Troick (Čeläbinskan agj)

Troick
Троицк
Lidnanznam;	Flag;
Valdkund	Venäma
Eläjiden lugu (2023)	69,983 ristitud
Pind	139,15 km²
Pämez'	Aleksandr Vinogradov; (viluku 2014—)
Telefonkod	+7−35 163-xx-xxx
Avtokod	74, 174
Aigvö	UTC+5 (MSK+2)

Sil sanal voib olda toižid znamoičendoid; miše nähta niid, tulgat tänna.

Troick (ven.: Тро́ицк, tot.: Тыруйски / Троицк, kaz.: Мұнанай / Троицк) om Venäman lidn, lidnümbrik da transporttesol'm Čeläbinskan agjan suvipäivnouzmas, röunanno Kazahstananke. Se om agjan seičemenz' lidn eläjiden lugun mödhe, om Troickan rajonan administativižeks keskuseks mugažo (ei mülü sihe).

Istorii

Eländpunktan aluz om pandud kazahlaižiden tahondas vn 1743 kezakul kuti Troickan lidnuz. Vspäi 1750 tehtihe jarmankad semendkuspäi redukuhusai žilon torguindtanhal, torguind mäni vajehtusel. Žilo sai lidnan statusad vl 1784.

Troick šingotase GRES:an elektrusen pästandal, elektromehanižel tegimel, sauvondmaterialiden pästandal (mineraline lämuzizoläcii, savičtegim), sömtegimištol, mugažo sumciden pästandal edheotand, muit, vedimdepo i vagondepo ratas lidnas.

Geografijan andmused

Troickan lidnümbrikon sijaduz agjas vn 2008 kartal, om znamoitud XI-lugul

Lidn sijadase Uvel'k-jogen molembil randoil (ven.: Увелька 234 km pitte, Tobolan hurapol'ne bassein), 170 m ü.m.t. keskmäižel korktusel. Ui-jogi (ven.: Уй) lankteb Uvel'kha oiktalpäi, ned sätas Troickan vezivaradint ani lidnas da vides kilometras mödvedhe päivnouzmha sišpäi.

Matkad Kazahstanhasai om noläspäi vidhe kilometrhasai suvhe i suvipäivlaskmha, Čeläbinskhasai om 120 km pohjoižhe orhal, 136 km avtotel vai raudtel. Lähembaine lidn om Suviural'sk 44 km pohjoižhe-lodeheze orhal, 49 km avtotedme vai raudtedme.

Klimat om ven kontinentaline. Voden keskmäine lämuz om +3,3 C°, kezakun-elokun +16,8..+19,0 C°, tal'vkun-uhokun −13,7..−17,2 C°. Ekstremumad oma −49 C° (viluku) i +41 C° (heinku). Kezaaigan minimum om −1,2 C° (kezaku), tal'vaigan maksimum om +9,5 C° (uhoku). Ei voi panda halad heinkus vaiše, elokun minimum om 0 C°. Paneb sadegid 387 mm vodes keskmäras, enamba kezakus-heinkus (57..68 mm kus), vähemba vilukus-keväz'kus (14..18 mm kus). Kun keskmäine relätivine nepsuz vajehtase 54 procentaspäi semendkus 80 procenthasai tal'vkus-vilukus.

Tobmuz

Troick om lidnümbrikon üks'jäižeks eländpunktaks.

Edeline lidnan pämez' (lidnümbrikon Administracijan pämez') om Viktor Ščokotov (2010 — viluku 2014).

Eläjad

Vl 1939 kaik 47 tuhad ristituid elihe lidnas. Vn 2010 Venäman rahvahanlugemižen mödhe lidnan eläjiden lugu oli 78 372 ristitud, vn 2021 — 70 301 ristitud. Kaik 75 231 eläjad oli lidnas vl 2017. Kaikiš suremb lidnan ristitišt oli 85..91 tuhad eläjid vll 1967−2001 (91 tuh. rist. vll 1986−1987).

