Čebarkul' (lidn)

Čebarkul'
Чебаркуль

Lidnanznam	Flag
Valdkund	Venäma
Eläjiden lugu (2023)	44,671 ristitud
Pind	71,13 km²
Pämez'	Svetlana Vinogradova (keväz'ku 2019—)
Telefonkod	+7−35 168-xx-xxx
Avtokod	74, 174
Aigvö	UTC+5 (MSK+2)

Čebarkul' (ven.: Чебарку́ль, tot.: Чибәркүл, bašk.: Сыбаркүл «čoma /kirjav/ järv») om Venäman lidn da lidnümbrik Čeläbinskan agjan keskuzpalan pohjoižes. Se om Čebarkulin rajonan administrativižeks keskuseks mugažo, ei mülü sihe.

Istorii

Eländpunktan aluz om pandud baškiran territorijal vl 1736 kuti venämalaine lidnuz imperijan röunal. Nimitihe järven mödhe. Kändihe kozakoiden stanicaks, varatoiti heiden edembaižid žiloid. Toižen mail'man sodan aigan Elektrostalin tegim (Moskvan agj) oli evakuiruidud žilho. Radnikžilo sai lidnan statusad vn 1951 25. päiväl redukud.

Čebarkul' šingotase järedal «Uraline paja»-tegimel (valamižezitegesed, tagodud tegesed, ühthekeittud konstrukcijad mašinansauvomižen i aviacijan täht), libutimiden tegimel, sauvondmaterialiden tehmižel (šlakblok, faner), sömtegimištol (leibänproduktad, maidtegim, kalategim, konditerine fabrik, lindun edheotand), mugažo omblendfabrik radab lidnas.

Geografijan andmused

Čebarkulin rajonan sijaduz agjas vn 2009 kartal

Lidn sijadase ümbärdajan rajonan lodehes, Suviuralan Il'menan mägisel'gan päivnouzmaižel pautkel, 345 m ü.m.t. keskmäižel korktusel. Lidn om ümbärtud järvil, sured oma: Čebarkul' päivlaskmaižeks röunaks (19,8 nellikkilometrad), Jelovoje ani lodeheze (3,1 km²), i Misäš pohjoižpäivnouzmas (4,4 km²). Kaik järved mülüdas Tobolan hurapol'žhe basseinha.

Matkad Čeläbinskhasai om 69 km päivnouzmha orhal, 82 km avtotel vai 79 km raudtel. Lähembaine lidn om Miass kümne kilometrad päivlaskmha orhal, 15 km avtotel vai raudtel. «Čeläbinsk — Uf»-raudte läbitab lidnan pohjoižpalad. Nened stancijad ratas lidnas: Čebarkul' (vspäi 1954), Misäš (edel 1954. vot Čebarkul'), Kisegač, Kaširinskii-platform. Ural-avtote (M5-trass) mäneb nelläs kilometras suvhe lidnaspäi.

Tobmuz

Čebarkul' om lidnümbrikon üks'jäižeks eländpunktaks.

Edeline lidnümbrikon pämez' om Sergei Kovrigin (tal'vku 2015 — keväz'ku 2019).

Eläjad

Vn 2010 Venäman rahvahanlugemižen mödhe lidnan eläjiden lugu oli 42 844 ristitud, vn 2021 — 44 693 ristitud. Kaik 39 914 eläjad oli lidnas vl 2017. Kaikiš suremb lidnan ristitišt oli 50..51 tuhad eläjid vll 1989−2001 (51 800 rist. vl 1996).

Rahvahad (2010): venälaižed — 90,2 %, totarlaižed — 2,7 %, baškiralaižed — 2,2 %, ukrainalaižed — 1,7 %, toižed rahvahad — 3,2 %.

Ortodoksižen hristanuskondan Spasan Toižetamižen jumalanpert' (1745, om udessündutadud vl 2007) pühäpäivän školanke i islaman «Ihlas»-pühäpert' (vspäi 2009) oma avaitud lidnas.

Lapsiden opendusen aluzkundad oma päivkodid, keskškolad. Čebarkulin professionaline tehnikum om lidnan professionaližen opendusen aluzkundaks.

Galerei

• 
  Lämoipalopalakund (2009)
• 
  Spasan Toižetamižen jumalanpert', vn 2012 nägu
• 
  Tankdivizijan sodagarnizon vl 2016
• 
  «Uraline tähtaz»-jäpert'kulu (2014)
• 
  Čebarkul' -päraudtestancii vl 2010

Irdkosketused

• Lidnümbrikon Deputatoiden suiman sait (sdchebarcul.eps74.ru). (ven.)
• Lidnümbrikon Administracijan sait (chebarcul.ru). (ven.)