Proletarsk (lidn)

Proletarsk
Пролетарск

Valdkund	Venäma
Eläjiden lugu (2021)	18,983 ristitud
Pind	14 km²
Pämez'	Nikolai Detkin (kül'mku 2021—)
Telefonkod	+7−86 374-xx-xxx
Avtokod	61, 161
Aigvö	UTC+3 (MSK+0)

Proletarsk (ven.: Пролета́рск) om Venäman lidn, lidnankund da transporttesol'm Rostovan agjan suves. Se om Proletarskan rajonan administrativine keskuz.

Istorii

Amuine lidnut oli olmas torguindtel Kavkazaspäi. Nügüdläižen eländpunktan aluz om pandud Kara-Čaplak-tahondas 17. voz'sadal. Tundištihe sidä stanicaks oficialižikš vn 1875 3. päiväl heinkud da anttihe Velikoknäžeskai-nimitust (ven.: станица Великокняжеская). Udesnimitihe sidä Proletarskai-stanicaks VCIK:an käskön mödhe vn 1925 elokun 17. päiväspäi. Toižen mail'man sodan aigan eländpunkt oli muretud paloin. Stanic sai lidnan statusad nügüdläiženke nimitusenke vn 1970 24. päiväl heinkud.

Proletarsk šingotase kabelän tegimel, hebonvodinfermal, sömtegimištol (leibproduktoiden kombinat, Rosrezerv:an «Kavkaz»-edheotand, kalategim).

Geografijan andmused

Lidn sijadase rajonan keskuzpalas, Kuman da Maničun alangos, Vesölovskoje-vezivaradimen Čeprak-lahten oiktal randal (Donan huran Manič-ližajogen vago), 15 m ü.m.t. keskmäižel korktusel. Vezivaradimen pind om 238 km², 10 m ü.m.t., täuttihe vl 1941. Proletarskan vezivaradimen padosein om saudud vl 1936, se sijadase jogen pävagol kümnes kilometras suvipäivlaskmha Maničstroi-žilonno.

Matkad Kalmikijan röunhasai om 25 km suvipäivnouzmha orhal, Rostovhasai Donal om 164 km päivlaskmha-lodeheze orhal, 215 km avtotel vai raudtel. Lähembaine lidn om Sal'sk 29 km suvipäivlaskmha orhal, 32 km avtotedme vai raudtedme. Proletarskai-raudtestancii (ven.: Пролетарская) radab «Sal'sk — Volgograd»-keskustal vspäi 1899.

Tobmuz

Kaik koume pen't žilod mülüdas lidnankundha Proletarskan ližaks: Kirsalovo, Konarmeiskii, Primaničskii.

Lidnankundan tobmuden pämez' om sen Deputatoiden suiman ezimez'. Edeline Deputatoiden suiman ezimez' om Nadežda Kuz'mina (kül'mku 2016 — kül'mku 2021). Lidnankundan Administracijan pämez' om Maksim Tolpinskii vn 2019 redukuspäi. Edeline lidnan Administracijan pämez' om Sergei Ponomar' (reduku 2016 — heinku 2019).

Eläjad

Vl 1939 stanican ristitišt oli 11 300 eläjad. Vn 2010 Venäman rahvahanlugemižen mödhe lidnan eläjiden lugu oli 20 267 ristitud, rajonan viž ühesandest, vn 2021 — 18 983 ristitud. Kaik 19 290 eläjad oli lidnas vl 2017. Lidnan ristitišton lugu vajehtase 19..20 tuhad eläjid röunoiš vspäi 1979, kaikiš suremb oli 20 300 ristitud vl 2011.

Rahvahad (2010): venälaižed — 92,7 %, čiganalaižed — 2,4 %, armenijalaižed — 1,3 %, toižed rahvahad — 3,6 %.

Ortodoksižen hristanuskondan koume pühäpertid oma lidnas: phh. Floran da Lavran kaks' jumalanpertid (letud vl 1879 om udessündutadud, i saudud vll 1989−1993), ph. Aleksandr Nevalaižen päjumalanpert' (oli saudud vll 1909−1911, panihe mantazole vll 1936−1937, om udessündutamižes).

Lapsiden opendusen aluzkundad oma viž päivkodid (nomer 3, 5, 6, 15 i 32), licei nomer 1, gimanzii nomer 3, koume keskškolad (nomerad 4, 5, 6), lapsiden ližaopendusen keskuz, čomamahtoiden škol, lapsiden da norišton sportškol. Proletarskan agrotehnologine tehnikum om lidnan professionaližen opendusen aluzkundaks.

Irdkosketused

• Lidnankundan lehtpoled rajonan tobmuden aluzkundoiden proletarsk.donland.ru-saital. (ven.)