Rahvahad (2010): venälaižed — 82,5 %, totarlaižed — 7,2 %, ukrainalaižed — 3 %, kazahlaižed — 2 %, toižed rahvahad — 5,3 %.

Ortodoksižen hristanuskondan vižtoštkümne pühäpertid^[1] oma kaičenus i saudud lidnas: Eläban Eziauguižen Stroican kafedraline päjumalanpert' (letihe vll 1754−1762), Kazanin Jumalanmaman naižjumalankodin jumalanpert' i časoun', kuz' jumalanpertid, koume kodijumalanpertid i koume časounäd. Niiden ližaks üks' jumalanpert' i üks' časoun' ei ole kaičenus. Islaman seičeme pühäpertid oli edel Redukun revolücijad, nellän mečetin sauvused oma kaičenus, niišpäi kaks' oma udessündutadud i avaitud.

Openduz

Lapsiden opendusen aluzkundad oma päivkodid, keskškolad, kaks' čomamahtoiden školad, muzikškol.

Professionaližen opendusen aluzkundad oma Troickan tehnologine tehnikum^[2] i koume kolledžad: aviacijan tehnine^[3], pedagogine^[4], medicinine^[5], mugažo Čeläbinskan valdkundaližen universitetan filial, Suviuralan valdkundaližen agrarižen universitetan filial (edel 2003. vot Troickan agrarine tehnikum) i sen-žo Veterinarižen medicinan institut^[6] ratas lidnas.

Galerei

Lidnan administracijan sauvuz Klimovan irdal (2017)
Eläban Eziauguižen Stroican (Uin) kafedraline päjumalanpert', vn 2007 nägu
Troickan GRES vl 2018
«Central'naja»-adivpert' (2014, Keskuzline, om saudud Bašarov-torgovanan ohjandusen al vl 1907)
Troick-päraudtestancijan sauvuz vl 2016

Homaičendad

↑ Troickan pühäpertid sobory.ru-saital. (ven.)
↑ Troickan tehnologižen tehnikuman sait (ttt.troitsk.su). (ven.) (+ äikel'ne avtomatine känduz)
↑ Troickan aviacijan tehnižen kolledžan sait (tatuga.ru). (ven.)
↑ Troickan pedagogižen kolledžan sait (tpcollege.ru). (ven.)
↑ Troickan medicinižen kolledžan sait (medtroitsk74.my1.ru). (ven.)
↑ Suviuralan valdkundaližen agrarižen universitetan filialad юургау.рф-saital. (ven.)

Irdkosketused

Troick (Čeläbinskan agj) Vikiaitas

	Čeläbinskan agjan lidnad
	Aš \| Bakal \| Čebarkul' \| Čeläbinsk \| Jemanželinsk \| Jurüzan' \| Karabaš \| Kartali \| Kasli \| Katav-Ivanovsk \| Kištim \| Kopeisk \| Korkino \| Kus \| Magnitogorsk \| Miass \| Min'jar \| Näzepetrovsk \| Ozörsk \| Plast \| Satk \| Sim \| Snežinsk \| Suviural'sk \| Zlatoust \| Troick \| Tröhgornii \| Ust'-Katav \| Üläufalei \| Üläural'sk

[1] Troickan pühäpertid sobory.ru-saital. (ven.)

[2] Troickan tehnologižen tehnikuman sait (ttt.troitsk.su). (ven.) (+ äikel'ne avtomatine känduz)

[3] Troickan aviacijan tehnižen kolledžan sait (tatuga.ru). (ven.)

[4] Troickan pedagogižen kolledžan sait (tpcollege.ru). (ven.)

[5] Troickan medicinižen kolledžan sait (medtroitsk74.my1.ru). (ven.)

[6] Suviuralan valdkundaližen agrarižen universitetan filialad юургау.рф-saital. (ven.)

[1]

[2]

[3]

[4]

[5]

[6]