Guančžou

Guančžou
广州市
Valdkund	Kitai
Eläjiden lugu (2020)	18,676,605 ristitud
Pind	7 434,4 km²
Pämez'	Sun' Čžijan; (孙志洋 Sun Zhiyang,; viluku 2024—)
Telefonkod	+86−20
Aigvö	UTC+8

Guančžou (kit.: 广州 / 廣州, pin'jin' Guǎngzhōu [kwàŋ.ʈʂóu], sijaline kantonine virkand [kʷɔ̌ːŋ.tsɐ̂u] vai [kʷɔ̌ːŋ.tsɐ́u]) om Kitain lidn da lidnümbrik valdkundan suves. Se om valdkundan nellänz' lidn eläjiden lugun mödhe, Guandun-agjan administrativine keskuz. Ende nimitihe Evropas lidnad-ki agjan mödhe Kanton:aks sijaližel paginal.

Istorii

Eländpunktan aluz om pandud enamba 2 tuhad vozid tagaz, oficialižen legendan mödhe — vl 862 edel meiden erad. Kaiken oli meriportaks, Šuukte meredme zavodihe neciš lidnas, verhad mad veiba ujuden kitajižid tavaroid. Vhesai 1840 Kantonan meriport oli üks'jäine avaitud Kitaiš evropalažiden torguindlaivoiden täht.

Guančžou šingotase omblendtegimištol, tavaroiden möndal tukuil (enamba 100 torgusid), kalankazvatusel, veroližen pramozlan tavaroil, tegimil (laivansauvomine, mašinansauvomine, himižed substancijad, elektropalad, koditehnik, cement, lehtezbumag, sahar, velosipedad). Kantonan jarmank (angl.: CECF, Canton Fair) oleleb kahtišti vodes. Vl 2018 lidnan nominaline kogosüdäiprodukt oli US$347 mlrd (US$23,963 ühtele hengele).

Geografijan andmused

Lidn sijadase sadas kilometras pohjoižhe Hel'mesižen jogen del't-regionaspäi, Čžuczän-jogen randal (lankteb Kitain Suvimerhe), 21 m ü.m.t. keskmäižel korktusel.

Matkad lidnan keskusespäi Makaohosai om 145 km suvhe, Honkonghasai — 120 km suvhe-suvipäivnouzmha. Lähembaižed lidnümbrikod oma Fošan', Dunguan', Hoičžou, Čžunšan'.

Klimat om subtropine hätkeliženke mussonsezonanke, pil'vekaz, uhokus-sulakus eriližešti. Voden keskmäine lämuz om +22,4 C°, kezakun-sügüz'kun +27,4..+28,9 C°, tal'vkun-uhokun +13,8..+15,5 C°. Absolütine minimum om −0,3 C° (tal'vku), maksimum +39,1 C° (semendku-heinku). Il'man lämuz voib ületada +28 C° miččel taht kul, ei voi olda madalamb mi +18 C° kezakus-elokus. Paneb sadegid 1950 mm vodes, enamba sulakus-sügüz'kus (194..365 mm kus), vähemba kül'mkus-tal'vkus (33..37 mm kus). Voib panda halad tal'vkus i uhokus, paneb lunt läz kerdan voz'sadas. Kun keskmäine relätivine nepsuz vajehtase 76..82 % röunoiš uhokus-sügüz'kus, 67..72 % redukus-vilukus.

Tobmuz

Guančžou jagase üks'toštkümneks nimitadud rajonaks (edel 2014. vot oli 12), ned alajagasoiš 170 ühtnikaks: 135 alarajonad (irdališt komitetad) i 35 lidnad.

Edeližed merad oma Go Junhan (郭永航, viluku 2022 — reduku 2023), Ven' Gohuei (温国辉, viluku 2016 — tal'vku 2021).

Eläjad

Vn 2010 rahvahanlugemižen mödhe lidnümbrikon eläjiden lugu oli 12,780,000 ristitud. Kaik 14,498,400 eläjad oli lidnümbrikos vl 2017. Kaikiš suremb lidnümbrikon ristitišt om nügüd'. Tulnuded radnikad ottas enamba pol't ristitištos, hö vajehtasoiš joga koume-nell' kud. Hukou:n kart röunatab legaližen migracijan.

Transport

Metro, kiruhavtobusad, trolleibusad, taksid i jogiastjad oma kundaližeks transportaks lidnas. Metropoliten radab vspäi 1999 (kit.: 广州地铁 Guǎngzhōu dìtiě, ühtes Fošanin metronke vspäi 2019 om 14 jonod 259 stancijanke, 476 km raudted). Kiruhjonused tuldas Uhanišpäi.

Rahvahidenkeskeine civiline Guančžou Baijun' -lendimport^[1] (Baijun' — «vauktad pil'ved», CAN / ZGGG, 73,3 mln passažiroid i 1,9 mln tonnoid jüguid vl 2019) sijadase kaks'kümnes kahesas kilometras pohjoižhe lidnan keskuzpalaspäi. Tehtas reisid Suvipäivnouzmaižen Azijan maihe i Kitain äjihe lidnoihe, mugažo mail'madme.

Galerei

Iisusan Pühän Südäimen riman katoline päjumalanpert', vn 2018 nägu (om saudud vll 1863−1888)
Guančžoun uz' azjaline keskuz vl 2016
Üläkorged kommertine Guančžou juan' -pert' kehkruden nagül vl 2013 (138 m kortte, 33 manpälišt žirud i kaks' manalašt). Se om Guangdong Plastic Exchange-torguindkeskusen sijaduz
Lidnan kirjišt (2016)
Lidnan oper (2011)
Rahvahidenkeskeižen Guančžou Baijun' -lendimportan terminal nomer 2 vl 2020
Guančžou Pohjoine-päraudtestancii vl 2010 (Guančžoubei)