii), leibän edheotandal i villänpurnuil.

Geografijan andmused

Lidn sijadase rajonan suviröunanno, Kundrüčj-jogen hural randal tobjimalaz (ven.: Кундрю́чья 244 km pitte, Severskii Doncan oiged ližajogi) i sen huran Gniluš-ližajogen randoil (ven. Гнилуша), 150 m ü.m.t. keskmäižel korktusel. Nesvetaiskoje-vezivaradim (viž nellikkilometrad) om ani suvipäivlaskmha lidnaspäi, saudihe vll 1936−1937.

Matkad lidnaspäi Rostovhasai Donal om seičemekümne kaks' kilometrad suvhe-suvipäivlaskmha orhal, 98 km avtotel vai raudtel. Lähembaižed lidnad oma Šahti vižtoštkümne kilometrad suvhe-suvipäivnouzmha orhal, 25 km avtotedme vai raudtedme, Novošahtinsk viž kilometrad suvipäivlaskmha orhal, kümne km avtotedme vai raudtedme, Gukovo 15 km lodeheze orhal, avtotedme vai raudtedme, i Zverevo 15 km pohjoižhe orhal, 35 km avtotedme vai 20 km raudtedme. Sulin-raudtestancii radab lidnan päivnouzmaižes palas vspäi 1871. «Don»-mante (M4) mäneb päivnouzmha lidnaspäi kudes kilometras.

Tobmuz

Rusked Sulin om lidnankundan üks'jäižeks eländpunktaks.

Lidnankundan tobmuden pämez' om sen Deputatoiden nevondkundan ezimez'. Edeline nevondkundan ezimez' om Natal'ja Malikova (reduku 2018 — reduku 2023). Lidnan Administracijan pämez' om Aleksei Moskalenko vn 2023 redukuspäi. Edeline Administracijan pämez' om Pavel Gruzinov (eloku 2018 — reduku 2023).

Eläjad

Vl 1939 lidnan ristitišt oli 33 900 eläjad. Vn 2010 Venäman rahvahanlugemižen mödhe lidnan eläjiden lugu oli 40 866 ristitud, rajonan pol', vn 2021 — 35 697 ristitud. Vl 2017 lidnan ristitišt oli 38 567 eläjad. Kaikiš suremb lidnan ristitišt oli 43..47 tuhad eläjid vll 1989−2006 (47 200 rist. vl 1996).

Rahvahad (ozutadud rahvahudenke vl 2010): venälaižed — 95,1 %, ukrainalaižed — 1,4 %, armenijalaižed — 1,3 %, toižed rahvahad — 2,2 %.

Ortodoksižen hristanuskondan kaks' jumalanpertid^[1] oma saudud lidnas.

Openduz

Lapsiden opendusen aluzkundad oma päivkodid, keskškolad.

Rusttan Sulinan tehmižtehnologijoiden kolledž^[2] om lidnan professionaližen opendusen aluzkundaks.

Galerei

Ph. Jekaterinan jumalanpert', vn 2013 nägu
Enččen Sulinan metallurgižen tegimen pätulend vn 2013 keväz'kus
Metallurgiden kul'turkeskuz Vägestusen memorialanke ezimal vn 2007 uhokus
Sulin-päraudtestancijan sauvuz vl 2013

Homaičendad

Irdkosketused

Lidnan tobmuden aluzkundoiden sait (ksulin.donland.ru) (ven.)

Rusked Sulin Vikiaitas

	Rostovan agjan lidnad
	Aksai \| Azov \| Bataisk \| Cimlänsk \| Doneck \| Gukovo \| Kamensk Šahtil \| Konstantinovsk \| Millerovo \| Morozovsk \| Novočerkassk \| Novošahtinsk \| Proletarsk \| Rostov Donal \| Rusked Sulin \| Sal'sk \| Semikarakorsk \| Šahti \| Zernograd \| Zverevo \| Taganrog \| Vauged Kalitv \| Volgodonsk

[1] Rusked Sulin-lidnan pühäpertid sobory.ru-saital. (ven.)

[2] Rusttan Sulinan tehmižtehnologijoiden kolledžan sait (kkpt-sulin.iro61.ru). (ven.)

[1]

[2]