Kamensk Šahtil

Kamensk Šahtil
Каменск-Шахтинский

Lidnanznam	Flag
Valdkund	Venäma
Eläjiden lugu (2019)	88,319 ristitud
Pind	160 km²
Pämez'	Aleksei Černenko (sügüz'ku 2015—)
Telefonkod	+7−86 365-xx-xxx
Avtokod	61, 161
Aigvö	UTC+3 (MSK+0)

Kamensk Šahtil (ven.: Ка́менск-Ша́хтинский) om Venäman lidn da lidnümbrik Rostovan agjan päivlaskmas-lodehes. Se om agjan kahesanz' lidn eläjiden lugun mödhe.

Istorii

Eländpunktan aluz om pandud vl 1671 kuti Kamenskai-stanic (ven.: станица Каменская), nügüd'aigaižel sijal vspäi 1817, sirtihe regulärižiden sur'veziden tagut. Stanic sai lidnan statusad kuti Kamensk-lidn vn 1927 28. päiväl keväz'kud. Om nügüdläiženke nimitusenke vn 1929 elokuspäi. Vll 1923−1935 i 1940−1989 lidn oli Kamenskan rajonan administrativižeks keskuseks. Toižen mail'man sodan aigan lidn oli okkupiruidud nacistoil (18.07.1942—13.02.1943).

Kamensk Šahtil šingotase kivihilen samižel, himižkombinatal (polimerad) i kivivoinajajal tegimel, mašinansauvomižel (gazmašiništ, kaivuzmašiništ), sauvondmaterialiden pästandal (savič, pun ümbriradmine), sömtegimištol (konditerine fabrik, leibänkombinat), mugažo «Gloria Jeans»-torguindmarkan omblendfabrik radab lidnas.

Geografijan andmused

Lidn sijadase Severskii Donc-jogen oiktal randal (Donan oiged ližajogi), 23..137 m korktusil, 60 m ü.m.t. keskmäižel korktusel. Om ümbärtud Kamenskan rajonan territorijal. Matkad Ukrainan Luganskan agjan röunhasai om 15 km päivlaskmha orhal, Rostovhasai Donal om 129 km suvhe orhal, 143 km avtotel vai raudtel. Lähembaižed lidnad (Kamenskan Šahtil keskusespäi) oma Zverevo 30 km suvhe orhal, 35 km avtotedme vai raudtedme, Doneck 15 km päivlaskmha orhal, 25 km avtotedme vai raudtedme, i Vauged Kalitv 42 km päivnouzmha-suvipäivnouzmha orhal, 57 km avtotedme vai raudtedme. «Don»-mante (M4) ümbärdab lidnad päivnouzmaspäi. Kamenskai-raudtestancii (ven.: Каменская) i Lihai-raudtesol'm (ven. Лихая) ratas lidnas.

Kamensk Šahtil om lidnümbrikon üks'jäine eländpunkt.

Eläjad

Vl 1939 žilon ristitišt oli 42 700 eläjad. Vn 2010 Venäman rahvahanlugemižen mödhe eläjiden lugu oli 95 296 ristitud. Kaikiš suremb lidnan ristitišt oli 96 600 eläjad vl 2005, mülütihe kaht lidnanvuittušt Zavodskoi- i Lihovskoi-žilod lidnha sil vodel.

Rahvahad (2010): venälaižed — 95,0%, ukrainalaižed — 1,7%, toižed rahvahad — 3,3%.

Professionaližen opendusen aluzkundad oma Kamenskan Šahtil medicinine kolledž, Kamenskan pedagogine kolledž, Kamenskan himiž-mehanine tehnikum i Lihovskoin raudtetransportan tehnikum, mugažo Suvivenäman valdkundaližen politehnižen universitetan (Novočerkassk) Kamenskan institut-filial.

Galerei

• 
  Lidnümbrikon tobmuden sauvuz (2009)
• 
  Jumalanmaman katken ortodoksine pühäpert' (2010)
• 
  Kamenskan institut (2006)
• 
  «NSTÜ:n legendad»-muzei
• 
  Lihai-raudtestancii (2019)

Irdkosketused

• Lidnan tobmuden aluzkundoiden sait (kamensk.donland.ru) (ven.)