Tröhgornii

Tröhgornii
Трёхгорный

Lidnanznam	Flag
Valdkund	Venäma
Eläjiden lugu (2023)	32,478 ristitud
Pind	7 km²
Pämez'	Danil Gromenko (kezaku 2022—)
Telefonkod	+7−35 191-xx-xxx
Avtokod	74, 174
Aigvö	UTC+5 (MSK+2)

Tröhgornii (ven.: Трёхгорный «koumel mägel», mugažo totaran i baškiran kelil) om Venäman sauptud lidn da lidnümbrik Čeläbinskan agjan päivlaskmaižes sarakos. Om ümbärtud Katav-Ivanovskan rajonan territorijal.

Istorii

Eländpunktan aluz om pandud vn 1952 vilukus-sulakus (9. sulakud) kuti žilo sauvomha da holitamha atombomboiden tegint nomer 933. Panihe radnikžilod oficialižikš vn 1954 17. päiväl keväz'kud. Radnikžilo sai lidnan statusad vn 1955 27. päiväl redukud Zlatoust-20-nimitusenke. Vll 1967−1993 sen nimi oli Zlatoust-36. Vn 1993 redukun 29. päiväspäi lidn om olmas nügüdläiženke nimenke.

Tröhgornii šingotase ladimidensauvomižel tegimel (südäitukuižed šlibakod) i mägisuksiden kurortal. Kaik enamba mi 600 organizacijad om registriruidud lidnas, niišpäi kaks' sadad oma järedad i keskmäižed surtte.

Geografijan andmused

Tröhgornijan lidnümbrikon sijaduz agjas vn 2008 kartal, om znamoitud X-lugul

Lidnan eländfartalad sijadasoiš Jurüzan'-jogen üläjoksmusen oiktal randpolel (Kaman hurapol'ne bassein), 431 m ü.m.t. keskmäižel korktusel.

Matkad Čeläbinskhasai om 181 kilometrad päivnouzmha orhal vai 232 km avtotedme. Lähembaižed lidnad oma Jurüzan' (raudtestancijanke vaiše jüguiden täht) vides kilometras pohjoižhe orhal vai avtotel, Katav-Ivanovsk kahesatoštkümnes kilometras päivlaskmha-suvipäivlaskmha orhal vai 27 km avtotedme, i Ust'-Katav (raudtestancijanke) 23 km lodeheze orhal vai 38 km avtotedme. «Čeläbinsk — Uf»-mante (M5-trass) ümbärdab lidnad kudes..kahesas kilometras pohjoižes.

Tobmuz

Tröhgornii om lidnümbrikon üks'jäižeks eländpunktaks. Lidnümbrikon pind — 162,49 km².

Lidnümbrikon tobmuden pämez' om sen Administracijan pämez'. Edeližed Administracijan pämehed oma Jevgenii Sičov (Евгений Сычёв, kezaku 2020 — kezaku 2022), Vladimir Beläkov (kezaku 2016 — kezaku 2020). Lidnan Deputatoiden suiman ezimez' om Vasilii Bobkov vn 2024 redukuspäi. Edeližed lidnan suiman ezimehed oma Sergei Bukrin (kezaku 2020 — reduku 2024), Jevgenii Sičov (radoi vn 2020 kezakuhusai).

Eläjad

Vn 2010 Venäman rahvahanlugemižen mödhe lidnan eläjiden lugu oli 33 670 ristitud, vn 2021 — 32 463 ristitud. Kaik 32 355 eläjad oli lidnas vl 2017. Kaikiš suremb lidnan ristitišt oli enamba mi 34 tuhad eläjid vll 2002−2009 (34 700 rist. vl 2007).

Rahvahad (2010): venälaižed — 88,2 %, totarlaižed — 4,5 %, baškiralaižed — 3,4 %, ukrainalaižed — 1,5 %, toižed rahvahad — 2,4 %.

Ortodoksižen hristanuskondan seičeme pühäpertid oma saudud lidnas: nell' jumalanpertid (Pühän Jumalanmaman Katken, Jumalanmaman «Palamatoi penzaz»-jumalaižen, ph. Luka Voino-Jasenecalaižen, ph. Jurgii-vägestusenkandajan) i koume časounäd. Islaman mahallä-mečet' nomer 919 om avaitud.

Lapsiden opendusen aluzkundad oma severz'-se nimitadud i nomeruidud päivkodid (nomer 1, 4, 7, 8, 16, 17), viž keskškolad (nomer 106, 108, 109, 110, 112), specialine (korrekcine) škol-internat 8. toižendan lapsiden tervhuden röunatud voimusidenke täht, lapsiden sädamižen keskuz, čomamahtoiden škol, lapsiden da norišton kaks' sportškolad (nomer 1 i dzüdon). Professionaližen opendusen aluzkund om Tröhgornijan tehnologine institut — Nacionaližen MIFI-südäitukuižtedoiduzkeskusen filial.

Galerei

• 
  Kalininan i Ostrovskijan irdoiden ristte (sügüz'ku 2019)
• 
  Tröhgornijan tehnologine institut — Nacionaližen MIFI-südäitukuižtedoiduzkeskusen filial (semendku 2018)
• 
  Ikar-kul'turkeskuz i torg senno (sügüz'ku 2024)

Irdkosketused

• Lidnankundan oficialine sait (admintrg.ru). (ven.)