Solomonan Sared

Solomonan Sared
Solomon Islands

Flag	Valdkundznam
Pälidn	Honiar
Eläjiden lugu (2018)	660,121 ristitud
Pind	28,896 km²
Kel'	anglijan
Valdkundan pämez'	Karl Koumanz'
Päministr	Manasse Sogavare
Religii	hristanuskond
Valüt	solomonan sariden dollar (SI$) (SBD)
Internet-domen	.sb
Telefonkod	+677
Aigvö	UTC+11

Solomonan Sared (angl.: Solomon Islands [ˈsɒləmən ˈaɪlənds], se om täuz' oficialine nimituz) vai Solomonad, om ümbärtud Koralliden- da Solomonan meril sar'hine valdkund Valdmerimaiš. Sen pälidn da kaikiš suremb lidn om Honiar.

Istorii

Pagižijad papuan kelil ezmäižed sirdnikad tuliba sarihe viž voz'tuhad tagaz. Pordol 1200−800. vot EME polinezijalaižiden ezitatad sirdiba sarihe Bismarkan sarištolpäi.

Ispanine Al'varo Mendanja de Neira-merimatkadai avaiži sarid evropalaižiden täht vl 1568. Hän sai kuldad aborigenoil barteran kal't i nimiti sarid Biblijan Solomon-carin mödhe, rindataden «Solomonan kuldmanke». Alusenpandud vl 1595 Filipp II-kunigahan käskön mödhe ispanine kolonii Santa Krus-sarel oli okaidud igähižiden eläjiden londoiden tagut, i sared oliba unohtadud Evropas pol'tošt voz'sadad. Britanine (anglijalaine) Filipp Karteret-merimatkadai tuli sarihe vl 1767.

Hristanuskondan missionerad napriba eläda saril 1840-nziden voziden keskespäi, no satusetomašti, äjad heišpai oliba riktud aborigenoil. Solomonan sariden otand kävutandha zavodiše 1860-nziš vozišpäi torgovanoil, hö mahtoiba kaita ičtaze sodakahiš sijaližiš eläjišpäi. Vl 1893 Britanine imperii tedoti protektoratad sariden päl. Vspäi 1907 britanižed edheotajad sädaškanziba kokospal'miden plantacijoid Britanižil Solomonan saril, sil-žo aigal hristanuskondan missijad zavodiba radod möst.

Toižen mail'man sodan aigan Japonijan imperijan sodaväged okkupiruiba sariden palad. Vll 1942−1945 japonijalaižiden verevad torad mäniba Solomonoil gitleranvastaižen koalicijan sodavägid vaste (Sur' Britanii, Amerikan Ühtenzoittud Valdkundad, Avstralii i Uz' Zelandii), lopuks jäl'gmäižed saiba vägestust.

Vn 1978 heinkun 7. päiväl Solomonan Sared tedištoitiba ičeze ripmatomudes Sures Britanijaspäi. Nügüdläine Konstitucii om väges siš-žo päiväspäi.

Geografijan andmused

Solomonan Sariden geografine kart (2004)

Solomonan Sared sijadasoiš 992 sarel. Ned ottas ühtennimižen sarišton tobjan palan, oma päivnouzmpolehe Papua — Udes Gvinejaspäi da lodeheze Vanuatuspäi. Solomonan Sariden randad lainištadas Tünen valdmeren Koralliden- da Solomonan mered. Randanpird — 5313 km.

Sared oma kattud korallil vedenalaižiden aktivižiden vulkanoiden päd. Kaikiš korktemb čokkoim om Popomanaseu-mägenoc (2310 m ü.m.t.) valdkundan kaikiš surembal Guadalkanal (Isatabu)-sarel. Om lühüdoid täuz'vezižid jogid.

Klimat om valdmerine ekvatorialine räk neps mussonine, lujad tropižed ciklonad oma harvad. Keskmäine lämuz om +26,5 C° vodes läbi. Paneb sadegid 3050 mm vodes.

Vozil 2007 da 2014 järedad manrehkaidused oliba (8 i 7.6 ballad Rihter-pordhišton mödhe).

Londuseližed varad oma kala, mec, fosfatad, kuld, boksitad, hahktin, cink, nikel'. Tarbhaižiden kaivatusiden löudmižsijad seištas koskmatomil.

