Šahti

Šahti
Шахты

Lidnanznam	Flag
Valdkund	Venäma
Eläjiden lugu (2017)	235,492 ristitud
Pind	160,65 km²
Pämez'	Irina Žukova (sügüz'ku 2015—)
Telefonkod	+7−8636-xxx-xxx
Avtokod	61, 161
Aigvö	UTC+3 (MSK+0)

Šahti (ven.: Ша́хты «kaivuded») om Venäman lidn da lidnümbrik Rostovan agjan päivlaskmas. Se om agjan koumanz' lidn eläjiden lugun mödhe, Päivnouzmaižen Donbassan lidnaglomeracijan keskuz.

Istorii

Ezmäižed eländpunktad lidnan territorijal oliba koume futorad vspäi 1805: Popovskoi, Vlasov, Gruševskoi. Vl 1867 ühtištuihe niid da anttihe lidnan statusad Gruševkan kaivuzeländpunkt-nimitusenke (ven.: Горное Грушевское поселение). Vll 1881−1921 nimitihe sidä Aleksandrovsk-Gruševskii. Vspäi 1921 om nügüdläiženke nimitusenke. Nevondkundaližen aigan oli kivihilen samižen keskusen. Lidn oli okkupiruidud nacistoil (22.07.1942 — 12.02.1943) Toižen mail'man sodan aigan. Vll 1955−1957 Šahti oli Kamenskan agjan (1954−1957) administrativižeks keskuseks. Äjad kaivuded oma sauptud 1990-nzil i 2000-nzil vozil. Tehtihe lähižid žiloid lidnan palaks vl 2005, sen ristitišt ližadui 30 tuhad eläjid.

Šahti šingotase kivihilen samižel, elektrometallurgižel tegimel (teraz, vspäi 2007), sauvondmaterialiden pästandal (raudbeton, keramine apakut, keramine savič, kuivad sauvondsegoitused), tekstiližel edheotandal (ende kaikiš järedamb Evropas puvillkombinat) i omblendfabrikoil, sömtegimištol.

Geografijan andmused

Lidn sijadase Gruševk- (ven.: Грушевка), Ajut (Аюта) i Kadamovk- (Кадамовка) jogiden randal (Donan oigedpol'ne bassein), 100 m ü.m.t. keskmäižel korktusel. Lidnümbrik röunatab Oktäbrin rajonanke suves i Rusttan Sulinan rajonanke pohjoižes. Matkad Rostovhasai Donal om 64 km suvhipäivlaskmha orhal, 79 km avtotel vai raudtel. Lähembaižed lidnad oma Novošahtinsk 15 km päivlaskmha orhal vai 20 km avtotedme, Rusked Sulin 15 km pohjoižhe-lodeheze orhal, 25 km avtotedme vai raudtedme, i Novočerkassk 22 km suvhe orhal, 27 km avtotedme vai raudtedme. Šahtnai-raudtestancii (ven.: Шахтная) radab «Roston Donal — Moskv»-keskustal. «Don»-avtotrass (M4) ümbärdab lidnad päivlaskmaspäi.

Šahti om lidnümbrikon üks'jäine eländpunkt. Koume žilod mülüdas lidnha: Ajutinskii, Talovii, Sidorovo-Kadamovskii. Lidn jagase kudeks territorialižeks palakundaks.

Eläjad

Vl 1939 lidnan ristitišt oli 135 000 eläjid. Vn 2010 Venäman rahvahanlugemižen mödhe eläjiden lugu oli 239 987 ristitud. Kaikiš suremb lidnan ristitišt oli 249 100 eläjad vl 2005. Ortodoksižen hristanuskondan päjumalanpert' i seičeme pühäpertid oma avaitud lidnas, toižen hristanuskondan kümne pühäpertid oma olmas.

Rahvahad (2010): venälaižed — 94,2%, armenijalaižed — 1,8%, ukrainalaižed — 1,3%, toižed rahvahad — 2,7%.

Professionaližen opendusen aluzkundad oma Šahtin poltusen da energetikan regionaline kolledž, Šahtin pedagogine, muzikaline i medicinine kolledžad, Rostovan kooperativižen tehnikuman filial, mugažo üläopendusen aluzkundoiden koume filialad (Rostov Donal) ičeze kolledžidenke ratas lidnas. Kivihilen tedoinstitut, sidon ladimišton kaks' tedotegimišton edheotandad.

Galerei

• 
  Pühän Jumalanmaman katken päjumalanpert'
• 
  «Kontinent»-adivpert'
• 
  Dramteatr
• 
  Avtostancii (2011)
• 
  Päraudtestancijan sauvuz (2016)

Irdkosketused

• Lidnan Duman oficialine sait (shakhty-duma.ru) (ven.)
• Lidnan Administracijan oficialine sait (shakhty-gorod.ru) (ven.)