Kopeisk

Kopeisk
Копейск

Lidnanznam	Flag
Valdkund	Venäma
Eläjiden lugu (2025)	143,751 ristitud
Pind	236,71 km²
Pämez'	Svetlana Loganova (sulaku 2024—)
Telefonkod	+7−35 139-xx-xxx
Avtokod	74, 174
Aigvö	UTC+5 (MSK+2)

Kopeisk (ven.: Копе́йск, mugažo totaran i baškiran kelil) om Venäman lidn Čeläbinskan agjan keskuzpalan päivnouzmas, Čeläbinskan suvipäivnouzmaine ezilidn. Se om agjan videnz' lidn eläjiden lugun mödhe, Kopeiskan lidnümbrikon administrativine keskuz.

Istorii

Eländpunktan aluz om pandud vl 1907 Tugaikul'-žilon sijas samha burad hil't. Se sai lidnan statusad vl 1933. Sauptihe kaikid buran hilen kaivuzid 1990-nzil vozil. Vl 2004 mülütihe lähižid kaivuzžiloid lidnha, i sen ristitišt ližadui läz pol'tošt kerdad.

Kopeisk šingotase kaivuzmašinoiden tegimel (kaivuzkombainad, mašinad kaivamha tonnelid), armijan raketoiden i šlibakoiden tegimel, sauvondplastikan edheotandoil (torved, fitingad, polietilenkerteh), mugažo keramižen propantan tegim, zell'edheotand i äjintorguindkeskused ratas lidnas.

Geografijan andmused

Kopeiskan lidnümbrikon sijaduz agjas vn 2008 kartal, om znamoitud IV-lugul

Lidn sijadase lidnümbrikon suvipalas, 200 m ü.m.t. keskmäižel korktusel.

Kopeisk röunatab Čeläbinskanke päivlaskmas. Toine lähembaine lidn om Korkino 28 km suvipäivlaskmha-suvhe orhal, 44 km avtotedme vai raudtedme.

Tobmuz

Kopeisk jagase seičemeks territorialižeks palakundaks. Koume žilod mülüdas lidnümbrikho Kopeiskan ližaks: Kalačovo, Zaozörnii, Sineglazovo. Žilod sätas ümbrikon kahesant territoriališt palakundad. Lidnümbrikon pind — 355 km².

Lidnümbrikon tobmuden pämez' om sen Administracijan pämez'. Edeližed lidnan Administracijan pämehed oma Andrei Faleičik (sulaku 2019 — sulaku 2024), Vladimir Možin (sulaku 2017 — sulaku 2019), Väčeslav Istomin (vn 2016 sügüz'kuhusai). Lidnümbrikon Deputatoiden suiman ezimez' om Jevgenii Giske vn 2020 redukuspäi. Edeline suiman ezimez' om Vladimir Jemel'janov, radoi vn 2020 redukuhusai.

Eläjad

Vl 1939 lidnan ristitišt oli 60 tuhad eläjid. Vn 2010 Venäman rahvahanlugemižen mödhe lidnan eläjiden lugu oli 137 601 ristitud, lidnümbrikon — 139 756 ristitud, vn 2021 lidnan — 147 806 ristitud. Kaik 147 573 ristitud elihe lidnas i 149 735 ristitud kaikes lidnümbrikos vl 2017. Kaikiš suremb lidnan ristitišt oli 160..168 tuhad eläjid vll 1959−1967 (168 tuh. rist. vl 1962).

Rahvahad (2010): venälaižed — 85,8 %, totarlaižed — 5,7 %, ukrainalaižed — 2,0 %, saksalaižed — 2,0 %, baškiralaižed — 1,6 %, toižed rahvahad — 2,9 %.

Ortodoksižen hristanuskondan vižtoštkümne pühäpertid oma avaitud lidnas da sen ümbrikos: kümne jumalanpertid i viž časounäd. Nell' türmad-kolonijad oma olmas lidnas mugažo.

Lapsiden opendusen aluzkundad oma päivkodid, keskškolad. Professionaližen opendusen aluzkundad oma Kopeiskan medicinine tehnikum, Kopeiskan politehnine kolledž, Suviuralan valdkundaližen universitetan (Čeläbinsk) filial.

Galerei

• 
  Lidnümbrikon administracijan sauvuz (2008)
• 
  Lidnan tervhudenkaičendan ohjanduz i medicinine škol (2009)
• 
  Triumfaline bembelüläh, vn 2018 nägu
• 
  Kopeiskan mašinansauvomižen tegim vl 2012
• 
  Kopeiskan tegim vl 2009
• 
  Keskškol nomer 7 (2008)
• 
  Lapsiden sädamižen pert'kulu (2012)
• 
  Tegimen S. Kirovan nimed kul'turkeskuz (2012)
• 
  Slava-torguimižbobuštuzkompleks (2012, «Hoštuz»)
• 
  Lidnan avtobusstancii vl 2008

Irdkosketused

• Lidnümbrikon Ezitajiden suiman oficialine sait (kopeysk-sobranie.ru). (ven.)
• Lidnümbrikon Administracijan oficialine sait (akgo74.ru). (ven.)