Politine sistem

Solomonan Sariden parlamentan pertid Honiaras vl 2007

Ohjandusen form om unitarine konstitucine monarhii parlamentariženke sistemanke. Valdkundan pämez' om britanine Karl Koumanz'-kunigaz. Valitud parlamental videks vodeks jenaral-gubernator om hänele abuhu. Ohjastusen pämez' om valitud parlamental päministr (angl.: Prime Minister), hän paneb kaks'kümned ministrad radsijha.

Nacionaline Parlament (angl.: National Parliament) om üks'kodine 50 ezitajanke, kaik rahvaz valičeb heid nelläks vodeks. Valičemižoiktuz om 21-voččil da sen vanhemb.

Vn 2019 sulakun 3. päiväl Solomonan Sariden päjärgvaličendad oliba, sidä kesken valdkundan parlamentha. Manasse Sogavare radab päministran vn 2019 sulakun 24. päiväspäi, hän radoi päministran mugažo vll 2000−2001, 2006−2007, 2015−2017.

Administrativiž-territorialine jagand

   Kacu kirjutuz: Solomonan Sariden administrativiž-territorialine jagand.

Solomonan Sared jagasoiš ühesaks agjaks (provincijaks) Pälidnaiženke territorijanke (Honiar) sen ližaks.

Eläjad

Solomonan Saril elädas solomonan sarilaižed. Vn 2014 heinkus valdkundan ristitišt oli 609 883 eläjad. Kaikiš suremb valdkundan ristitišt om nügüd'. Valdkundas om 120 sijališt kel't.

Uskondan mödhe (2009): protestantad — 73,4 % (heiden kesken Melanezijan jumalankodikundan uskojad 31,9 %, evangelistad 17,1 %, seičemenden päivän adventistad 11,7 %, Ühtenzoittud jumalankodikundan polenpidajad 10,1 %), riman katolikad — 19,6 %, toižed hristanuskojad — 2,9 %, toižed uskojad — 4,0 %, uskondan märhapanendata — 0,1 %.

Toižed znamasižed eländpunktad (3..7 tuh. ristituid vl 2005, surembaspäi penembha) oma Gizo, Auki, Noro.

Ižanduz

Solomonan Sared oma goll' šingotai agrarine valdkund, rippub irdpol'žes torguindaspäi i verhiden maiden abuspäi suren valdkundaližen velgan tagut. Vl 2018 valdkundan nominaline kogosüdäiprodukt oli 1,38 mlrd. US$ ekvivalentas (US$2,197 ühtele hengele) vai 1,41 mlrd. US$ tazostadud ostmižmahtusen mödhe (US$2,251 ühtele hengele). Ižandusen päsarakod oma kaivuztegimišt, mectegimišt, maižanduz i kalanpüdand. Finansine voz' zavodiše 1. vilukud.

Kogosüdäiproduktan palad (2011): maižanduz 37,7 %, tegimišt 6,4 %, holitišiden sfer 55,9 %. Radajiden järgenduz sektoroidme vl 2000: maižanduz 75 %, tegimišt 5 %, holitišiden sfer 20 %.

Vl 2009 valdkundan päeksport oli parded (72 %, mail'man eksportan 3,3 %, kümnenz' sija), kala (10 %); toine eksport — pal'mvoi (5 %), kakao (5 %), kopr (torhuz kokospähkmišpäi). Importan tavarad oma mašiništ, poltuz (kivivoin ümbriradmižen produktad), himižen tegimišton produkcii, toižed tegimišton tavarad, söndtavarad (ris). Vl 2017 eksport (US$696 mln ekvivalentas) ületi importad (US$589 mln) läz videndeshe. Irdpol'žen torguindan päižed partnörad (2011) oma Kitai (Solomonan Sariden eksportan 54,0 % i importan 6,5 %), Avstralii (eksportan 12,5 % i importan 27,3 %), Singapur (importan 26,4 %), Malaizii (importan 5,1 %), Uz' Zelandii (importan 5,1 %), Tailand (eksportan 4,6 %).

Galerei

• 
  Südäiazjoiden ministruz, Honiar, eloku 2019
• 
  Rahaazjoiden ministruz, Honiar, eloku 2019
• 
  Solomonan Sariden Korged Käskuzkund (High Court), Honiar, eloku 2013
• 
  Solomonan Sariden keskuzbank, Honiar, eloku 2013

Irdkosketused

• Solomonan Sariden parlamentan sait (parliament.gov.sb). (angl.)
• Solomonan Sariden ohjastusen oficialine sait (pmc.gov.sb). (angl.)