Agriz

Agriz
Агрыз (ven.)
Әгерҗе (tot.)

Valdkund	Venäma
Eläjiden lugu (2023)	19,860 ristitud
Pind	8,6 km²
Pämez'	Azat Valejev (sügüz'ku 2020—)
Telefonkod	+7−85 551-xx-xxx
Avtokod	16, 116, 716
Aigvö	UTC+3 (MSK+0)

Agriz (tot.: Әгерҗе / Ägerce, ven.: Агры́з, mugažo nitmarin kelel, udm.: Огырчи) om Venäman lidn da lidnankund Tatarstanan Tazovaldkundan pohjoižpäivnouzmas. Se om Agrizan rajonan administrativine keskuz (vspäi 1927).

Istorii

Eländpunkt mainitase ezmäižen kerdan vl 1646. Kätihe radnikžiloks vl 1928. Žilo sai lidnan statusad vn 1938 28. päiväl elokud.

Agrizan ižandusen sarakod oma sömtegimišt (kaks' leibänkombinatad, maidkombinat), sauvondmaterialiden pästand, mecan ümbriradmine, mugažo raudtedepo om saudud lidnas.

Geografijan andmused

Lidn sijadase penen Agrizk-jogen (tot.: Әгерҗе, udm.: Огырчи, Iž-jogen oiged ližajogi, Kaman i Volgan bassein) randal, 90 m ü.m.t. keskmäižel korktusel, ani Udmurtijan röunal.

Matkad Kazanihesai om 330 km päivlaskmha, Iževskhasai — 36 km pohjoižhe. Agriz-raudtestancii om olmas vspäi 1919, «Iževsk — Jarčalli»- i «Kazan' — Jekaterinburg»-raudtejonod ristikoittas lidnas.

Tobmuz

Agriz om lidnankundan üks'jäižeks eländpunktaks.

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 19 300 ristitud, vn 2021 — 19 991 ristitud. Kaikiš suremb ristitišt oli 20 270 eläjad vl 1959, sil aigalpäi vajehtase 18..20 tuh. ristituid röunoiš.

Rahvahad (ozutadud rahvahudenke vl 2010): totarlaižed — 59 %, venälaižed — 25 %, marilaižed — 8 %, udmurtalaižed — 6 %, toižed rahvahad — 2 %.

Islaman kaks' mečetid oma saudud da avaitud: «Hasan» i «Nur». Ortodoksižen hristanuskondan kaks' jumalanpertid oma saudud: ph. Sergii Radonežalaižen jumalanpert' (om letud vll 2005−2008) i Sündun Eläbzdusen loičendpert' (1995, om sauptud jumalanpertin sauvondan jäl'ghe).

Nižnekamskan agrariž-tegimištoližen kolledžan filial nomer kaks' om lidnan professionaližen opendusen aluzkundaks.

Galerei

• 
  Vezičuhunduz Vokzal'nai-irdal (2020)
• 
  Rusttan Armijan 106 sodamehen velleskaum Vokzal'nai-irdal, vn 2020 nägu
• 
  Vedimdepo vl 2020
• 
  Raudtestancijan ühthine nägu (2011)
• 
  Agriz-päraudtestancijan sauvuz vl 2011

Irdkosketused

• Lidnan da Agrizan rajonan oficialine sait Tatarstanan Tazovaldkundan tobmuden portalal (agryz.tatarstan.ru). (ven.) (tot.)