Aš (lidn, Venäma)

Aš
Аша

Lidnanznam	Flag
Valdkund	Venäma
Eläjiden lugu (2023)	27,442 ristitud
Pind	52,4 km²
Pämez'	Il'ja Lutkov (keväz'ku 2010—)
Telefonkod	+7−35 159-xx-xxx
Avtokod	74, 174
Aigvö	UTC+5 (MSK+2)

Sil sanal voib olda toižid znamoičendoid; miše nähta niid, tulgat tänna.

Aš (ven.: Аша́, bašk. i tot.: Әшә) om Venäman lidn da lidnankund Čeläbinskan agjan päivlaskmaižes sarakos. Se om Ašan rajonan administrativine keskuz da kaikiš suremb lidn.

Istorii

Eländpunktan aluz om pandud vl 1898 kuti žilo udenno kaugedraudan Aša-Balašovo-tegimenno, nimitihe jogen mödhe. Radnikžilo sai lidnan statusad vn 1933 20. päiväl kezakud.

Aš šingotase raudan metallurgijan tegimel, mugažo lämuzarmaturan i mechimine tegimed ratas lidnas.

Geografijan andmused

Ašan rajonan sijaduz agjas vn 2009 kartal

Lidn sijadase rajonan suvipäivlaskmaiženno röunanno, Sim-jogen oiktal randal tobjimalaz (bašk.: Эҫем 239 km pitte, Kaman hurapol'ne bassein), 140 m ü.m.t. keskmäižel korktusel. Aš-jogi (ven.: Аша 59 km pitte) lankteb Simha oiktalpäi lidnas.

Baškortostan levitase ani päivlaskmha lidnaspäi Aš-jogen vastrandal. Matkad Čeläbinskhasai om 263 km päivnouzmha orhal, 333 km avtotedme vai 360 km raudtedme. Lähembaižed lidnad oma Sim-lidn päivnouzmha i Min'jar pohjoižpäivnouzmha. «Čeläbinsk — Uf»-raudte läbitab lidnad, Aš-stancii (ven.: Аша) radab sen keskuzpalas.

Tobmuz

Aš om lidnankundan üks'jäižeks eländpunktaks. Lidnankundan pind om 549,32 km².

Eläjad

Vn 2010 Venäman rahvahanlugemižen mödhe lidnan eläjiden lugu oli 31 881 ristitud, rajonan pol', vn 2021 — 27 890 ristitud. Kaik 29 946 eläjad oli lidnas vl 2017. Kaikiš suremb lidnan ristitišt oli 36..39 tuhad eläjid vll 1959−1998 (39 100 rist. vl 1992).

Ortodoksižen hristanuskondan ühesa pühäpertid oma saudud lidnas: Jumalanmaman Odigitrija-jumalaižen naižjumalankodi (om sätud vspäi 2006 pal'hal sijal, jumalanpert' i kuz' časounäd) i kaks' tošt jumalanpertid. Islaman mahallä-mečet' nomer 160 om avaitud mugažo.

Lapsiden opendusen aluzkundad oma päivkodid, keskškolad. Ašan industrialine tehnikum om lidnan professionaližen opendusen aluzkundaks.

Galerei

• 
  Muštnik A. Umovale i fontan (2008)
• 
  Jumalanmaman Kazanin jumalaižen jumalanpert', vn 2020 nägu (avaitihe vl 2005)
• 
  Lidnan puine pertišt (2007)
• 
  Aš-päraudtestancijan sauvused vl 2021

Irdkosketused

• Lidnankundan tobmuden oficialine sait (asha-sovet.ru) i sen vanh versii (ashagps.ru, om täuttud vn 2015 elokuhusai). (ven.)
• Lidnan da sen rajonan informacine sait (gorod-asha.ru). (ven.)
• Lidnan i Ašan rajonan tobmuden sait (аша-район.рф). (ven.)