Konstantinovsk

Konstantinovsk
Константиновск

Lidnanznam	Flag
Valdkund	Venäma
Eläjiden lugu (2019)	17,055 ristitud
Pind	20 km²
Pämez'	Jekaterina Gavrilenko (reduku 2016—)
Telefonkod	+7−86 393-xx-xxx
Avtokod	61, 161
Aigvö	UTC+3 (MSK+0)

Konstantinovsk (ven.: Константи́новск) om Venäman lidn da lidnankund Rostovan agjan keskuzpalas. Se om Konstantinovskan rajonan administrativine keskuz (vspäi 1924).

Istorii

Eländpunkt mainitase ezmäižen kerdan vn 1593 «Aigkirj Voronežaspäi Don-jogel Azovhasai i Mustmerhesai»-dokumentas kuti kozakoiden Babei-lidnut (ven.: городок Бабей, Бабинский городок) Donan sarel i Ülärazdorad-eländpunkt (ven. Верхние Раздоры), möhemba Babskai-stanic (ven. станица Бабская). Vl 1839 ühtenzoittihe Vedernikovskai- i Babskai-stanicoid da nimitihe Konstantinovskai-stanicaks (ven. станица Константиновская) Konstantin Romanov-ruhtinasen nimen mödhe.

Vl 1850 panihe stanican alust udel sijal i sirtihe eläjid sihe vodele 1864. Stanic kändihe 1. Donan ümbrikon keskuseks. Vspäi 1941 se oli Konstantinovsk-radnikžiloks. Toižen mail'man sodan aigan stanic oli okkupiruidud nacistoil (heinku 1942 — 18.01.1943). Radnikžilo sai lidnan statusad vn 1967 20. päiväl kül'mkud. Vodele 1982 Konstantinovskan gidrosol'men (šlüzad) sauvond tuli lophu «Don — Volg»-vezitel.

Konstantinovsk šingotase maižanduzprodukcijan ümbriradmižel (vinedheotand) i jogiportal. Lidn om ümbärtud maižanduzrajonal (vinmarjan i villän kazvatand, živatvodind). Kozakoiden hebonkeskuz, vinfestival'. Ende radoiba kalategim, voitegim, savičtegim, betontegim.

Geografijan andmused

Lidn sijadase rajonan suvipäivlaskmaiženno röunanno, Donan oiktal randal, 40 m ü.m.t. keskmäižel korktusel. Matkad Rostovhasai Donal om 112 km päivlaskmha-suvipäivlaskmha orhal vai 153 km avtotel. Lähembaine lidn om Semikarakorsk 23 km päivlaskmha-suvipäivlaskmha orhal vai 35 km avtotedme. Avtotesild lidnanno ühtenzoitab Donan randoid.

Viž futorad mülüdas lidnankundha Konstantinovskan ližaks: Hräščevskii, Kostino-Gorskii, Mihailovskii, Starozolotovskii, Vedernikov. Lidnankundan pind — 298 km².

Eläjad

Vl 1939 stanican ristitišt oli 9 065 eläjad. Vn 2010 Venäman rahvahanlugemižen mödhe lidnan eläjiden lugu oli 17 926 ristitud, lidnankundan — 20 241 ristitud, rajonan koume videndest. Kaikiš suremb lidnan ristitišt oli enamba 18 tuhad eläjid vll 1989−2009 (18 800 rist. vl 1996, 2002−2003). Kaik 19 617 ristitud elihe lidnankundas vl 2017.

Rahvahad (2010): venälaižed — 93,9%, armenijalaižed — 1,8%, ukrainalaižed — 1,5%, toižed rahvahad — 2,8%. Ortodoksižen hristanuskondan viž pühäpertid oma olmas lidnas.

Professionaližen opendusen aluzkundad oma Konstantinovskan pedagogine kolledž, Konstantinovskan tehnologine tehnikum i Konstantinovskan agrovettehnologijoiden i ohjandusen tehnikum (maižanduztehnikum).

Irdkosketused

• Lidnan tobmuden aluzkundoiden sait (адмконст.рф) (ven.)
• Lidnan da rajonan informacine sait (konstantinovsk.ru). (ven.)