Sokol (lidn)

Sokol
Сокол
Lidnanznam;	Flag;
Valdkund	Venäma
Eläjiden lugu (2023)	34,298 ristitud
Pind	69,42 km²
Telefonkod	+7−81 733-xx-xxx
Avtokod	35
Aigvö	UTC+3 (MSK+0)

Sokol (ven.: Со́кол «sakkal») om Venäman lidn Vologdan agjan keskuzpalas. Se om agjan koumanz' lidn eläjiden lugun mödhe, Sokolan ümbrikon (edel vn 2022 kezakud — rajonan) administrativine keskuz da pala.

Istorii

Sokolovo-külä mainitase ezmäižen kerdan vl 1615. Vl 1897 sauvoškanzihe «Sokol»-bumagfabrikad läz küläd, nimitihe külän mödhe. Vn 1932 2. päiväl keväz'kud Sokol-radnikžilo sai lidnan statusad VCIK:an käskön mödhe.

Sokol om agjan cellülozbumagaižen tegimišton da pun süvän ümbriradmižen keskuz, pästtas nenid tavaroid: cellüloz, erazvuiččiden sortuiden bumag^[1], karton^[2], puižed pertid da niiden detalid, faner, CLT-panelid (üks'jäine tehmine Venämas), pukuid- i pucementapakod, mebel', pilindmaterialad, fanerine i kartonpakuitez, pujauh. Mugažo savičun tegim^[3] i sagenzoittud maidon kombinat^[4] ratas lidnas.

Geografijan andmused

Lidnan tobj pala sijadase Suhon-jogen molembil randoil. Randad ühtenzoittas raudte- da avtotesildal lidnan keskuses da M8-trassan avtotesildal vides kilometras suvipäivnouzmha lidnaspäi. Lähembaine lidn om Kadnikov 15 km pohjoižpäivnouzmha. Lähembaine järed lidn — Vologd, matkad sihesai om 35 km suvhe orhal, 42 km avtotedme vai raudtel.

Sokol om ümbärtud mecoil da soil. Lidnfartaliden pind om 30,43 km².

Klimat om ven kontinentaline. Voden keskmäine lämuz om +2,5 C°, kezakun-elokun +14,9..+17,9 C°, tal'vkun-uhokun −10,2..−11,4 C°.

Tobmuz

Vhesai 2006 lidn oli alištunu agjan tobmudele oikti, sid' kätihe Sokolan rajonan palaks. Sokol oli lidnankundan üks'jäižeks eländpunktaks. Kätihe lidnankundad ümbrikon territorialižeks palakundaks vn 2022 kezakuspäi.

Lidnankundan käskusenandai tobmuz oli Sokol-lidnan Nevondkund 20 ezitajanke (koumanz' kucund vspäi 2013). Lidnan pämez' oli Nevondkundan ezitai, Jurii Vasin. Hän oli valitud vn 2017 sügüz'kul i radoi sen-žo voden redukuspäi.

Vn 2017 kezakuspäi Sergei Räbinin radoi lidnan Administracijan pämehen.

Eläjad

Vl 1931 radnikžilon ristitišt oli 15 100 eläjad. Vl 1967 50 tuhad ristituid elihe lidnas, se kändihe kaikiš surembaks luguks. Vn 2002 Venäman rahvahanlugemižen mödhe lidnan eläjiden lugu oli 43 042 ristitud, vn 2010 — 37 233 ristitud, vn 2021 — 34 742 ristitud, ümbrikon koume nelländest. Vl 2017 lidnan ristitišt oli 37 191 eläjad.

Ortodoksižen hristanuskondan kaks' pühäpertid^[5] oma avaitud lidnas: Jumalan Voznesenjan pühäpert' (vspäi 1997) i ph. Ioann Kronštadtalaižen (vspäi 2015). Protestantizman koume kundad oma, niiden kesken baptizm, seičemenden päivän adventistoiden jumalankodikund.

Kodirandantedištandmuzei, «Soldek»-kul'turpert', «Suhonskii»-kul'turpert'kulu, čomamahtoiden lapsidenškol, lapsiden da norišton sportškol, kaks' fizkul'turiž-tervehtamižkompleksad i ujundbassein oma saudud lidnas. Jäpert'kulu om sauvomas vspäi 2021. Opendusen aluzkundad oma 16 päivkodid, seičeme školad keskopendusenke, mectegimištoline politehnine tehnikum^[6] i pedagogine kolledž^[7].

Transport

Avtobusad da taksid oma kundaližeks transportaks lidnas. Avtobusad da jonused ühtenzoittas Sokolad Vologdanke da agjan toižidenke lidnoidenke.

Jogiport sijadase lidnan lodehes, Kogaš-lidnanlaptas. Suhon-raudtestancii om Suhon-jogen oiktal randal. Lähembaine lendimport om Vologd (VGD / ВГД / ULWW) Vologdan pohjoižröunanno, 30 km suvhe Sokolaspäi. Se om civiline lendimport federaliženke znamoičendanke, tehtas reisid Moskvha, Piterihe, Surhe Ustügha da Čerepovecha.

Sebruzlidnad

Suomenma Valkeakoski, Suomenma (vspäi 1971)^[8]

Galerei

Lidnan administracijan edeline pert' (2008)
Suhonan sagenzoittud maidon kombinat vl 2020
Külänvuitte pertišt (2011)
Raudte- da avtotesild Suhonanjoges päliči vl 2008

Homaičendad

Irdkosketused

Sokol (lidn) Vikiaitas

	Vologdan agjan lidnad
	Babajevo \| Belozersk \| Čerepovec \| Gräzovec \| Harovsk \| Kadnikov \| Kirillov \| Krasavino \| Nikol'sk \| Sokol \| Sur' Ustüg \| Tot'm \| Ustüžn \| Vitegr \| Vologd

[1] Sokolan cellülozbumagaižen kombinatan sait (sokolmill.ru). (ven.)

[2] Suhonan cellülozbumagaižen kombinatan sait (suhona.com). (ven.)

[3] Sokolan savičuntegimen sait (sokolstrom.ru). (ven.)

[4] Suhonan maidkombinatan sait (suhmk.ru). (ven.)

[5] Sokolan pühäpertid sobory.ru-saital. (ven.)

[6] Sokolan mectegimištoližen politehnižen tehnikuman sait (slpt.ru). (ven.)

[7] Sokolan pedagogižen kolledžan sait (p19602.edu35.ru). (ven.)

[8] Valkeakosken ystävyyskaupungit (Valkeakoskin sebruzlidnad). — Lidnan oficialine portal (valkeakoski.fi). (suom.)

[1]

[2]

[3]

[4]

[5]

[6]

[7]

[8]