Kašin

Kašin
Кашин
Lidnanznam;	Flag;
Valdkund	Venäma
Eläjiden lugu (2021)	14,113 ristitud
Telefonkod	+7−48 234-xx-xxx
Avtokod	69
Aigvö	UTC+3 (MSK+0)

Kašin (ven.: Ка́шин) om Venäman lidn i mineralveziden lebutaho Tverin agjan päivnouzmas. Se om Kašinan ümbrikon (edel vn 2018 semendkud — rajonan) administrativine keskuz.

Istorii

Eländpunkt mainitase ezmäižen kerdan vl 1238 Nikonan aigkirjas kuti muretud mongoloil lidn. Vozil 1319−1426 lidnuz oli Kašinan ruhtinazkundan pälidnaks. Lidn šingotihe vauktan sauvondmujun tehmižel, seižui vezitel Volgan i Nevan basseinoiden keskes. Vl 1775 Kašin sai makundan lidnan statusad.

Kašinan ižandusen päsarakod oma turizm, sömtegimišt (likörine tegim^[1], konditerine edheotand, lihaceh, mineraližen veden edheotandad), mugažo elektroladimišton tegim^[2] radab. Ende pölvhantegim i maidtegim oliba mugažo.

Geografijan andmused

Lidn sijadase rajonan suvipäivnouzmaižel röunal, Kašinkanjogen randoil (ven.: Кашинка, Volgan hura ližajogi), 125 m ü.m.t. keskmäižel korktusel.

Matkad Tverihesai om 116 km suvipäivlaskmha orhal vai 146 km avtotedme. Lähembaine lidn om Kaläzin 30 km suvipäivnouzmha raudtedme vai avtol. Ühtennimine Kašin-raudtestancii om saudud vl 1898 sarakon lopstancijaks «Bologoje — Ribinsk»-keskustaspäi, om ühtenzoittud Moskvanke vl 1918, seižub «Kaläzin — Ves'jegonsk»-raudtejonol.

Tobmuz

Kašin oli enččen lidnankundan (2005−2018) üks'jäižeks eländpunktaks.

Lidnan Administracii om likvidiruidud vn 2016 kezakus, Vladimir Aban'kov radoi sen jäl'gmäižen pämehen vn 2015 kül'mkuspäi. Lidnankundan Deputatoiden nevondkundan ezimez' oli hän-žo (tal'vku 2015 — reduku 2018), se nevondkund om likvidiruidud vn 2019 uhokule.

Eläjad

Vn 2010 Venäman rahvahanlugemižen mödhe lidnan eläjiden lugu oli 16 171 ristitud, rajonan kaks' koumandest. Kaik 14 475 eläjad oli lidnas vl 2017. Kaikiš suremb lidnan ristitišt oli 21 200 eläjad vl 1992.

Rahvahad (enamba 0,4 % vl 2010, ozutadud rahvahudenke): venälaižed — 96,3 %, ukrainalaižed — 0,9 %, toižed rahvahad — 2,8 %.

Ortodoksižen hristanuskondan nell' päjumalanpertid^[3] da 12 jumalanpertid oma saudud lidnas, mugažo om läz kümnen pühäpertin jändusid.

Kašinan kolledž^[4] (edel vn 2012 sügüz'kud agrarine tehnikum) i medicinine kolledž^[5] oma lidnan professionaližen opendusen aluzkundoikš.

Galerei

Rajonan administracijan sauvuz (2016)
Sündun Voznesenjan kafedraline päjumalanpert', vn 2009 nägu
«Kašin»-sanatorijan poliklinik, 2021
Kašinan kolledž (2016)
Kašin-päraudtestancii vl 2016

Homaičendad

↑ Kašinan «Veresk»-likörvodkantegimen sait (Kanabr' , veresk.com). (ven.) (angl.) (saks.) (isp.) (kit.) (port.)
↑ Kašinan elektroladimišton tegimen sait (kzeap.ru). (ven.)
↑ Kašinan pühäpertid sobory.ru-saital. (ven.)
↑ Kašinan kolledžan sait (collegekashin.ru). (ven.)
↑ Kašinan medicinižen kolledžan sait (kashmu.nubex.ru). (ven.)

Irdkosketused

Lidnan da Kašinan ümbrikon tobmuden sait (kashin.info). (ven.)

Kašin Vikiaitas

	Tverin agjan lidnad
	Andreapol' \| Belii \| Bežeck \| Bologoje \| Kaläzin \| Kašin \| Kimri \| Konakovo \| Krasnii Holm \| Kuvšinovo \| Lihoslavl' \| Nelidovo \| Ostaškov \| Päivlaskmpol'ne Dvin \| Ržev \| Staric \| Zubcov \| Toropec \| Toržok \| Tver' \| Udoml' \| Ves'jegonsk \| Višnii Voločok

[1] Kašinan «Veresk»-likörvodkantegimen sait (Kanabr' , veresk.com). (ven.) (angl.) (saks.) (isp.) (kit.) (port.)

[2] Kašinan elektroladimišton tegimen sait (kzeap.ru). (ven.)

[3] Kašinan pühäpertid sobory.ru-saital. (ven.)

[4] Kašinan kolledžan sait (collegekashin.ru). (ven.)

[5] Kašinan medicinižen kolledžan sait (kashmu.nubex.ru). (ven.)

[1]

[2]

[3]

[4]

[5]