Hadižensk

Hadižensk
Хадыженск

Lidnanznam	Flag
Valdkund	Venäma
Eläjiden lugu (2023)	21,829 ristitud
Pind	17 km²
Pämez'	Julija Zaharova (tal'vku 2018—)
Telefonkod	+7−86 152-xx-xxx
Avtokod	23, 93, 123
Aigvö	UTC+3 (MSK+0)

Hadižensk (ven.: Хады́женск, adig.: Хъыдыжъы) om Venäman lidn da lidnankund Krasnodaran randan suves, sen Apšeronskan rajonas.

Istorii

Eländpunktan aluz om pandud kozakoil vl 1864 kuti Hadiženskai-stanic (ven.: станица Хадыженская) čerkesalaižiden tactud Hadiži-aulan sijas. Vl 1909 löutihe kivivoid stanicanno, i ristitišt ližadui teravas. Kätihe stanicad Hadiženskii-radnikžiloks edel 1936. vot. Žilo sai lidnan statusad nimen nügüdläiženke variantanke vn 1949 28. päiväl sügüz'kud.

Hadižensk šingotase sömtegimišton (leibkombinat, oluden tegim, sijaližen mineraližen veden butiliruind), mašinansauvomižen tegimel (burauduzmašiništ, metalližkonstrukcijad, modul'pertid) i kivivoin samižen edheotandoiden keskuseks. Vspäi 1953 lidn om mineraližen veden kurortaks jodan da broman mülündanke.

Geografijan andmused

Lidn sijadase Pšiš-jogen muugotil randoil (ven.: Пшиш, Kubanin hurapol'ne bassein), Kavkazan pohjoižel ezimägištol, 170 m ü.m.t. keskmäižel korktusel.

Matkad Apšeronsk-rajonkeskushesai om 20 km päivnouzmha avtotedme, Krasnodarhasai — 80 km lodeheze orhal vai 110 km avtotedme.

Tobmuz

Kaik koume futorad mülüdas lidnankundha Hadiženskan ližaks. Lidnankundan pind — 203,56 km².

Lidnankundan tobmuden pämez' om sen Administracijan pämez'. Edeline lidnan pämez' om Feliks Kravcov (viluku 2011 — sulaku 2018). Lidnan Nevondkundan ezimez' om Artur Tatulän vn 2019 redukuspäi, hän-žo radoi edel vn 2018 elokud. Edeline Nevondkundan ezimez' om Tat'jana Sulimenko (eloku 2018 — reduku 2019).

Eläjad

Vn 2010 Venäman rahvahanlugemižen mödhe lidnan eläjiden lugu oli 21 579 ristitud, lidnankundan — 22 585 ristitud. Vl 2018 kaik 22 468 ristitud elihe lidnas i 23 482 ristitud kaikes lidnankundas, rajonan kaks' ühesandest. Kaikiš suremb lidnan ristitišt oli 22 733 eläjad vl 2016.

Rahvahad (enamba 1 % vl 2010): venälaižed — 80,1 %, armenijalaižed — 6,9 %, ukrainalaižed — 1,6 %, toižed rahvahad — 10,9 %, rahvahuden ozutandata — 0,5 %.

Ortodoksižen hristanuskondan koume jumalanpertid oma saudud lidnas 1990-nziš vozišpäi: ph. Jurgii-vägestusenkandajan i Illä-endustajan, mugažo ph. Anastasija Sol'midenpätai-moknikan kolonijan territorijal. Protestantizman koume pühäpertid oma avaitud (baptizman kaks' i seičemenden päivän adventistoiden jumalankodikundan üks' pühäpert').

Professionaližen opendusen aluzkundad ratas lähembaižiš lidnoiš.

Transport

Avtobusad da ezilidnelektrojonused oma kundaližeks transportaks lidnas i rajonas. Avtostancii i 1811. km-raudteplatform sijadasoiš lidnas.

Hadiženskai-raudtestancii om Stancionnii-žilos kahtes kilometras päivlaskmha lidnaspäi «Armavir — Tuapse»-keskustal.

Galerei

• 
  Igähiženno lämoinno (2019)
• 
  Ph. Anastasija Sol'midenpätai-moknikan pühäpert' kolonijan territorijal, vn 2021 nägu
• 
  Kivivoinradnikoiden kul'turkeskuz i Vladimir Leninan muštnik vl 2011
• 
  Hadiženskai-raudtestancijal vl 2023

Irdkosketused

• Lidnankundan tobmuden aluzkundoiden oficialine sait (had.apsheronsk-oms.ru). (ven.) (angl.) (saks.)